سبينوزا .. وديكارت !!
-"ديكارت" يكول : اذا أردت الوصول الى الحقيقة وان تتأكد من شي معين فلازم تشكك بكل شي اول هيله ، وبعدين تبدأ تبحث عن هذا الشيء اللي تريد تتأكد منه بهدوء وبدون تعصب لكي تصل إلى انو هذا الشي صحيح لو باطل ..
-مو واضح ؟!
- يعني مثلا ، إذا ردت تتأكد انو مذهبك الديني صحيح لو باطل ، فلازم اول مرة تشكك بمذهبك وتشيل كل اعتقاداتك اللي ورثتهه من الخلفوك من راسك ، وتكون فارغ الذهن والنفس من كل شي ، وراهه تبدي تبحث عن صحة هذا المذهب وتقارن بين الأدلة اللي تؤيد مذهبك وبين الأدلة اللي تبطل مذهبك ، وتشوف ياهو الأقوى بيهن وتاخذ بيه ، وعلى هذا المثال قيس كل شيء ، واضح استادي ؟
-اي واضح ..
-حجي ديكارت ماالتزم بمنهجه الشكي للاخير وماطبقه على كل شيء ؛ يعني طبقه على بعض الأمور وماطبقه على أمور أخرى ..
-مثليش هاي الامور الأخرى اللي ماطبق ديكارت منهجه الشكي عليهه ؟
-مثل قضية وجود الله أو عدم وجوده ؛ يعني ماكال : لازم احنه نجي بذهن فارغ ونبحث قضية وجود الله أو عدم وجوده بدون مسبقات عقائدية ، لا بالعكس ، فهو اعتبر انو قضية وجود الله من المسلمات وماتحتاج بحث ..
-ليش سوه هيج ؟
-يكولون : جان يداري خبزته ويخاف على حياته من رجال الدين خاف يطكوه بالدهن ، فكام يداهنهم ويسايسهم وبالتالي ماتدنه لقضية وجود الله أو عدم وجوده ..
-حلو ، والفيلسوف سبينوزا شسوه ؟
-سبينوزا التزم حرفيا بمنهج ديكارت الشكي وطبقه بصورة شاملة على كل شيء بمافيهم الإله ؛ يعني الشغلة اللي خاف ديكارت ان يسويهه ، سواهه سبينوزا وعبر لذاك الصوب ، وبحث قضية وجود الله أو عدم وجوده ، وكال : لو تصير ديكارتي مية بالمية لو لاتصير نهائيا ، فطبق منهج ديكارت الشكي بحذافيره على كل شيء ، وبالتالي تحمل ماتحمل في سبيل آراءه الجريئة ..
والحمد لله ..
فلسفة سبينوزا ( الحلقة الثانية )
رد مع اقتباس
المشاركة الأصلية كتبت بواسطة MiSsO
