احدث الابحاث اظهرت ان زيادة الوزن مش معتمدة بس على كمية الاكل اللي بتاكليها ولكن بتعتمد على انتي بتاكليها امتى, توقيت الوجبات ليه تأثير كبير على زيادة الوزن وعلى الصحة بشكل عام, كتير مننا بياكل من اول ما يصحى من النوم لحد ما يروح للسرير, والدراسات الحديثة اثبتت دلوقتي انه من خلال تقييد اكلك من 8 – 10 ساعات, ده ممكن يقلل السعرات الحرارية بنسبة توصل ل 20% وفي نفس الوقت هتبقي بتاكلي كل الاكل اللي بتحبيه, وده اللي هنعرفه النهاردة من خلال المقال بتاعنا هنتعرف على طريقة تخسيس الوزن بحساب الوقت مش بالسعرات الحرارية.
تخسيس الوزن بحساب الوقت:
الطريقة دي مش بس بتساعد على تخسيس الوزن, ولكن بتساعد كمان على خفض الكوليسترول الضار في الجسم, تحسين مستويات السكر في الدم, وتجنب الشيخوخة.
وخبراء التغذية بيقولوا ان النظام الغذائي المسمى بالتغذية المقيدة بالوقت TRF, هو في الحقيقة يعتبر عودة لانماط الاكل البدائية اللي كانت موجودة من قرون كتير جدا, واللي بتعتمد على الاكل خلال ساعات النهار, ونوقف الاكل بالليل, وبالتالي بنضمن روتين نوم منتظم بيساعد على زيادة عملية الايض في الجسم وحرق السعرات الحرارية.
خطة النظام الغذائي المقيد بالوقت بيعتمد على الاكل خلال النهار والصوم باقي الوقت, وده بيدي فرصة للجسم للراحة وانها يجدد نفسه.
هنشوف دلوقتي مثال لخطة نظام غذائي مقيد بالوقت من 10 – 12 ساعة:
– وجبة الفطار الساعة 8 الصبح: اومليت بالجبنة والخضار, وقهوة (من غير سكر).
– وجبة الغدا الساعة 1 بعد الضهر: 170 جرام سمك سلمون, بروكلي مطبوخ على البخار مع الزبدة, ارز بني, كوباية عصير فاكهة, بسكويت.
– وجبة العشا الساعة 6 مساء: ساندوتش سلطة فراخ بخبز بالقمح الكامل, خس, طماطم, تفاحة.
– باقي اليوم خلال فترة الصيام اعتمدي على المية والقهوة بس.
تخسيس الوزن بحساب الوقت
اخصائيين الحميات الغذائية لاحظوا ان النظام ده مش بس بيساعد على فقدان الوزن, ولكن كمان بيساعد على خفض ضغط الدم ومستويات الجلوكوز, ولاحظوا كمان نشاط العمليات الفسيولوجية المرتبطة بابطاء عملية الشيخوخة.
والنظام الغذائي المقيد بالوقت يعتبر بشكل اساسي شكل من اشكال الصيام المتقطع, اللي بيساعد على توازن هرمونات الجسم لمستويات صحية, اللي بدورها بتعيد تنشيط آلية حرق الدهون الطبيعية في الجسم, وبينشط عملية ازالة السموم من الجسم بشكل طبيعي, وبيدي وقت للجهاز الهضمي لاصلاح نفسه, وبيغذي ميكروبيوم الامعاء السليمة, بيقلل الالتهاب المفرط, وبيحسن النوم.
والنظام الغذائي المقيد بالوقت يعتبر بيستغل فترة الاكل الطبيعية بالنهار, اللي الطبيعي بنستهلك فيها الجزء الاكبر من السعرات الحرارية وهو الوقت اللي بيكون فيه خلايا جسمنا وعقلنا في افضل حالاتها.
والدراسات اثبتت ان الاكل في وقت متأخر من الليل والنوم بعدها على طول ده ممكن يسبب ارتفاع في نسبة السكر في الدم لانه ضروري تحريك العضلات بعد الاكل عشان يتم سحب السكر الزيادة من مجرى الدم, ولو ده محصلش ارتفاع السكر في الدم ممكن يسبب تراكم الدهون على الكبد وهو يعتبر السبب الرئيسي لمعظم الامراض الخطيرة, عشان كده اكل الوجبات بدري خلال فترة النهار بيشجع حركة العضلات اللي بدورها بتساعد على ازالة نسبة السكر الزيادة من مجرى الدم.
والخبراء بيأكدوا ان النظام ده يعتبر مش نظام غذائي ولكن اسلوب حياة المفروض تعتمدي عليه على طول عشان تحافظي على وزنك وصحتك العامة.
ومتخصصين التغذية بينصحوا اي حد عايز يفقد وزنه انهم يمشوا على المقولة القديمة المعروفة “تناول فطارك مثل الملك, وتناول الغدا مثل الامير, والعشا مثل الفقير”.
وممكن يكون في اشخاص كتير طبيعة شغلهم او يومهم بيفرض عليهم انهم ياكلو في وقت متأخر, عشان كده بننصحهم انهم يختاروا وجبة الخضروات او السلطة تبقى بالليل وياكلوا الجزء الاكبر من السعرات الحرارية في وجبة الفطار والغدا لما يكونوا قادرين على معالجة السكر الزيادة في الدم بشكل افضل.
وعلى الرغم اننا من خلال النظام ده بنقول مش مهم نوعية الاكل قد التوقيت ولكن برغم من ده, الاطعمة المصنعة بتخلينا نحس بالجوع بسرعة, عشان كده الافضل تجنبها والاعتماد على الاطعمة الغنية بالالياف والبروتين والدهون الصحية, الاطعمة الطبيعية بتبقى غنية بالمواد الغذائية الرئيسية اللي بتدي الجسم فوائد صحية اضافية.
رد مع اقتباس
.