اجلبنك يليلي والوطن حزنان
لاظلت حضارة ولاسلم بستان
ثرواته جثيره والشعب جوعان
ياهو الي يجينه ايحطهن بجيبه
اجلبنك يليل ١٢ تجليبه
اجلبنك يليلي وبيتي بالايجار
من ناده الوطن ماجبت كومه اعذار
تشهدلي السواتر قاتلت الاشرار
حكك مايضيع وزلمك اتجيبه
اجلبنك يليل ١٢ تجليبه
اجلبنك يليلي وردنه بس تغير
وهناك التقينه بساحة التحرير
شبابك ياوطن مابيهم اي تقصير
رادو بس وطن يحظنهم بطيبه
اجلبنك يليلي ١٢ تجليبه
اجلبنك يليلي والوطن منهوب
لتكلي الحرامي بيوم راح يتوب
باكو كل نفطنه والشعب متعوب
من نسكت هضيمه واكبر مصيبه
اجلبنك يليل ١٢ تجليبه
اجلبنك يليلي اوسفه باعونه
مفتوحه الحدود وجتنه كورونا
بجفوف ومعقم هجي باكونه
وفوكاها اليموت ايجوز تسليبه
اجلبنك يليل ١٢ تجليبه
اجلبنك يليي والوضع موزين
عماله اشتغلت وماشفت تعين
اضل اليمته اعيشن لو طلب لودين
الحظر وسط الكلب طلعلي الف شيبه
اجلبنك يليل ١٢ تجليبه
الشاعر جبار العامري
رد مع اقتباس
