مساء الخير للجميع :100..
ابشع قصة سمعتها ومرت بحياتي هي هاي الراح احجيها الكم ..ماكتبتها بالفصيح حتى اكدر اوصل رساله لكل ام واب وطفل وشاب وشابه ولجميع الاعمار بلهجة الي توصل للعقل والقلب ..
قبل فترة جدا طويله واحدى سفراتي لبغداد ..زرنه احد اقاربنه ..ضيفونه احسن ضيافه واستقبلونه احسن استقبال ..بعدها اجت بنتهم ماشاء الله تبارك الرحمن كانها لعابه واللهكلش حلوه البنيه وصغيرونه مواليد 2000 بس بعيونها حزن كلش كبير وحسيت بالبنيه تريد تحجيلي بعد مصرنه اني وياها صديقات وصارت بيناتنه ضحك وسوالف وبوقتها البنيه تغير الجو عليها وكالتلي فدوه باتي عدنا اني واختي رادت نبات يمها جانت كلش فرحانه بينه بس مكدرنه نبقى بسبب الوقت ولازم نرجع للناصريه ..بالمناسبه اسم البنيه ساره طبعا ماكدر انطي الاسم الحقيقي ..اسم مستعار لكل الي راح اذكرهم بالقصه ..المهم ساره شوفتني جسمها بعد ماصريت عليها اني تحجيلي شنو سبب الزراق الي بايدها لان مبين مو مال واكعه ع شي مبينه البنيه متعرضه لضرب كلش قوي
وهي حيل ترفه وناعمه ونازكه مو مال احد يتعامل وي هيج انسانه بلطافتها وفطرة قلبها لو شمسويه واني اعرف مستحيل وحده مثلها تسوي شي يعصي الله ويعصي امر اهلها بنيه محترمه نفسها كلش..ساره طبعا ابوها وامها منفصلين ..وعايشه وي بيت جدها اهل ابوها من هي طفله ..تمتلك اخوان ثنين الولد اكبر منها اسمه علي والبنيه اصغر منها اسمها زينب ..ساره تدرس صف رابع حاليا لان تاخرت سنه ..واخيرا قبلت تحجيلي شنو سبب الكدمات بعد ماحجتلي عن حياتها العاديه ..كالتلي بيبي ضربتني لان اجيت شكيتلها الظلم الدااعاني منه ..كتلها اي ظلم تقصدين؟؟
جرت حسره طويله ونزلت دمعتها حسيت اني فتحت جروحها ..يارب شلون اسكتها شلون اغير الموضوع ماعرف اذا اكدر اساعدها ..كتلها اسفه خلص لتحجيلي ..باوعتلي بنظره مكسوره وكالتلي بلكت من احجيلج ارتاح ..هنا اني كعدت اسمعها بكل جوراحي ..
كالت جنت انام اني واختي بغرفتنا فوك ف اول مابلغت نمت بغرفتي بس ماقبلت انام وحدي اخاف خليت اختي وياي.
جان اول مره انام بيها وتعبانه احس اكو احد حط ايده ع شفايفي وسده حتى لااطلع صوت واصرخ..واحس الايد الثانيه تمشي ع جسمي بكل شهوه واني بلا حيله ولاقوه مديت ايدي لاختي استنجد بيها اختي هنا طلعت احقر من الي اغتصبني نزلت ومانادت لاحد ..واني بس دموعي ينزلن ومحد يسمع اهاتي وصريخي ..بس ادعي الله يجي احد يخلصني ..واني شفت وجه الي اغتصبني هنا ماكدرت احرك شي مني انصدمت بالي شفته ..الي اغتصبني هونفسه عمي لو اني غلطانه ..عمها شاب مواليد 95..مزوج ومطلك بسبب البنات ..نسونجي بين قوسين..حتى بنت اخوه مسلمت منه..راحت شكت لجدها بلكت يسمعها وينقذها من ابنها..جان الرد يصدم يكلها صوريلي جسمج واني اخلي ابني مايتحرش بيج*_*
هنا نهارت منو بعد يصدكها منو يصدك جدها هيج حجه وراد منها هالشي منو يصدك بيها عمها اغتصبها..راحت لعمتها لان هي اقرب شخص الها..
وجان الرد فضيع..كلتلها صدك متسحتين هاي تربيت امج ..هنا بوقتها ساره تمنت ماراحت لعمتها وتستنجد بيها...
حتى لو حجت لابوها ميصدكها..سكتت ساره وصبرت وطلبت الصبر والنجاة من الله..كام يتكرر هالشي وياها اخوها علي شاف وسكت وجانت املها باخوها ينقذها بس يخاف منهم بقى ساكت..مكدرت تتحمل بعد املها الاخير بزوجة ابوها ..راحت وحجتلها بس جانت خايبة الامل لان هي متحب زوجه ابوها مع انو زوجة ابوها انسانه راقيه جدا ..المهم سولفتلها الصار ف اول بدايه مصدكتها بس بعدين لا ثبتلها هالشي حقيقي ..كيف؟؟ساره كاعد تسولف هي وزجة ابوها ع الصار وياها اختها زينب سمعت كل الحديث ونقلته مثل ماهو لجدتها الي هي تصيحلها ماما لان مربيتها .زجدتها انسانه متخاف الله ..لمن رجعت ساره لبيت جدها ضربتها اشد انواع الضرب (ب البوري الحديد)تخيل تنضرب بحديد شيصير بيك ؟؟
وهي بنيه ترفه ..يعني متلاحكينها وماخذيها قبل لتموت بادين المتخاف من الله..رجعت لزوجة ابوها وابوها بالشقه بس ابوها ممصدك بيها وبطلها من المدرسه وعاقبها ..بس زوجة ابوها وكفت وياها وصدكتها وصارتلها مثل امها وكدرت تقنع زوجها انو ساره كل الي حجته صحيح انت عايش وي اهلك بس مخدوع بيهم ..اذا مصدك روح اسال ابنك رح يحجيلك كلشي..فعلا سال ابنه ونصدم بالجواب لكن ليش مكتلي .؟جان مهدد بدراسته ايضا من قبل جدته وجده ..هنا الوالد فكر ياخذ اولاده يسكنهم عنده بعد سماع القصص البشعه الي بيت اهله ..بس ماباليد حيله يبقون اهله..ورا فترة عمها اتعرض لحادث سيارة وصل للموت جان هذا عقاب من الله اله ...لان انظلمت وماوكف احد وياها غير الله وزوجة ابوها ..وحاليا ساره رجعت الدراستها والحمد لله وعايشه وي ابوها وزوجته ..ومنتظره الفرح يمر بيها ..
لهنا تنتهي قصتنا وي ساره اتمنى كدرت اوصل رسالة ساره الكم ..وهي انو تنتبهون لاقرب ناسكم ونواياهم وتنتبهون ع اطفالكم بناتكم واولادكم ..ولاتعيشون طفل بدون ام واب مارح تعرفون شنو ممكن يتعرضوله ..وشكرا لكل من سمعني ...
دمتم بخير
رد مع اقتباس
المشاركة الأصلية كتبت بواسطة خـلِـٰٚــگ تِــرفــة
