وجوب .. اللطف !! ( ٤ )
-يكولون : إنّ حكمة اللّه تعالى وجوده وكرمه تقتضي منه اللطف بالعباد ؛ مادام الله حكيما وجوادا وكريما فيجب أن يلطف بعباده ؛ لانو هو هذا المرجو ممن يحمل هاي الصفات ..
-شنو الدليل على انو اللطف واجب على الله ؟
-الدليل هو كالآتي : هدف الله تعالى من تكليف العباد هو أن يبلغوا الكمال عن طريق فعل الطاعة وترك المعصية ؛ يعني الله فرض التكاليف على الناس علمود هدف معين ، مو هيج كوترة ، وهذا الهدف هو بلوغ أقصى درجات الكمال ، واضح أبو الشباب ؟
-مو واضح ؟!
- يعني إذا كان اكو شيء يؤدّي فعله إلى أن يختار المكلَّف فعل الطاعة ويترك فعل المعصية ، وأن يكون المكلَّف أقرب إلى فعل الطاعة وأبعد عن فعل المعصية ، فإنّ الحكمة الإلهية تقتضي فعل ذلك الشيء ، يعني لازم الله سبحانه وتعالى أن يفعل هذا الشي ..
-وليش لازم الله يفعل هذا الشي ؟
-لأنّو عدم فعل الله لهذا الشي راح يستلزم نقض الغرض من تكليف العباد ، ونقض الغرض قبيح ومناف للحكمة ، واللّه تعالى منزّه عن ذلك ، فنستنتج بأنّ الحكمة الإلهية تقتضي فعل اللطف ..
- شلون يعني ، ماجاي افتهم ؟!
- شوف : إذا انت عزمت صاحبك على عشه ببيتك ، وجان هدفك من هاي العزيمة هو أن يجيك صاحبك لبيتك ، وانت تدري بأنّو صاحبك مايكدر يجيك الا اذا دزيتله سيارة تنقله ، فهنا انت إذا مادزيتله سيارة تنقله فأكيد ماراح يجي ، فعدم ارسالك لسيارة تنقل صاحبك وتجيبه لبيتك راح يكون متناقض وي هدفك اللي هوه قدوم صاحبك لبيتك ، واضح ليهنا ؟
-جدا واضح ..
-ممتاز ، فالله سبحانه وتعالى عنده هدف معين وهو "وصول الإنسان إلى أعلى درجات الكمال" ، والله يدري انو الإنسان مايكدر يوصل لهذا المقام الا اذا لطف الله بيه ، فهنا اذا الله مالطف بالإنسان فراح يتناقض الله وي هدفه ، والله حكيم ، والحكيم افعاله منسجمة مو متناقضة ، فعدم فعل اللطف يكون مخالف لحكمة الله ، وهذا الشي قبيح عقلا ، والله منزه عن كل قبيح ..
-حلو كلش ؛ بس السؤال إللي يطرح نفسه ويتمرغل بالكاع هو : هذا اللطف هل من جهة عدل الله أو من جهة جوده وكرمه ؟
- مو واضح سؤالك ؟!
- قصدي : هل انو الله يلطف بينه لانو عادل ، وعدله يقتضي اللطف بالناس بحيث إذا مالطف بينه راح يكون الله ظالم ؟!
-ها هسه افتهمت سؤالك : شوف عيني ، أنّ وجوب اللطف على اللّه تعالى يكون من جهة اقتضاء جوده وكرمه ، يعني السبب اللي يخلي الله يلطف بينه هو كونه جوادا وكريما ، واللطف هو من أفعال الكرماء ؛ يعني حتى لو لم يلطف الله بينه فماراح يكون ظالم ، بل كل ما هنالك راح يكون عدم اللطف منافي للجودوالكرم الالهي ..
والحمد لله ..
قاعدة اللطف الحلقة الرابعة
رد مع اقتباس
المشاركة الأصلية كتبت بواسطة MiSsO
