مع تفشي فيروس كورونا في كل انحاء العالم ، فافضل حاجة ممكن تعمليها انك تعزلي نفسك بعيد عن التجمعات ، وبالتالي ده خلى اشخاص كتير يغيروا من نمط حياتهم عشان يقدروا يحموا نفسهم من الفيروس ، زي غسل الايدين باستمرار, استخدام مطهر الايد, والعزل, ولكن بالاضافة للحاجات دي ، اجراءات العناية بالجمال مهمة بنفس المقدار عشان نقدر نحمي نفسنا من الاصابة بالفيروس ، والنهاردة هنقولك نصايح جمالية للحماية من فيروس كورونا.
نصايح جمالية للحماية من فيروس كورونا:
1- خلي معقم الايدين في شنطتك باستمرار:
لو كان في بعض الاشخاص مطهر الايدين بيبقى موجود معاهم من قبل انتشار فيروس كورونا ، دلوقتي دي بقت عادة اجبارية على كل الناس لازم يعملوها ، مهم جدا يبقى معاكي مطهر في شنطتك ، لانه من اهم فوايد مطهر الايدين هو استخدامه في حالة عدم توفر المية والصابون ، المطهرات اللي بتحتوي على نسبة عالية من الكحول (اكتر من 70%) بتساعد في قتل الجراثيم والبكتيريا.
نصايح جمالية للحماية من فيروس كورونا
2- نضفي فرش المكياج بتاعتك:
المفروض ان العادة دي اي بنت لازم تعملها طول الوقت بغض النظر عن وجود فيروس او لا ، فرش المكياج اللي مش نضيفة هي مكان خصب لتكاثر الجراثيم والبكتيريا ، لازم تغسلي فرش المكياج كل اسبوع لتجنب الاصابة بالعدوى.
3- متغمسيش صوابعك في الكريمات:
اكيد كلنا لما بنيجي ناخد كريم بنغمس صوباعنا جوه العلبة وده امر طبيعي ، ولكن مع الوضع اللي احنا بنعيشه دلوقتي ، الافضل استخدام اي اداة تانية غير صوابعك ، لان استخدام الصوابع ممكن يلوث الكريم ويخليه ارض خصبة لتكاثر الجراثيم ، ولو عايزة طريقة عشان تطلعي بيها الكريم ممكن تستخدمي معلقة.
4- متشاركيش مكياجك:
دي نقطة تانية المفروض نعملها طول الوقت مش بس وقت الفيروس ، اتجنبي مشاركة مكياجك بشكل عام مع اي شخص من اصحابك او اي حد نهائي لانه ده ممكن يأدي لالتهابات على البشرة ، المشاركة دي قاعدة المفروض انها متطبقش على المكياج ابدا.
5- اتجنبي اختبار المكياج:
لو رايحة تشتري مكياج جديد سواء قلم روج او اي مستحضر تاني ، متجربيهوش من عينات التجربة اللي بتبقى موجودة في المحل ، لان ده مش وقته خالص انك تعملي كده ، تخيلي ان مشاركتك مكياجك مع اصحابك ممكن تبقى غير صحية ، فأكيد عينات التجربة هتكون اكتر خطورة ، لان جربها قبلك اشخاص كتير جدا ، فاكيد ده مش الوقت المناسب ابدا لاختبار المكياج في المحل.
6- نضفي ضوافرك:
عملية تنضيف تحت الضوافر ممكن يكون في اشخاص كتير بيهملوها ، وزي ما غسل الايدين بانتظام بيمنع من الاصابة بالعدوى ، لازم تحطي في اعتبارك ان الجراثيم بتتجمع تحت الضوافر كمان ، عشان كده لازم تتأكدي من فرك تحت الضوافر بالكامل ، او تقصي ضوافرك وتخليها قصيرة عشان تقدري تتحكمي في الموضوع اكتر.
رد مع اقتباس
