ديكارت .. والوجود !!
-قسم الفيلسوف "ديكارت" الوجود إلى قسمين : امتداد وفكر ، أو روح وجسد ، أو عقل ومادة ، شتريد تسميهه سميهه ..
-يقصد ديكارت بالامتداد الجسم أو المادة ، ويقصد بالفكر الروح أو العقل ، مو صحيح ؟
-نعم صحيح ، والروح عند ديكارت تختلف تماما عن الجسم ؛ يعني الروح من عالم والجسم من عالم آخر تماما ، الروح جوهر مستقل بنفسه والجسم جوهر آخر مستقل بنفسه ؛ يعني بالعربي ماكو وجه شبه بين الاثنين ابدأ..
-زين ، إذا الروح من عالم والجسم من عالم آخر ، وماكو اي شبه بين الروح والجسم ، جاشلون جاي نلاحظ اكو تفاعل بين الروح والجسم أو بين العقل والجسم ؛ يعني مثلا اذا تعور الجسم راح تتألم الروح ، وإذا خافت الروح مثلا فراح يصفر الجسم ويكوم يخذف ، فشنو سبب هذا التفاعل الواضح إذا جان ماكو اي وجه شبه بين الروح والجسم مثلما يكول حجي "ديكارت" ؟
-خوش سؤال ، "ديكارت"يكول : اكو شي بداخل دماغ الإنسان هو اللي يربط بين الروح والجسم وبالتالي يؤدي إلى هذا التفاعل اللي جاي نشوفه ، وهذا الشي هو "الغدة الصنوبرية" ، سامع بيهه ؟
-اي اي اعرفهه كمل ..
-خوش ، هاي الغدة تاخذ اوامرهه من الروح وتنطيهه للأعصاب والعضلات ، يعني الغدة تكول للأعصاب والعضلات : الروح تريد منكم ان تتحركون مثلا ، هنا الاعصاب والعضلات يكولون : سمعا وطاعة ويبدؤون بالتحرك ، بالك يمي ؟
-اي نعم بالي يمك ..
-وكذلك هاي الغدة تستقبل الآثار الجاية من الحواس الخمسة وتوصلهه للروح وبالتالي تبدأ الروح بالتفاعل مع هاي الآثار ؛ يعني مثلا ، العين تشوف منظر مؤلم وحزين ، تقوم الغدة بإيصال هذا الشي إلى الروح ، فتبدأ الروح بالشعور بالحزن وهكذا ، إذن ديكارت يفسر سبب التفاعل بين الروح والجسم بوجود هاي الغدة اللي تعتبر حلقة وصل بين الروح والجسم ..
والحمد لله ..
رد مع اقتباس
المشاركة الأصلية كتبت بواسطة ПộR
