بغض النظر عن مدى اهتمامك بصحتك ، احيانا بيجي عليكي وقت تستسلمي وتضعفي للرغبة الشديدة في اكل الاطعمة الغير صحية زي الحلويات, البطاطس المقلية, البرجر, والبيتزا ، والاكلات دي كلها مليانة بالدهون المتحولة والدهون المشبعة ، اللي بتسبب زيادة الوزن ، ورفع مستويات الكوليسترول وضغط الدم ، وبتزود من خطر الاصابة بمرض السكر من النوع التاني وامراض القلب ، وبالتالي مهم جدا عدم الافراط في اكل الاطعمة السريعة والمقلية ، ولكن مع ذلك لو اكتشفتي انك اكلتي كمية كبيرة من الاطعمة الدهنية او اللي فيها زيوت كتير ، في بعض الحاجات اللي ممكن تمشي عليها لتقليل الاثار الضارة الى حد ما ، وده اللي هنعرفه من خلال السطور الجاية هنقولك 7 طرق لتقليل تأثير الاطعمة الدهنية.
طرق لتقليل تأثير الاطعمة الدهنية:
1- اشربي مية فاترة:
شرب المية الدافية بعد اكل طعام دهني بيساعد على تهدئة وتنشيط الجهاز الهضمي ، المية وظيفتها بتكون كحاملة للمغذيات ، وشرب المية السخنة بتساعد على تكسير العناصر الغذائية في شكلها القابل للهضم ، ولو مشربتيش كمية مية كفاية ، الامعاء الدقيقة بتبدأ تمتص المية الطعام لعملية الهضم ، وده بيأدي للجفاف والامساك.
طرق لتقليل تأثير الاطعمة الدهنية
2- اشربي ديتوكس للتخلص من السموم:
مشروبات الديتوكس بتساعد على التخلص من السموم اللي بيتراكم في جسمك بعد اكل اطعمة دهنية ، وكتير من الدراسات اثبتت ان مشروبات الديتوكس بتساعد على ازالة السموم من الجسم وتخسيس الوزن ، وفي بعض الدراسات اللي اتعملت على مجموعة من النساء الكوريات اثبتت ان شرب عصير الليمون او اتباع نظام غذائي بالليمون لازالة السموم بيقلل من الدهون في الجسم وبيحسن من مقاومة الانسولين ، تقدري تجربي اي وصفة ديتوكس لازالة السموم من الجسم ، عشان تساعدك انك تحسي بشعور افضل بعد اكل الاطعمة الدهنية.
3- اتمشي:
المشي لمدة 30 دقيقة بعد اكل وجبة تقيلة او دسمة بيساعد في تحسين عملية الهضم ، بيحسن حركة المعدة وبيخليها تشتغل بشكل افضل ، بيساعد على الهضم ، وممكن انه يساعد كمان على فقدان الوزن ، عشان كده بننصحك تتمشي لمدة 30 دقيقة بعد اكل الاطعمة الدهنية عشان جسمك يحس براحة.
4- خططي لوجبتك اللي بعد كده:
التخطيط لوجباتك مقدما هيساعدك انك تتجنبي اكل الاطعمة السريعة والدهنية ، ومتفوتيش وجبة الفطار ، وجبة الفطار مهمة وصحية لانها بتحافظ على طاقة الجسم طول اليوم ، دخلي الخضار والحبوب الكاملة في نظامك الغذائي ، حافظي على رطوبة جسمك من خلال شرب كمية كافية من المية والعصاير الفريش ، وكلي عشا خفيف.
5- تناول البروبيوتيك:
تناول البروبيوتيك بانتظام بيساعد على توازن صحة الجهاز الهضمي وبيحسن الامعاء والمناعة ، ممكن تشربي كوباية من اللبن الرايب او الزبادي ، ودخلي الاطعمة المخمرة في نظامك الغذائي لتقوية امعائك بعد اكل الاطعمة الدهنية.
6- كلي فاكهة وخضروات اكتر:
اكل الفاكهة والخضروات بيساعد على توفير الفيتامينات والمعادن والالياف اللي محتاجها جسمك عشان يقوم بكل وظايفه ، واكل الاطعمة الدهنية الخالية من الالياف والمغذيات الاساسية والدهون المشبعة والمتحولة ممكن تأدي للامساك ، حاولي تاكلي طبق من الفاكهة مع المكسرات والبذور كوجبة خفيفة في نص اليوم ، ابدأي دايما وجبتك بطبق سلطة من الخضروات الطازة عشان تمدي جسمك بالمواد الغذائية الاساسية.
7- نامي كويس:
النوم بيساعد على تحسين المزاج وبيريح العقل والجسم والروح ، عشان كده ضروري تنامي كفاية واتجنبي الرغبة في الاكل اللي بيكون ناتج عن ضغط او اجهاد او توتر.
ايه اللي المفروض تتجنبي تعمليه بعد اكل الاطعمة الدهنية:
1- اتجنبي اكل الاطعمة الباردة:
اكل الاطعمة الباردة ، زي الايس كريم, بعد اكل الاطعمة الدهنية ليه اثار ضارة على الكبد والمعدة والامعاء ، وبيكون صعب هضم الطعام الدهني لو اكلتي بعده طعام بارد بيخلي عملية الهضم صعبة ، وممكن تعاني من الانتفاخ وعسر الهضم ، عشن كده اتجنبي خالص اكل الاطعمة الباردة بعد الوجبات الثقيلة والدسمة.
2- متناميش بعد الاكل على طول:
متروحيش ابدا تنامي على طول بعد اكل وجبة ثقيلة ، خلي دايما في وقت العشا والنوم وقت ميقلش عن 2 – 3 ساعات ، لان النوم بعد الاكل على طول بيخلي من الصعب هضم الطعام ، وده هيأدي للانتفاخ ، وزيادة تراكم الدهون في الجسم.
في النهاية بننصحك بالحذر في اختيار نوع الاكل والتحكم في كمية الاكل ، وامشي على النصايح اللي قولناها بعد اكل الاطعمة الدهنية لانها تعتبر المفتاح للحفاظ على صحة كويسة ، ممكن تاكلي وجبة دسمة او دهنية مرة واحدة في الاسبوع لاشباغ رغبتك ، وكلي وجبات صحية متوازنة باقي ايام الاسبوع.
رد مع اقتباس