حرية الفعل الإنساني .. عند هيوم !!
-هواي ناس يعتقدون انو الحرية الإنسانية تتمثل في القدرة على القيام بأفعال معينة بناء على الإرادة الحرة ، وهاي الإرادة الحرة هي الإرادة العقلانية اللي تؤدي إلى سلوك عقلاني سليم متفق مع قواعد العقل ؛ يعني الإنسان ارادته جايه من العقل والتفكير المنطقي العقلي ، وبالتالي هذا الإنسان يكدر يفعل اي شيء يريده ، ويكدر يترك اي شيء مايريده ، وفق مايمليه عليه عقله فقط وفقط ، واضح ؟
-واضح ..
-لكن هيوم ينظر إلى الحرية الإنسانية نظرة أخرى تختلف عن نظرة اغلب الناس ..
- شلون ؟
-ينظر هيوم إلى الحرية الإنسانية على أنها صادرة عن إمكانية تغيير الإنسان لسلوكه بناء على رغباته وأهدافه ..
-مو واضح ؟!
-يعني الحرية الإنسانية عند هيوم ليست نابعة من العقل والمنطق ، بل نابعة من الطبيعة الانفعالية والعاطفية المتغيرة للبشر ، واضح ؟
-لاوالله مو واضح ، احجيلك الصدك غير ؟!
-شوف ابو الشباب : هيوم يكول : الإنسان عنده حرية إرادة مو ماعنده ؛ ولكن مصدر هاي الحرية مو العقل ، وإنما مصدر هاي الحرية هو طبيعة الإنسان المتقلبة والمتغيرة ، هاي الطبيعة المتقلبة والمتغيرة هي اللي تخلي افعال الإنسان متغيرة ومتقلبة فنتصورهه نابعة من حرية حقيقية عقلية ..
-اها ، هسه فهمتك ، قصدك انو هاي الأفعال المتنوعة اللي جاي يسوونهه البشر ، هاي الأفعال متنوعة مو لانو الإنسان يفكر بعقله ويختار يومية فعل معين ؛ لا ، هاي الأفعال متنوعة لأن طبيعة الإنسان متقلبة ومتغيرة ، وبالتالي تجي الأفعال وفق هاي الطبيعة متنوعة ومتغيرة ، وليس وفق العقل ، صحيح ؟
-احسنت ، صحيح جدا ..
-زين ، ليش هيوم يعتقد انو العقل لا يمكن أن يكون مصدراً للحرية ؟
-لانو العقل واحد عند جميع البشر ، وبالتالي نتائجه واحدة أيضا ؛ يعني اذا جميع الناس اتبعوا العقل فراح تجي نتائج واحدة من هذا الاتباع ، هاي النتائج راح ترضي ناس وماترضي ناس آخرين ، والبشر يفضلون عواطفهم واهواءهم على عقولهم إذا جانت ماتخدمهم ، وبالتالي ماراح يشعر الناس بالحرية عند اتباع العقل ، وبدلا عن ذلك يقدمون العاطفة والأهواء على العقل حتى يشعرون انهم احرار في ما يفعلون ..
والحمد لله ..
رد مع اقتباس
المشاركة الأصلية كتبت بواسطة Suzana
