TODAY - October 06, 2010
آني نجحت.. تعالوا بـــاركولي!
طبعا احب انوّه تنويه مهم.. أشكر شكر جزيل جم كثير الاخ والصديق العزيز سامر اللي ساعدني في تصغير الصور وتحميلها.. سامر اني ممنونة هواية منك يـــــا وردة وعطر فواح
هذي مجموعة صور الشهر الاخير من السنة الدراسية الاولى
احنة بدينا نحضر للامتحان قبل شهر
طلعاً اني تمريض سنة اولى ونحجت للثاني واني فرحانة هواية لان جبت نتيجة مرضية والحمد لله بس تعبت هواية أُقسم اني مشفت النوم كنت انام واني كاعدة من التعب.. الحمد لله انتهت.. دراستنة هواية حلوة اللي حلو بيها بعد على طول الدراسة انت تمارس دراستك بالمستشفى وتكتسب خبرة وتبقى كل متاخذ معدل عالي المطلوب يحقلك تصعد يعني احنة مسموح النة ندرس طب اذا كملنا دراسة بمعدل عالي وخبرة كافية.
الامتحان عبارة عن تصاميم مشتركة احنة نشتغلهة وشغلنة دائماً كروبات بالدنماركي samarbejder بالانكليزيcooperate .. الفكرة شنو؟
تنقسم الشعبة الى كروبات طبعا الاساتذة يقسمونا كروب A ,B, C ,D الخ الاساتذة مجتمعين يخلون الاسئلة بعدّة ظروف كل كروب يتفق وياخذ الظرف اللي يريده طبعا كل ظرف لون
بداخل هذا الظرف قصة مريض يعاني من مرض نفسي وعضوي او امراض العمر المزمنة او الشيخوخة اللي هي عدة امراض بضمنهة الزهايمر والديمنت
الخ
ناخذ القصة اللي تخص كروبنا ونطبعها على عددنا ونشتغل عليها بالاتفاق
يعني
طالب ياخذ المشاكل اللي يعاني منهة المريض
طالب ياخذ الواجبات اللي يقوم بها اخصائي التمريض
طالب ياخذ الحلول اللي يقدمهة للمريض وكيف؟
طالب ياخذ المعلومات.. لان انت لما راح تشرح حالة المريض مطلوب من عندك معلومات علمية وطبية ونظريات
مثلا
نظرية ايريك
نظرية ماسلو
مؤشر كتلة الجسم
اسلوب او نمط الحياة
الغذاء و تغذية
الرياضة
القلب والاوعية
والدورة الدموية
الجهاز الهضمي
وهواية مصطلحات
وكثير من الاختصارات والنظريات وماذا تعني
هنا احنة في المختبر على ميز العمل مجتمعين ندرس المشكلة
________________
طبعاً هذي "الخنزيرة" احنة نسميهة بالعراقي قاصة اسمهة grisespar
هذي موجودة بكل شعبة .. اخاف يرن موبيل احد الطلاب يروح بدون مناقشة ولا اي كلام يخلي 5 كرون بالقاصة لان ممنوع فتح الموبيلات خلال المحاضرة .. بس بعدين وبكل مناسبة يفتحوهة ويخلون فوكاها ويشترون بيها معجنات النة وقهوة
هذي استاذتنا اسمهة Annemette ,هنا تريد تعد الفلوس اللي بالقاصة
الاستاذة Annemette
هنا بديت بالتصاميم
.هنا بدينة نسوي التصاميم كل طالب يسوي التصاميم المشتركة والموضوع اللي اخذه من المشكلة واللي قسمناه مسبقاً
هذا التصميم اسمه T model هنا نعرض مشكلة المريض والاشياء اللي يستطيع القيام بها
حقل اسمه belastning والثاني اسمه Ressource
يعني حقل نكتب بيه معاناة المريض والثاني مقدرة المريض ومايستطيع القيام به
هذا ورق التصاميم
حتى اشرح عنه بالامتحان.هنا بديت اصمم ال Ressource
.سويته عبارة عن اوراق خضراء وكل ورقة تحتوي على جملة
______________________________________
Ressource تعني المصدر او المورد هنا تجي مايستطيع قيام المريض به ولهذا اختاريت هذ الالوان لانها لازالت تعمل عند المريض وغير متوقفة
على فكرة التصميم انت حر باختياره
هنا وضحتها بالالون
هنا عددتهم شنو الاشياء اللي المريض يستطيع القيام بها اي يستعين بنفسه
نفس الصورة تقريباً هذا ورق مسود حتى آخذ منه المفيد لان اني اشتغل عليه قبل التصميم
.هذا التصميم الثاني اللي هو نسميه و SSH Opgaver و Løsninger
يعني الواجبات المفروض يقوم بيها اخصائي التمريض والحلول اللي ممكن يقدمها
T model.هنا نفس التصميم بس دااكتب من الورقة المسودة
على فكرة هذا التصميم الاول تعبت عليه هواية وطلع هواية حلو وبعدين مكدرت اقسم المسافات صحيح
هذا الورقة اللي عاتصميم هرم ماسلو لان لازم نطبق نظرية ماسلو عالمريض
ان شاء الله انزل موضوع بهذا الخصوص
هذا تصميمي الجديد اللي قسّمته صحيح وغيرت الوانه
.على فكرة اختاريت هذه الالوان الصيفية اللي تدل على الفرح والامل لانها حلول للمشكلة
. هنا تصميمي الشخصي اللي يعتمد عليه الامتحان يعني الدرجة الاكبر تعتمد على التصميم الشخصي وهو كل طالب يختار من الموضوع نختار شي معين من ضمن مشكلة المريض يعني يخص القصة ويسوي عليهة تصميم خاص ماله علاقة بالكرويتكلم عنه لوحده خلال خمس دقائق
.اني اختاريت مرض يعاني منه المريض وهو الشعور بالوحدة وحاجته الى العلاقات الاجتماعية وطبعا لازم تربطه بنظرية ماسلو
وما معناها وماهو هرم الحاجات وما معنى كل جزء من اجزاء الهرم وبالتالي اوصل الى قسم الـ
Socialt netværk
بالانكليزي
network
واتكلم عنه وعلاقة المريض بيه وخلال خمس دقائق
هنا تقريبا كمل التصميم
..
هنا مشكلة المريض الاساسية
وعلاقتها بهرم ماسلو هنا شوية صار عندي خطأ بالقياس لما سويت خطوط الهرم
.هذا نفس التصميم والكلام عن معاناة المرض وشعورة بالوحدة لان حسب نظرية ماسلو الوحدة تؤدي للوفاة
.هنا الخطوط النهائية تقريبا لان لازم آخذ رأي الاستاذ قبل الامتحان
أوووو هنا الساعة 11و 45 دقيقة يعني وقت الغدا
هذا الغدا مالتي
هنا دا ادرس واسوي بحث عن موضوع بالنت
هنا التصاميم 3 كاملة
.هذي عالسبورة الجدول لان كل طالب اول لما يدخل الشعبة وعندة اسئلة معينة يسأل الاستاذ يكتب الوقت اللي يريده عالجدول ولما يجي الاستاذ يشوف الوقت والاسم فـ ينادي عالطالب ويشوف شنو السؤال اللي عنده
جنطتي حلوة مو خخخخ
.هذولي اثنين من الاساتذة اللي بـ لجنة الامتحان هذي استاذتي Annemette والثاني من الوزارة مااعرفهة اسمهة Inge وهذي الساعة اللي عالميز بيهة توقيت لان لازم تتكلم عن الموضوع اللي اختاريته خلال خمس دقائق واذا يدك الجرس ميحقله تكمل
هنا بعد الامتحان التقينا فطور جماعي طلاب وأساتذة
هنا استاذة Solveig صارت تقرا اسم اسم من الطلاب واجتهادة خلال السنة وتشكره
هنا Solveig وهي تتكلم عن الطلبة صارت تبجي و Annemette سدت عينهة قوي لان متريد تبجي بقت مسيطرة بس هي بجت قليل ..لان احنة فعلا تعبنا الدراسة هوااااية صعبة
هنا احنة كنا هم نبجي بس صرنة نلطف الجو حتى يتغير كمنة نكول نكت ونتذكر اشياء قديمة بالشعبة ونضحك
هنا كملت اسماءنا والحقيقة هي تعبت هواية فـ كلنا الهة تعالي اكلي
هنا استاذة Solveigهدت باقة ورد للاستاذة Annemette
Annemette لازمة الهدية
هنا ثنيناتهم وكفوا حتى ناخذلهم صورة
هنا Annemette دَتْعَبّرعن رايها بينا الطلاب
هنا Annemette قدمت هدية لـ Solveig عبارة عن عقد و Solveig شكرتهة
هنا Annemette جتي بحذاء جديد حلو واحنة كلنة صرنة نصفق ونبدي اعجابنة بالحذاء وهذي الاستاذة Anna طبعاً هذي بولندية الاصل كانت تبدي اعجابهة بالحذاء خخخ
هذا رفيقي في النضال
هذه الشعبة اللي ندرس بيهة العملي المختبر
هذولي Solveig , Mette والل وراها موظفة بلادارة فلبينية اسمهة Mae
هذولي Annemette والسكرتيرة اللي بالادارة وهذولي اساتذة همة استاذ Lars, Peter
هذولي الاساتذة Mariana , Lars, Peter
هنا الطلاب يجون من مخلتلف الشعب يدرسون بالمختبر وطبعا المغتربين تشوفهم اكثر شي يدرسون لان الدنماركيين مسيطرين اكثر من عدنة ..
هذي احدى مشكلات المريض نبدي بيهة وبعدين نسوي التصميم عليه ونكدر نسويهة على بلاستيك ونخليهة على جهاز يعكس الصورة عالحايط ونشرح عنه الطالب مُخير شنو يسوي التصميم النوعين او واحد بس كل ما تنتعني وتسوي شي افضل يفيد الدرجة
.هنا ضمن دراستنة خلال العام عدنة بالمختبر هذي الاشياء وكل امور المvيض حتى العكازة
المختبر
هنا كنا بالشعبة والدنيا مطرت مطر قوي وطلع قوس قزح وكل الطلبة صرنة نصور
.هذا اليوم كانت الدنيا مغيمة هواية ولو هي دائما غيم
هذولي الاستاذات Mette, Anna
هنا الشباب يلعبون طوبة بالفرصة .طبعا هذولي الشباب ماكو هيجي هوسة مسوين بالشعبة على فكرة عدنة هواية شباب يدرسون تمريض مو بس بنات
فترة الغدا والاستراحة نطلع نقرا وناكل ونحجي
الكافتريا
هاي اني دا اصور من فوك
هذي صديقتي Lese نص دنماركي ونص عراقي ابوها عراقي مسيحي من الموصل وامها دنماركية كتلهة راح اخلي صورتج عالنت خخخراح ادزلهة اللنك
هنا الادارة لما انتهينا من الامتحان اخذنة صورة جماعية وكل طالب يروح ياخذ ظرف من الادارة ويخلي بيه 25 كرون وهمة يرسلوا الصورة بالبريد.. طبعاً اخذنا احنة كل الطلبة صورة جماعية وية الاساتذة
الكافتريا العام
على فكرة هذي الصور اخذتهم بدون فلاش لان كنا طالعين سفرة للقلعة وممنوع نستخدم فلاش ونسيته مطفيان شاء الله انزل الكم صور القلعة اللي رحنا الهة عمرهة 600 سنة
اتمنى ان تكون عجبتكم الجولة وياية وية معاناة الدراسة بس هي متعبة وحلوة ولو هواية صور مكدرت اخليهة لان اني موجودة بيهة
المشاركة الأصلية كتبت بواسطة Gardenia
