قصيدة وين انته........................ للشاعر المرحوم كامل العامري
ثكل رمش عينه وكال وين انته؟
خلص تقويم عمرك .........
والفرح لساع ماشفته
غزاك الشيب ..
يمليل نهار ألكاس..
ياشلال المحاجي المحد يسكته
اشوفك منحني اعله الكاع
مثل السنبله الميته
يقاسم كوم رده ويارعد سكته
جتلني وكام يتنشد علي هساع وين انته ؟
يمنجل حاجبك حش بخضار اسنين
عود اصباي كصكصته
شلك عندي وتناشدني
لعبت اثلاث انه ابدنياي
ييزي العب باب العب قفلته
على ثيابك نفضت اشياش عمري عطور
وانته اكزازهن بضلوعي كسرته
لجن مايوم شحت طيبتي اعله للناس
كبل جرحي لعد جرح اليصيب الغير ضمدته
انه نهر القوافي الماتلمه جروف
اذا حمل القصيده يميل عدلته
لمن اكتب على حيله العروض ايكوم
كبل ماشيل شوفي عليه وازنته
انه اخيال البيان المايجي عله البال
انه الرسام والتشبيه صورته
انه خد البديع بجفي زوكته
انه بيت المعاني بضلعي سكفته
انه العلم القواعد..
مبدأ الأعراب علمته
انه الكل شاردات الكول ماهميت
ولو ضل (سيبويه) أيفكر (ابحته)
وأذا بعدك تواكحني وترد اتكول وين انته
انه الداود بيد الناي صنعته
وانه القيثار بابل أي وحك الصوت دوزنته
وانه الزرياب أول نغم لحنته
امسودن مستحاي ومايكضني أحساب
انه المجنون ليله جنون جملته
انه الفانوس تعتازه الجفوف بليل
لو صكت سماهه والوكت شته
كل هذا وبعد تنشد علي وتكول وين انته؟
خيالك لو يفز مرعوب نص الليل أمنته
يبو مهد الدلال ..
أبسعف هاي الروح مرجحته
وأذا جان الحمورابي أبمسلته أحكام
انه كبل المسله العشك شرعته
واذا بنت العنب صارت نديم الكاس
انه كبل العنب للكاس نادمته
ثكل بلم الذنوب ومارهمله شراع
عصيت وماتبت وبلم ركسته
يبو حلو الذنوب ارجوك عف عني
مثل ما عفن الكاسات عني وليلهن عفته
وانه انخاكم ياعشاك الشعر يحباب
يل بيكم شبابي اليوم رجعته
اريدن تنشعل شمعه ابمكاني اتنور
اذا كلبي سكت والعمر فاركته
رد مع اقتباس
