كل البنات بيحبوا البرفيوم واكيد كل بنت بيكون ليها ذوقها الخاص فيه, طيب لو قولنالك النهاردة انك تقدري تعملي البرفيوم بتاعك بنفسك, ياللا نعرف مع بعض طريقة عمل البرفيوم في البيت بخطوات بسيطة وبمكونات سهلة ومش مكلفة.
طريقة عمل البرفيوم في البيت:
الحاجات اللي هتحتاجيها:
– 15 مل من زيت الجوجوبا او زيت اللوز الحلو.
– 75 مل كحول.
– 2 معلقة كبيرة مية مقطرة “من الصيدلية” (اتجنبي مية الحنفية العادية).
– فلتر قهوة او قمع هيقوم بالمهمة.
– ازازة زجاج لونها غامق.
– 25 نقطة زيوت عطرية متقسمين ما بين انواع الزيوت المختلفة.
7 نقط من الزيوت الاساسية (فانيليا, قرفة, خشب الصندل, سرخس, باتشولي, خشب الارز) اختاري اي نوع زيت منهم اللي تفضليه اكتر.
7 نقط من الزيوت الوسطى (جوزة الطيب, عشب الليمون, القرنفل, الايلنج, زهر البرتقان).
6 – 7 نقط من الزيوت العليا (الورد, اللافندر, الياسمين, الاوركيد, الليمون, البرجموت, زهر البرتقان).
وكل انواع الزيوت دي هنلاقيها متوفرة عند العطار.
طريقة عمل البرفيوم في البيت
الخطوات:
الخطوة 1: تجهيز الازازة
1- عقمي الازازة اللي هتحطي فيها.
2- اغسليها بمية سخنة لمدة 5 دقايق تقريبا, او لو متوفر عندك غسالة اطباق اغسليها فيها.
الخطوة 2: صبي الزيت الاساسي
بعد ما عقمتي الازازة حطي فيها زيت الجوجوبا او زيت اللوز حسب اللي اختارتيه.
الخطوة 3: اضافة الزيوت العطرية
لما بتجيبي برفيوم هل لاحظتي انه مع الوقت ريحته بتتغير عن اول ما رشيتي منه؟ هنا بقى تيجي طريقة تركيب البرفيوم.
1- الزيوت العليا هي اللي ريحتها بتكون ظاهرة في اول ما ترشيه.
2- وبعدين الريحة بتبدأ تخف وتتشتت لحد ما توصل للزيوت الوسطى.
3- وبعدين بتتبخر وهتسيب في الاخر ريحة الزيوت الاساسية, ودي اللي ريحتها بتفضل على بشرتك لاطول وقت.
مهم بقى انك تضيفي الزيوت العطرية بشكل عكسي او بالترتيب المعاكس, يعني تبدأي بالزيوت الاساسية الاول, وبعدين الوسطى وفي الاخر الزيوت العليا.
لو انتي مبتدئة واول مرة تركبي برفيوم, بننصحك انك تحطي الاول نقط بسيطة من كل نوع لحد ما تتعلمي كويس وتعرفي مدى قوة او اعتدال الزيوت اللي انتي بتستخدميها, واحتفظي بباقي الزيوت عندك عشان لو حبيتي انك تعملي نفس البرفيوم تاني.
الخطوة 4: الكحول
1- بعد ما خلطتي الزيوت اللي اختارتيها, دلوقتي ضيفي الكحول.
2- رجي الازازة كويس.
3- خزنيها في مكان مقفول وضلمة لمدة 48 ساعة لحد 6 اسابيع, وكل ما تسيبيها اكتر الريحة بتتركز وبتبقى احلى.
الخطوة 5: هل البرفيوم جاهز؟
بعد 6 اسابيع طلعي الازازة.
1- شميه لو لقيتي الريحة زي ما انتي عايزاها خلاص, ضيفي عليها معلقتين المية المقطرة.
2- رجي الازازة كويس عشان تخلطي كل المكونات.
3- استخدمي فلتر القهوة او القمع عشان تصبي البرفيوم اللي عملتيه في ازازة زجاج غامقة.
4- الهوا والضوء هما اكبر اعداء للزيوت العطرية وممكن يغيروا ريحتها, عشان كده احفظي الازازة في مكان ضلمة.
5- وممكن تضيفي معلقة كبيرة جليسرين عشان تحفظي الريحة لفترة اطول.
الخطوة 6: استخدام البرفيوم
1- ممكن تاخدي شوية صغيرين بس من البرفيوم تحطيهم في اي ازازة تانية يكون شكلها حلو عندك للاستخدام اليومي او عشان تخليها في شنطتك.
2- ممكن كمان انك تدي البرفيوم بتاعك اسم “خصوصا لو انتي بتخططي انك تقدميه هدية لحد”.
3- اتأكدي انك تكتبي كل خطوة بتعمليها حتى عدد نقط كل نوع زيت انتي ضيفتيه عشان تقدري انك تكرري نفس البرفيوم تاني لو حابه.
زي ما شوفنا كده صناعة البرفيوم في البيت موضوع بسيط جدا ومش معقد خالص ويستحق التجربة خصوصا انك هتعملي ريحة من اختيارك وعلى ذوقك, وتقدري تعملي كمية صغيرة على سبيل التجربة في البداية ولو حبيتيه تقدري تكرريه بكمية اكبر او تعملي اي تغيير فيه لما تيجي تكرريه تاني.
رد مع اقتباس
المشاركة الأصلية كتبت بواسطة Suzana
