كتير مننا بيفكر او بدأ بالفعل انه يغير اسلوب حياته لحياة صحية اكتر ، من اول التحول للاكل الصحي وممارسة التمارين الرياضية ، وحتى تغيير نمط الحياة المستقر او الممل لاسلوب حية نشط ، ولكن هل سألتي نفسك قبل كده عن تأثير ادوات الطبخ اللي بتستخدميها على الاكل؟ دلوقتي جيه الوقت اللي تسألي نفسك فيه ، لان في مخاطر كتير في مطبخك لو بتعتمدي في الطبخ على الاواني والطاسات المصنوعة من مواد سامة ، لان احنا كده بنسمح للمواد الكيميائية اللي موجودة فيها تتنقل للاكل ، والسوق مليان انواع كتير منها اواني الطبخ اللي ضد الالتصاق, التيفال او التفلون, الستانلس ستيل, الالومينيوم ، وغيرها من الانواع اللي بنفضلها عشان تنضيفها واستخدامها سهل ، ولكن بعض الانواع دي بتنقل المواد الكيميائية السامة للاكل ، وممكن تسبب مخاطر صحية عليكي وعلى عيلتك ، والنهاردة من خلال موضوعنا هنتعرف مع بعض على انواع ادوات الطبخ الضاره اللي لازم نتجنبها ، وايه الادوات الصحية البديلة اللي المفروض تستخدميها.
ادوات الطبخ الضارة:
1- اتخلصي من التيفال:
الطاسات والاواني التيفال تعتبر من اكتر الانواع المفضلة في كل مطبخ لانها ضد الالتصاق ، وبيكون سهل تنضيفها ، ولكن معظمنا ميعرفش مخاطر مادة التفلون اللي بيكون مطلي بيها الطاسات والاواني التيفال ، الانواع دي لما بتتعرض للحرارة فترة طويلة بتنشر ابخرة سامة ، بيسبب اعراض شبيهه بالانفلونزا, بيزود من خطر ارتفاع الكوليسترول, بيعمل خلل في وظائف الغدة الدرقية, بيسبب العقم ، والاواني الغير لاصقة ممكن انها تنشر كتير من المواد السامة التانية اللي بتتنقل للاكل بسهولة وممكن تسبب السرطان.
بديل آمن: الاواني الحديد الصب
واحدة من اقدم اواني الطبخ واكترها امان للطبخ فيها هي الحديد الصب ، مش بس لانه مش بيسخن اوي لكن كمان مافيش مواد كيمائية سامة بتتسرب منه لاكلك ، ويعتبر من انواع المعادن الكويسة جدا اللي المفروض تكون موجودة في مطبخك ، بالاضافة ان الاواني الحديد متينة وبتوزع الحرارة بشكل متساوي على الاكل ، ولو عايزاه غير لاصق ادهنية بالزيت وحطيه في الفرن شوية.
ادوات الطبخ الضارة
2- اتجنبي الالومينيوم:
كتير مننا لسه بيستخدم الالومينيوم لحد دلوقتي وده لانه معدن متين وبيستحمل وسعره مناسب ، وبيحافظ على الاكل دافي لفترة طويلة ، ومتعدد الاستخدامات ، ووزنه خفيف ، ولكن ، الابحاث اثبتت ان الالومينيوم ليه تأثير قوي على الصحة لانه بيسبب مرض الزهايمر ، لان الالومينيوم بيحتوي على سم عصبي (بيضر بالجهاز العصبي) ومعروف انه ضار صحيا.
بديل آمن: الاواني الزجاجية “البيركس”
لو عايزة تحافظي على اكلك دافي لفترة طويلة ، اختاري الاواني الزجاجية ، تعتبر من الاواني الصحية الخالية من اي مواد سامة ، وفي منها دلوقتي كمان انواع آمنة للاستخدام في الميكروويف ، بالاضافة انها سهلة الاستخدام ، ويمكن يكون عيبها الوحيد ان عمرها قصير وممكن تتكسر.
3- اتجنبي النحاس:
النحاس كتير بيفضلوه لانه من الانواع الموصلة للحرارة بسرعة ، ولكن الاواني النحاس الغير مطلية لما بيتم تسخينها بتسيب كميات كبيرة من النحاس السام في الاكل ، وده ممكن يأدي للتسممم بالمعادن الثقيلة ، وحتى كمان المطلية بالنيكل خطر جدا.
بديل آمن: الستانلس ستيل المقاوم للصدأ
اشتري دايما الاواني المصنوعة من الستانلس ستيل المقاوم للصدأ ، المادة دي مش بس مش مضرة ولكن كمان عمرها طويل جدا ومش بيحصل لها اي خدوش على سطحها.
4- اتجنبي الاواني المطلية سيراميك:
الاواني السيراميك بيكون شراها صعب شوية ، وهي من الانواع الفاخرة والمتينة جدا وآمنه ولكن لما تكون سيراميك 100% ، لان المطلية بالسيراميك مع الوقت ممكن يتسرب منها رصاص ومواد سامة للاكل ، ده ممكن يأدي للتسمم الغذائي.
بديل آمن: الاواني السيراميك 100%
اختاري الاواني المصنوعة من السيراميك 100% مش المطلية بالرصاص ، ولو انتي عندك في مطبخك الاواني السيراميك الصافي فانتي كده عندك اكتر اواني الطبخ امان ، لانها مشتقة من مواد طبيعية وخالية من اي سموم.
ممكن تكون اواني الطبخ من الحاجات اللي مش بنهتم بيها اوي لما بنيجي نختارها ، ولكن هي ليها مخاطر صحية كبيرة جدا لو اختارتي الانواع المضرة ، عشان كده ضروري انك تستبدلي كل الاواني المضرة بالانواع الامنة الغير سامة.
رد مع اقتباس
المشاركة الأصلية كتبت بواسطة sawsanmahmoud
