مافيش حد فينا مبيحبش البيتزا اكيد كلنا من عشاقها ، ولكن البيتزا سواء اللي بناكلها في المطاعم هنا او بنعملها في البيت ، مختلفة عن طريقة البيتزا الايطالية الاصلية ، عشان كده النهاردة هنقولكم على وصفة البيتزا الايطالية الاصلية بالصوص الاحمر وبصوص البيستو.
وصفة البيتزا الايطالية الاصلية:
المكونات:
– 280 جرام دقيق لجميع الاغراض.
– 7 جرام خميرة جافة.
– 150 مل مية فاترة.
– 4 معالق صغيرة سكر.
– 20 مل زيت زيتون.
– 1 فص ثوم.
– ½ حبة بصل.
– 250 مل طماطم مهروسة.
– 125 جرام جبنة موتزاريلا.
– 20 جرام اوراق جرجير (اختياري).
– 100 جرام اي نوع لحوم تفضليه او فراخ (اختاري اي مكونات تحبيها او متوفر عندك في البيت).
– ملح.
– فلفل اسود.
– زعتر.
وصفة البيتزا الايطالية الاصلية
طريقة التحضير:
1- في طبق كبير او في طبق العجان اخلطي الدقيق والسكر والملح ، ودوبي الخميرة في في المية الفاترة وبعدين ضيفيها لخليط الدقيق.
2- ضيفي زيت الزيتون واضربي الخليط لحد ما يبقى عجينة ناعمة.
3- غطي العجينة بفوطة مطبخ ، وسيبيه يتخمر في مكان دافي لمدة حوالي 1 – 2 ساعة ، لحد ما حجمه يتضاعف.
4- افرمي البصل والثوم لتجهيز الصوص.
5- شوحي البصل والثوم على النار في شوية زيت نباتي لحد ما لون البصل يبقى شفاف ، ضيفي لهم الطماطم وتبلي الصوص بالسكر والملح والفلفل والزعتر ، سيبي الصوص يغلي على نار هادية لمدة تقريبا 5 – 7 دقايق.
6- سخني الفرن على 180 درجة مئوية ، وابدأي افردي العجينة على رخامة مرشوشة بشوية دقيق ، افرديها لحد ما تبقى بسمك 0.5 سم تقريبا ، وانقليها على صينية خبز مبطنة بالدقيق.
7- افردي الصوص على العجينة ، وحطي فوقيه اللحمة او السجق او اي مكون اختارتيه.
8- قطعي الموتزاريلا شرايح ولو مبشورة رشيها على وش البيتزا من فوق بالتساوي ، بعدين حطيها في الفرن لمدة 20 – 25 دقيقة لحد ما لونها يبقى بني دهبي.
9- بعد ما تطلعيها من الفرن حطي عليها اوراق الجرجير المتقطع.
البيتزا بصوص البيستو:
1- على نفس العجينة اللي حضرناها في الوصفة اللي فوق.
بيتزا بصوص البيستو
2- قطعي شرايح طماطم رفيعة ورصيها على مناديل مطبخ عشان تمتص المية بتاعتها.
3- افردي على العجينة 1/3 كوباية صوص بيستو ، وسيبي جزء من الحروف بتاعة العجينة متحطيش عليه صوص عشان متتحرقش ، ممكن تحضري صوص البيستو بطريقة بسيطة جدا ، اخلطي اوراق ريحان ، صنوبر لو متوفر او كاجو ، جبنة بارميزان ، عصير ليمون ، زيت زيتون ، واضربيهم مع بعض في الخلاط لحد ما يتكون عندك معجون لونه اخضر.
4- اخبزي البيتزا على الرف اللي تحت لمدة 4 دقايق (والخطوة دي عشان القشرة بتاعة البيتزا تبقى هشة ، لانك لو ضيفتي الجبنة من الاول ممكن تتحرق قبل ما البيتزا تستوي كويس).
5- طلعي البيتزا بعد ال 4 دقايق ، ضيفي لها الجبنة الموتزاريلا ، ورصي فوقيها شرايح الطماطم ، ممكن كمان ترشي عليها جبنة بارميزان مبشورة ، وبعدين رشي ملح وفلفل وزعتر.
6- حطي البيتزا في الفرن مرة تانية ، واخبزيها لحد ما تبقى هشة ولونها دهبي ، حوالي من 6 – 8 دقايق.
7- ممكن بعد ما تطلعيها من الفرن تحطي عليها من صوص البيستو على الوش ، وترشي اوراق ريحان طازة متقطعة.
طريقة تانية للبيتزا بصوص البيستو:
افردي على العجينة الصوص الاحمر العادي بتاع البيتزا والجبنة الموتزاريلا واي اضافات انتي تفضليها ، وحطيها في الفرن ، وبعد ما تطلعيها من الفرن وزعي عليها من فوق صوص البيستو.
رد مع اقتباس
