ماظنّيت فجئه اتروح من الروح ويطفه البيت
ماظنّيت ماالگاك واتمناك لو حنّيت
ابعلم چنت اعطش اعلیك
تواعدني و اتانيك
وصرت ارجى الحلم بيك
ماظنّيت
***
ها يابوزينب انته باصرني ابراي هم چان هذا ابظنّك
اتمنّى اشوفك وانته هاي الانفاس التصعد وتنزل منك
باصرني يصبي النظر وعتابي دمعه دمعه
افرض اقنّع ناظري گلبي منو اليقنعه
شنهو الراي دمعي ايسيل واگضي الليل منته اوياي
شنهو الراي وبلا حول گلبي ايگول یمکن جاي
اگضّي ليلي حسبات
ودموعي كلها آهات
واگولن یرجع المات؟
ماظنّیت
***
یابویه والبویه صعب ماتنگال چن بسمله بالساني
وقنعني اشلون ادخل وماالگاك بالبيت واصبر آني
هو انته حتى ابغيبتك آنه احچي وي مكانك
ومرّات اقبّل بالأثر چي عطره من حنانك
من اتعود اتلگاك والملگاك شوگي ايزود
من اتعود روحي اتصير مثل الطير ورد اردود
صفيت وهذا حالي
بعد فگدك يغالي
مكانك بويه خالي
ماظنيت
***
يابويه ايام ويخلّص رمضان ويختم الباري ابعيده
وهذه السنه انته مااشوفك بالبيت ياهو الاقبل ايده
كل عام انه واخوتي ندعي الله بس يعيدك
ومن بعد ما انخلص دعه نتلاهف اعلى ايدك
وين العام من الراح راح وراح مسح الهام
وين العام اعليك انطوف وهسه انشوف بالاحلام
چنت یالغالي وياك
والوذن بويه بحماك
صرت اتمنه ملگاك
ماظنيت
***
ياحسرة الملهوف و مضيع الراي وينخاك وسط الهيمه
يابويه مووالي چنت للایتام مر علي صرت ايتيمه
مرني ونشّف دمعتي وخليني اشمه عطرك
وامسح على راسي ابعطف ونومني اعلى صدرك
عندي اعتاب مال ايتام ابحسره اتنام يم الباب
عندي اعتاب كله اجروح دمعه ونوح للغيّاب
يمالك هاي الانفاس
اطلبك مسحة الراس
وادور اعليك بالناس
ماظنيت
***
اتريّه منّك جيّه واحتاجك حيل بالطف يماي اعيوني
ليلة الابگه ابلا حمه ولا خوّان وفوگ الهزل یسبوني
وبليلة الحادي عشر احتاجك اكثر آنه
تدري عزيزه امدلله وما اقبل المهانه
ابذاك الليل من احتار بين النار ودمعي ايسيل
ابذاك الليل اتناديني اتحاميني من الخيل
يبويه وبعد الحسين
وكفيلي گرّة العين
اطبن للدواوين
ماظنيت
***
✍.الشيخ عقيل الأسدي
رد مع اقتباس
