هنا

[ملكةه]

لا تكرر نفسك كدام الشخص..
بمعنى لا تكرر نفس العتاب ، نفس اسباب الزعل ، نفس الزعل نفسة ، ولا تكرر نفسك اصلا مرة ثانية.

[ملكةه]

كلشي توقع ، مود الصدمات تره ميوكل خبز.

[زهرة اللوتــس]

ابد لا تستهين ب حزن احد ، لا تسمعه ( انت مكبر الموضوع، السالفة ما تستاهل ، يمعود فلان ما يسوى ...الخ ) كل حزن يحسه الشخص يسوى ويستاهل لو جان بسبب كلمة وحدة ، كلشي من جهة الگلب يأذي ويجرح ، ماكو شي بالدنيا ما يستاهل ، ماكو شخص بالدنيا ميسوة الانسان ما يحزن ،
لأن لو بطران لو فارغ وما يجيلك الا لأنه يثق ويأمن بيك لدرجة يعيش ضعفه يمك ، احنه من نفرح نروح نكول لكل الناس ، بس من نحزن لا ، نروح لشخص يعرف شلون يحضن کلبنه بحنيته ، لا تخلون اليحجيلكم يندم ، لا تقللون من اي موقف مهما كان بسيط ، لأنه بگلب الي مار بي ابد مو بسيط ابد ، ممكن ياخذ الروح هم .

[ملكةه]

تعلمو دائما انو متسوون شي انتو مرايدي لا من وره مستحى ولا من وره خوف ولا من ورة الناس، الشي المتريدة لتسوي، ابد.

[ملكةه]

لما صارت الخاصية الجديدة بالreels الانستا الي هي يطلع عدد مشاركين الفيديو، وتشوف فيديو مسيء اخلاقيا حتشوف ان عدد اللايكات مثلا 30k
وعدد المشاركات او الارسال 200k وهذا يدل ع ان الناس تخاف احد يشوف اللايك او الكومنت من الناس الي يعرفوها بس ما يخافون يشاركون الفيد مع الناس الي تشبهم او ما يستحون منهم بحكم الميانه الي بينهم!.

اني هنا ما دا اذم احد ممكن اني من هل ناس في يوم من الايام بس هو طبيعة الانسان انها تخاف ع سمعتها ومتخاف بنفس الوقت! هو الانسان ازدواجي و شنو الصح ان يعطي اللايك عادي وميستحي لا احد يشوف هل لايك لما يطلعله بالصدفة والا ميشارك اصلا الفيديو والا هو الفيديو طبيعي ان يكون ١٨+ ويعجب الناس ومابي شي غلط، الموضوع يدوخ لو فكرنا بي لان يودينه لاسئلة اعمق وتدوخ وما تستاهل كل " هل دوخة هو reel صدك چذب! "
هاي الجملة الي تختصر وتخلي الانسان يتخطى ان يفهم نفسه بيوم من الايام ويحاول يفك هل ازدواجية!..

[ملكةه]

معاملة الناس بشكل حقيقي الي هو شلون؟
اكو ناس هواي تكول ان احنه حقيقيين بس ميدرون ان الحقيقة الزايدة عن اللزوم " الوقاحة " هي الي تنفر الناس، ما هو تعريف الوقاحة؟

" وقاحة جايه من كلمة وقح اي قل حيائهُ واجترأ! "

لذلك انك تكون حقيقي هل شي لازم يكون اله حدود، هواي اكو اشياء نحسها بداخلنه او نعرفها بس مو كلشي لازم ينحجي، مو كل شخص يتقبل كل الي بداخلك، بالاضافة لافتقارك لشي اني اسمي
" مجاملة ايجابية "

يعني شنو؟

يعني الانسان يحتاج المجاملة وما تعتبر سخافة
" لواكه بالعامية "
الانسان يحتاج الكلمة الطيبة ( مثال جبر الخواطر الي شرحته فوك )

كون حقيقي لكن بحدود، هواي ناس تعرف بحقيقتها بس ما تحب تشوف حقيقته نفسها مو عاد حقيقتك!.

[ملكةه]

الانسان طاقة، والي يمر بي مو قليل ابدا فلما يسألك مرة ومرتين انت زين؟ انت بخير؟ ممكن تحجي؟ وما تحجي شنو ممكن يسويلك او شنو تنتظر منه! محد يكدر يساعد شخص ميريد يساعد نفسه و لا اكو شخص عنده القدرة الي يقره شنو بداخلك، بنفس الوقت كان لازم يكون وياج وميعوفج حتى لو ما عرف السبب كنوع من انواع المشاركة لان العلاقة مشاركة الحزن مو بس الاشياء السعيدة، فالخطأ هنا من الاثنين انتي ما حجيتي وانتظرتي هو يكتشف شي ميكدر يدخل بداخلج ويعرفه والغلط منه ان ما بقى وياج اذا هو فعلا ما بقى يعني!.

[ملكةه]

لا تكول ع شخص يحبني الا لما يكلك ان هو يحبك مهما كانت المواقف الي تثبت هل شي
اني مع المواقف بالحب لكن بعد ما يعترف الشخص
بهل حب ويريد علاقة، هواي ناس تحب بس ما تكون
مستعدة لعلاقة او ما تكون تحب من الاساس و احنه
الي نزرع هل شي بداخلنه، واكو فئه " تحسسك بالحب الى ان توكعك وتكلك ها مو قصدي! "
كنوع من انواع ارضاء النفس، التعامل يكون

ع اساس ما موجود وليس ما متوقع!..

[ملكةه]

- الرساله ؛ شنو مبدأك بالحياة؟

مبدأي بالحياة ان الحياة ما بيها مبدأ ثابت غير الله، كلشي متغير بهل حياة، الظروف والناس وحتى انت
شخصيتك تطور وتتغير حسب معطيات حياتك
انت قبل سنة تختلف هواي عن انت اليوم! وانت بعد سنة راح تختلف اكثر.. لذلك مبدأ الانسان بهل حياة
لازم يكون ارضاء الله اولا ومن بعدها التسلسل يختلف حسب معطيات الحياة.

[ملكةه]

= اي كارولين احجيلي شنو صفات رجل احلامج
- مممم شوف اول شي لازم يكون عنده مبدأ ان الدين معاملة، ان يكون قوي ويفهم ان القوة مو بالصوت العالي او التباهي!.. الرجل يقويني ميستقوى عليه، وحتى لما يريد الفراق يجي كدامي ويكلي اني ما اريد اكمل!.. لا يجرح ولا يخون ولا يهين، الرجل بالنسبة الي لازم يكون شخص يحاول ويسعى بهل دنيا حتى يسعد نفسه ويسعدني وياه، لازم يكون حنين القلب لان هو عنده القوامة، لازم يكون ظهر وسند موجود عند اللزوم، الرجل بالنسبة الي ميضحك ع بنات الناس!.. الرجل ما يهين بنات الناس!.. لازم يكون رجل قادر لان العفو عند المقدرة كل ما حيكون انسان قادر كلما حيغلس ع اخطائي الصغيرونه ههههه مراح يكبر المواضيع، لازم يكون ناجح واني مو انجح منه!.. لازم يتقي الله بمعامله الناس واني مو اولهم! انما والده ووالدته، لازم يحبني هواي يهتم بيه هواي ويعرف يتعامل ويايه لان اني صعبة هواي!.. يكون دمه خفيف مو حقنه ومينجرع ما اكدر اتقبل هيج شخص نهائي ولازم يكون شيك وهيج خفيف مثل النسمة فاهمني؟..