اليوم الوقت ما يمشي
اليوم الوقت ما يمشي
مقالات النقد العراقي مثل المقلوبة ... بيه حجي هواي وكبار ... ومن تقراه ... تمسح ايدك بالحايط وتطلع!
باعتبار اليوم الفطور مقلوبة ....المشاركة الأصلية كتبت بواسطة راهب
طكيتلي صفنة على الصينية ... اتخيّلتها خارطة العراق العظيم ... اللي بيه كلشي خاش بكلشي !!
مرات ايصير عندك فضول جبار ... ودائما يتررد سؤال وجودي عظيم ببالك ... منو اول واحد ابتكر هالشيء؟؟؟
منو اول واحد كتب خطة ؟
منو اول واحد شرب جاي بعد الاكل؟
منو اول واحد ابتكر العصرونية ... وليش جاي وكعك بالتحديد؟
منو اول واحد طبخ المقلوبة ؟؟
وبانتظار معرفته .. يختزن عقلك مزيداً من الشتائم الحداثوية!!
مرة واحد يسولف عن ابوه ... يكول ابوي مدمن بيض .. بحيث يبتكر اكلات كارثية .. عنصرها الرئيس هو البيض .. بيض على تمن، وبيض وخبر بالدهن، بيض مسلوك ويقليه بالطاوة ...
المشكلة انه بعد شكم سنة يمكن اتصير هاي الاكلات جزءاً من النظام الغذائي العراقي اللي هو اصلاً ملعوب باعدادته ... ومن المقلوبة مروراً بالتبسي والاكلات الوافدة كالفسنجون ... وايدك تلعب !!
اثاري الاشتقاق مو بس باللغة ...
لا والمصيبة ... بها مقلوبة لحم ومقلوبة دجاج ... قابلة للتفريع .. وممكن تتمدد واتصير مقلوبة بيض ....
مو هو العراق مقلوب في مقلوب من الله خلقه ..
ولذلك نحتاج المقلوبه بين الحين والأخر ..
ومن الممكن اتصير مقلوبة بيض ..
اي شي بالعراق ما استغربه ابددددن ..
اليوم الخوارة ... اللي ما اعرف شنو اصلها ... هذا اليوم المفهوم بالمقلوب شأن المقلوبة العراقية يتسابق الناس لتوزيع صواني الاكل .. بحيث اتصير سالفة تبادل الاسرى ..تطبلك صينية وتطلع منك صينية، واذا تتخربط اتجاهاتك ممكن تحصل صينية وتنطي صينيتين .. المهم راح تتوفر عند مجموعة من المواعين اللي ما بيها علامات دلالية، بحيث ثاني يوم تجمعهن بصينية جبيرة وتبقى تفتر مع جملتك المشبوبة بالاستحياء ( اخذ الالك اغاااااتي) ، تمم العملية بنجاح هاي اذا ما رجعك ماعون مجهول الهوية ... وتبقى تفتر فرة اضافية لاجل ايجاد اصحابه الشرعيين ...
بينما تجتمع عندك ثلة خيرة من المواعين مجهولة الهوية ... ستبقى حائراً فيمن يظن انك تاخذ المواعين وما تردهن ... مع ان الامر محمود في مجال استعارة الكتب... ولهسة عندي كتاب صاحبه مات والكتاب عندي!!
ولو من خلال الخوارة راح تعرف نمط النسوان بالطبخ .. ومنو اللي تحاول بطريقة او باخرى مطالبته بغدة او عشة على سبيل الخسارة لا نمرته طباخة، راح تعرف منو اللي بيه ضغط .. ومنو يحب البهارات، ومنو اللي تكشر الباذنجان من تسويه مرك ومنو اللي تعصر الطماطة وتعزل كشورها..
راح تعرف ابداعات النسوان بالطبخ ... وتقدر مظلومية الرجال بهالمجال ..