قبل ايام عرفت انو المستشارة الالمانية ميركل هي عالمة فيزياء .. ترى احنه هم عدنه علماء .. بس اختصاص خمط وشفط
قبل ايام عرفت انو المستشارة الالمانية ميركل هي عالمة فيزياء .. ترى احنه هم عدنه علماء .. بس اختصاص خمط وشفط
يـجـب أن تـدرك أنّ عـدم تـلـقـيـك رسٌالـة هـي رسالـة أيـضـاً
مرحبا ....
المعروف عن اهل العربي انهم معقدين وقنقينة ويشلعون سبع قلوب ... طبعاً هاي العبارة صحيحة من جانب ومو صحيحة من جانب اخر .. وخلي نبدي بالمو صحيحة ... بحكم التعامل بالعمل .. ممكن يكونون جديين زيادة .. بس مو معقدين على اعتبار يتعاملون وي لغة ادبية بيها كل مزايا الروح الترفة ... فوديتهم
الجانب الثاني او بالاحرى الاول وفق الترتيب اعلاه ... اللي هو صحة العبارة ..المشاركة الأصلية كتبت بواسطة راهب
باللغة اكو جانب تعقيدي .. وهذا التعقيد جاي من دخول المنطق والكلام والفلسفة على خط اللغة .. اضافة الى (التعيقل) الزايدة من جانب المتكلم حتى يصيغ كلامه كاستعراض عضلاتي على السامع المكرود .. مع ملاحظة اننا ندرس لغة ليس بيننا وبينها رابطة سوى اننا ورثنا كلاماً غير مفهوم احيانا كثيرة .. وهذا ما سبب نفور الناس من اللغة .
هذا التعقيد انطبع على الذائقة الادبية للمشتغل بحقل اللغة باحث او معلم او مدرس .. بحيث ان الكثيرين منهم ما قانع بنفسه كباحث او مدرس والا من تكله سولفلي على المناهج الادبية المعاصرة .. الماغوط .. عن ادونيس ... اقرالي شكم بيت شعري بالغزل .. بالوصف ... اكتبلي نص ادبي لوصف الطين مثلا .. يبقى صافن بوجهك ..
اكاد اجزم .. ان الكثير الكثير من المدرسين .. لا يعرفون امل دنقل !!!
هذا مو ذنبه بطل حيلي ... ذنب المنطومة التعليمية من ثانوية وجامعية .. والا شنو الغاية من حفظ الفية ابن مالك بالنحو .. وانت ما فاهم شيء منها ؟؟ او حفظ شواهد ابن الناظم وهي نصها مجمعرة وينرادلها حلك مطاطي حتى تلفظ بيه الكلمات .. وتعال ادرس كل تفريعات النحو ومسألة وشكالوا الكوفيين شكالوا البصريين .. والاخفش ابو كفشة شنو رايه بهاي المسألة .. وليش قبيلة مدري منو كالوا اكلوني البراغيث ... ومن هذا الخرررط اللي اتريده بخاطرك .
لذلك يطلع مدرس العربي كافر بام رب العربي ... ويجي يشرح للطلاب الحال الجامدة والمشتقة .. لو نعت الحقيقي والنعت السببي .. واسلوب النفي .. والتوكيد .. وان هذان لساحران ... و حتى كحرف نصب .. وانواع اللامات الداخلة على الفعل ... هاي اذا ما كفر بالحصة الاولى والخلاف في اعتبار المعرف بالاضافة معرفتين لو معرفة وحدة ؟؟!!
واتخيّل الطالب المكرود .. شلون حاله !
طبعا هاي كله بالنحو ... اما الصرف فيكفّر النبي... والا فموضوع النسب ينرادلها عقل بوحده .. اما الاعلال والابدال واسنا الفعل الناقص للضمائر .. وجمع الكثر وجمع القلة .. وصيغ منتهى الجموع .. اتخليك مو بس تكفر بالخليل بن احمد الفراهيدي انما اتجيب ابو عمرو بن العلاء اتخليه بشواية هو والنحاس والسيرافي وابن سيدة والجوهري والازهري وابن مضاء القرطبي ... اما سيبويه فهذا حسابه يجي بالاقساط شوية شوية ...
اخذ لفظة (ماء) مثلاً ..
اصلها موَه ... صار بيها اعلال بالتسكين فصارت (مَوْه) اثرت فتحة الميم بالواو فقلبتها الى الف للمجانسة الصوتية فصارت (ماه) صار بيها ابدال الهاء الى همزة فصارت (ماء) ... هاي لفظة وحدة انكلبت على البطانة يله وصلتنة .. اتريد المدرس ما يكفر وما يشخط ؟؟
لو الطالب ما يكره العربي وابو العربي .. واللي خلة العربي بالمنهج ؟؟؟