جروح گلبي ما نشف ينبوعها
وعيني حلفت ما تجف ادموعها
*********
جروح گلبي ما يداويهه الصبر
وما يجف دمعي لما يفنه العمر
على الصابوا هامته بسيف الغدر
بچتله طفّوا للعداله شموعها
**********
آه لمصيبته وحسره وألف آه
الچان ناشر للعدل والحگ لواه
اليوم طاحت رايته ابغدرة اعداه
وأنهت ابچتله العده مشروعها
*********
صاب گلب الدين سهم مصيبته
چني هالليلة أشاهد حالته
مضطرب للسمه ايوجّه نظرته
يتنه ساعات الفجر وطلوعها
*********
للسمه اتبسّم اورَدْ بيه الكدر
فرح لجل الملتقى بسيد البشر
لچن رد بيه الكدر لمن ذكر
حسرة اعياله اعلى فگده وروعها
*********
اوطلع من حانت اللحظه الحاسمه
شاهد طيور الإوزّ امحوّمه
چنهه تصرخ رِد يحمّاي الحمه
يا أصول الغانمه وفروعها
*********
اومَحزمه البسمار رايد يگطعه
چنهه رادت باب داره اترجّعه
چنهه تشعر بيه يمشي لمصرعه
وهل حوادث مو صِدَف مجموعها
**********
اوطلع حامي الجار يمشي لمگصده
گاصد الليله يودع مسجده
وبصلاته صوّبه سيف العده
وفارگت بعده اليتامه اهجوعها
*******
مثل ما سمّوا چبد طه الرسول
بسيف مسموم اغدروا فحل الفحول
ومثل ما كسروا ضلع من البتول
اليوم هشموا للكرامه ضلوعها
----------
#عقيل_الكاظمي / الامارات
الشاعر عقيل الكاظمي
رد مع اقتباس
المشاركة الأصلية كتبت بواسطة فضاء.
