هنا

[عقيل الكاظمي]

قصيدة سكتت حسرتي .. اداء الرادود المبدع جليل الكاظمي / كلمات الشاعر عقيل الكاظمي
القصيدة الكاملة
سكتت حسرتي * صاحت دمعتي * بوية
گطعو منحرك * بيا عين انظرك * بوية
أنه بنتك رقية ** عگب عينك سبية ** بوية
-----------
بديرة الشام * بليلة آلام * نزّلو عيلة رسول الله بخرابه
وارتفع صوت * بحسرة الموت * من گلب، سوط اليتم، جار بعذابه
من يتيمة جدهه مأوى لليتامه
من ثغر بشفافة ضاعت ابتسامه
من جرح ما تنطفي جمرة عتابه
صاحت واللهب * يعله اويه العتب * بوية
وينك يا أمل * باحلامي اتصل * بوية
يبدري الغاب ضية ** عگب عينك سبية ** بوية
-------------
آنه ونّيت * وانت حنيت * وجيت باحلامي تخفف من ونيني
نسيت الهموم * شفت النجوم * بابتسامة وجهك الكحّلَت عيني
هم صدگ عگب الحلم بضواك أحظه
هذي ساعة طيف مرت چنهه لحظه
أحلى من عمري وأعز من كل سنيني
وجهك بالحلم * نسَّاني اليتم * بوية
لاچن من رحت * عن عيني صحت * بوية
أنه لحزنك ضحية ** عگب عينك سبية ** بوية
-------------
بوية فزّيت * بهمّي ناديت * اوصرت اونّ اونين المفارِگ حبيبة
وتنشد العين * والدي وين * چان يمي وغابت الروح بمغيبة
وجابو بطشت الذهب راسك يغالي
مدري واقع مدري هل صورة بخيالي
وگلبي يحچي اوياك لو يعلن نحيبة
گلبي الينتحب * يا ماي العذب * بوية
بغيرك ما روه * ومحتاجك هوه * بوية
اوتظل هاللهفة بيه ** عگب عينك سبية * بوية
-------------
جابو الراس * وجرح الاحساس * على فراگك ظل يهل دموعه سكته
ارد احاچيك * واحتمي بيك * وشبگت راسك يبوية حين شفته
امنياتي ارتمي واغفه اعلى صدرك
ما شفت صدرك شفت گدامي نحرك
جسمك بوادي الطفوف اهناك عفته
شفت بنظرتك * جمرة حسرتك * بوية
وتنزل دمعتك * تظهر لوعتك * بوية
يهل دمعك عليه ** عگب عينك سبية * بوية
--------------
فكري محتار * حزني ما صار * بهل حياة ومثلي ما صارت يتيمه
عانت جروح * وخاوت النوح * وشاهِدَت مذبح ابوهه الچان خيمه
شلون ما أنعى وأهل دمعي بغيابك
وكل شي بالدنية بچه وناح لمصابك
حتى مهرك هم نعه وصاح الظليمه
ما ظل لي صبر * ما ريد العمر * بوية
اتمنه الأجل * يمك أرد اظل * بوية
تمنيت المنية ** عگب عينك سبية * بوية
--------------
سكتت الآه * والدمع تاه * بعيني مره ومره ينزف من دليلي
طلعت الروح * وانتهى النوح * وصرت بس انت الذي تسمع عويلي
وِرْحلت من عالمي لعالم حضورك
ما اريدن دنيه ما كحّلهه نورك
لا حياة بعيد عنك يا خليلي
اسودّت دنيتي * وذبلت شمعتي * بوية
وظلت عمتي * تبچي لفرگتي * بوية
العقيلة الهاشمية ** عگب عينك سبية ** بوية
----------------
عقيل الكاظمي // بغداد

رابط القصيدة على يوتيوب


رابط آخر

https://drive.google.com/open?id=1c9...4HhHqNaBCbSmal

[124321]

شكراا لك ورد

[عقيل الكاظمي]

شكراا لك ورد

خادمكم