درر العراق

فقار الكرخي · 16/April/2020

محاورة شعرية عن الثلاثينية والعشرينية
بيني وبين الشاعر حسين الشاعر

كلماتي باللون الاسود
كلمات حسين الشاعر باللون الاحمر

تغيرت سوالفنه عن وصف النساء
باليفشل كمنه نوصف بيهن
الجمال ويه الانوثه يصب حنان
عمره ماجان العمر يعنيهن

افتح عيونك عدل وصفلي زين
منيلها الحنية و العمر انتهه
خاف متوهم يغالي اوصفيت
ذيج ام العشرين بس كلبك سهه

عندك ام عشرين حبهه اشبع دلال
شعنك تكص بالثلاثينيه
انته نيتك سوء شيطاني الصفات
وانه الهن نيتي اصفي النيه

ماتفيد النية وي وحدة عجوز
اليحضى بأم عشرين بالجنه يفوز
حلوة كتكوتة ترد روح اليشوف
جنها حلقومة وككو ومطعمه جوز

مو كلتلك انته شيطاني الصفاة
ونضرتك للمرأه احس بيهه ضلم
تحجي بس بالشابه وناسي العجوز
باجر من التعب تحتاجلها أم

لو اصح شيطاني لو ارضى بعجوز
ما حسبت حساب تغيير العوامل
انه اريدن شابة مليانه حيل
وانت بالدكتور تكظيها مفاصلل

يمكن اني اضلمت شيطانك شريف
انته عابر بالخبث شيطانك
ولك انت شحاس نفسك تبقى شاب
والنساء يكبرن باحضانك
تقبل تعوفك حبيبه وانته بيك
يمر خريف يذبل باغصانك
اصحه لا وكتك يمر مثل السراب
وتلتفت ما تلكه شي بحضانك

دكلي شعاجبك وش بيها الاجبيرة
تربيها اعلى ايدك ذيج الزغيرة
وتاخذ طبعك بسرعه
هذيج الحلوة المفرعه
عكس ذيج التعوفك ليلك بحيرة

ولك ادري الزغيره شلون ماتكبر
ونت تربي بيهه وتبقه الك تزغر
اريد افهم دماغك ياوكت حجر
تره الحلوه تضل حلوه
شما كبرت بعين الحابهه تسوه
ومهما طال ليله يشوفهه المصباح
الضوه بشبابه بكبره هم ضوه

فاهمني غلط مو قصدي ماتكبر
بس فرق الزغيرة وذيج منها اكبر
ترة مخلصة ترافة وباقية تون ون
وتدور فلوس كاعدة وتدفن
فرق وجه المعقج عن الوجه احمر

اكيد الفرق مايراد توضيح
بس هم جان احمر وجه المعقج
ومثل ما طاحت انته وياها هم طيح
مو هيه عجوز وانته تتغنج

شنو الجابرني اطيح وياها لو طاحت
انا الخلصان كلبي وهي هم شاخت
تريد اكعد الولي برجلي ما راسي
وعلى كيفك كلامك يجرح احساسي
وتشوف افطور رجليها وترد نادم
ولا تكدر تسولف شغلة للوادم
ويجي وكت الغزل ماتحتمل داخت

انته حقك لوتضل شاب وانيق
وهيه تمشي على التلاثينيه
تخيل ٣٠ عمرك هم تطيق
تمرك تحقرك العشرينيه

صح ما تجي ترس الحضن
و شوية يمكن فاهيه
تكبر و تتعلم درس
وتصير هي الراهيه

فقار الكرخي @ حسين الشاعر