چم گمر چذاب اجه ولاگيته ليل
ارد اذب عيني وانام بكيف گلبي
وارد امد جدمي بزويّة گاع ماتنشدني خطوه
منين اجيت ؟
شلون خلاني ومشه ابلياي دربي ؟
وامسح امن اعشوش بالي طيور مايرجع وكتها
وغاد من بير الضحك والماي اشر اسرار تعبي
خاطر يشمها الهوى وتنشف والمها
آنه وحده تموت وتخضّر حلمها
مااعوف البيّه بس يوميه اهدمه
وارجع أبني
والخرابه بكل فصل يطربها همها
روحي صفنة سما مغيمه ودوم تشتاگ لنجمها
چم گمر چذاب اجه ولاگيته ليل
چم شمس ماكفت لمغرب حسرتي
وكملتها
وادري بالمُر يبدي هيل
يا نهايه تلوح عمري وبيدها ترجعني طين ؟
يا بدايه تشيلني وتشمرني عثره ؟
آنه دمعة زفه ماترغبني عين
امن اهد ماضاع امن امس باچر ضحكتي
نيشن الگيعان صوتي
وغنو اسمي العابرين
سلطن اتراب الحزن بيّه ونكتني
وطاح مني وشال صبري
مدري ياسچه غريبه اتدلي بأيامي اعله گبري
مدري چم عام انفگد من جيب عمري
شماله شيب الدنيا عايف كل شي حنه
وگاعد يحوم اعله زغري
آنه يا شباچ ماگتله انت مني
وسامِرت ضوياته عطري
انه يا نسمه غريبه الصادفتني
ومامبديتها اعله صدري
عطش اكبر من نهرهم
يمته بيه الناس تدري ؟
خشن مَر بحفاي ذَمهم
ماتعثّر بي حريري
يمته اچيّم كل قفص ماگال طيري
يمته اكحل صوتي الأسمر بالقصيده الماعَرف يكتبها غيري ؟
ايما صباح
رد مع اقتباس
