هلو..
بالموضوع الي فات حجيت عن الفواق, شنو هو.. شنو أسبابه, وليش و وين..
هسة حبقى بنفس الموضوع.. لكن حناخذة من زاوية أخرى, إلي هي: علاقة الفواق بالجنرل أنسثيزيا (التخدير العام), والسيديشن(التخدير الجزئي) ذاك الي يستهدف مناطق معينة بالجسم بس.
التداخلات الجراحية بالعموم و الإجراءات الطبية الي تصير بوحدات العناية المركزة الــ (ICU) تنطوي على درجة من المخاطرة حتى لو كان القائم بها أخصائي على درجة عالية من المهارة والخبرة, والمرضى الخاضعين للجراحة بمنطقة البطن غالباً ما يُصابون بالفواق بغضون 4 أيام بعد العملية, هالشي ممكن يتطوّر ليستمر في حال كان المريض يختبر نوع من التحفيز أو توسع بالمعدة, أو إضطراب إستقلابي الي ممكن يُسمى أيضاً "إختلال أيضي-Metabolic disorder", وهالشي يصير لما إنزيم ما أو مجموعة إنزيمات تصير بيها صفنة.. هيج, هالشي حيأدي لنقص أو فشل بوظيفة هالإنزيم, ويسوي نوع من التراكم المرضي للمواد الداخلة بالتفاعلات البيولوجية, ويبدي يغير التفاعلات الكيميائية بالجسم.. بالتالي الأيض هو عبارة عن تفاعلات, ومن صار هالخلل فكلشي حيتخربط بالضرورة, ويبدي يشوف الأشياء الطبيعية مثل مرض ويشتغل على هالأساس, أو أنو الغدد الصماء بالجسم موفرة فد مواد معينة بالحدود الكافية فيجي هو هنا ويكوللها جيبي بعد: يلا يعمري.. متبوعة بغمزة.. مُستفزة.
الإختلال بتوازن الكهارل, بعد الجراحة (الكهارل الي هي صوديوم, بوتاسيوم, مغنيسيوم, كلور, بيكربونات, فوسفات كالسيوم.. هذي شغلها توازن الــPH, والمي, دليفري مال مغذيات للخلايا, تطلع الفضلات من الخلايا, تصير أسطة بناء للأنسجة التالفة, ترطب الجسم.. وتنظم وظيفة الأعصاب و العضلات.. وموجودة بالدم والبول و الأنسجة وداخل الخلية وداير مدايرها).
بعد شنو الي ممكن يصير بعد الجراحة ويسبب الفواق؟
الخرّاج الي يجي من حدوث إلتهاب بالمنطقة/ الجرح, فتجي هنا كريات الدم البيض.. تحاصرة وتسويله مايكروفيج, يعني بلعمة.. تبلعه ببساطة و تنتحر بي.. وناتج هالشي هو "الخرّاج"
بعد.. إذا صار عدنا (infection) عدوى بالقرب من واحد من أعصاب الــ(sensory input portion).. الإلتهاب الرئوي مثلاً.
هالسايد إيفيكت الي ذكرتهم, حيسوون تلف مباشر أو تغيرات مكانية, هالتغيرات أو التلف حيحفز العصب وهالنبضة الكهربائية من توصل للدماغ, حيطكطكها هالدماغ ويصفن بينه وبين نفسه شوي ويدز منعكس للعصب الوارد للحجاب الحاجز, يكله قلص عضلتك.. شو بالله.. حيل/ بس برضاته أكيد.
أكو شي ثاني بعد الي هو الإلتصاقات الي تصير بعد الجراحة بمنطقة البطن.. هذي الإلتصاقات هم تسبب الهيكبس.. وتسبب آلام بالبطن.
الإلتصاقات هذي شنو تسوي؟ حتسبب تضيّق بالأمعاء, وبالتالي حتقل الحركة البريتونية بهالمنطقة.
هالعوامل بمجموعها, حتسويلنا إنخفاض حاد بالضغط داخل الصدر, والي يسويلنا هالريأكشن هن الرئتين, والقلب, و الأوعية الدموية الكبيرة (great vessels), والأوعية اللمفاوية (lymphatic vessels), و الــ(thymus)/ غدّة صماء تُسمى الغدة الزعترية أو الصعترية, و الــ(esophagus) المريء.
وبالتزامن وية إنخفاض ضغط الصدر حيصير(normal esophageal peristalsis is suppressed and the lower-esophageal sphincter relaxes) و يصير (innervation to the muscles of exhalation is inhibited).. يعني: حيصير تثبيط للحركة الدودية للأمعاء الي يسموها التمعّج-peristalsis, والي هو عبارة عن مجموعة تقلصات و إنقباضات متتالية على طول القناة الهضمية من المريء حتى الأمعاء الغليظة.
زين هالتثبيط شنو وراه؟ وراه أنو تبطل العضلة "العاصرة" السفلية للمريء عن الحركة.. (تاخذ ريست وتدخل بنمط الطائرة), وكذلك يتم تعصيب عضلات الزفير.
زين وين علاقة التخدير من كل هذا؟
المرضى الي يخضعون للتنظير(Esophago-gastro-duedenoscopy) والي يختصروه بــ(EGD) , سواء تنظير المريء الــ(Esophagoscopy) أو تنظير الأوعية الدموية الــ(Vascular endoscopy) أو تنظير القولون الــ(Colonoscopy), أو الــ(BDE) عموماً.
إلي يجرون التنظير بإستخدام التخدير حيطورون الهيكبس بنسبة أعلى من المرضى الي يجروه بلا تخدير
(نسبة حدوث الفواق مع التخدير 20.5%) بينما (الي مايستخدون التخدير نسبة حدوثها عندهم هي %5.1) و الفرق واضح وكبير.
كذلك ينقسمون الي يستخدمون التخدير لمجموعتين حسب الدوز- جرعة المخدر/ و الي هو عادة الــ(ميدازولام- medazolam)/ فاللي جانت جرعتهم (2) ملغ من الميدازولام جان الهيكبس عندهم بشكل متكرر مقارنة بالي تلقوا المخدر بجرعة (1) ملغ
كذلك جانوا المرضى الي يعانون من (GERD) الإرتجاع المعوي المريئي.. جانوا عرضة أكثر لأنو يطورون الهيكبس.
هذي بالنسبة للبالغين..
زين والأطفال شلون حيتعاملون وية الميدازولام وشنو وضعه وياهم؟
بعد تطبيق جرعة طفيفة عالأطفال و الي هي (0.5) ملغ/كجم بــ(100) نورمالي أو (1) ملغ/كجم بــ(100) نورمالي .. بعد (20) دقيقة من أخذ الجرعة حيظهر عندهم الهيكبس, و للمجموعتين.. الجرعة هنا مو فيصل بظهور الهيكبس.. الي يحدد هالشي هو عمر الطفل.
شلون حيتم التعامل هنا لقمع نوبة الفواق هذي؟
ستاف التخدير وبعد (3) دقايق من حدوث النوبة, يستعملون رذاذ الأنف(كلوريد الأثيل- ethyl chloride spray) وهالشي كافٍ أنو يخفيها.
يتبع..
رد مع اقتباس
المشاركة الأصلية كتبت بواسطة ᓆjgᓄ⍺
