صوت الدم
صوت الدم عِلگ روحين من سبگّ قميص تراب
صوت الدم هلاهل تسبگ الاذان من چان العطش محراب
صوت الدم غسل عمره بجرف شضه
وصلب برحيته بشفافه
ونفض كل السواجي عتاب
وعبر لاخر سمه خنياب
يغني الدنيا بجروحه
وماي طيوفه ماينشف
شما حسب سراديب الضمه من المامش تلوحه
صوت الدم گماري زلوف
ولچمة ليل تتبده وي كل نفنوف
وشريعه من المطر زاتوت مايعثر
شما ريگ بعطش مچتوف
يغرب وين لوشب بدرب شوگين من عمره مشاعل خوف ؟
صوت الدم مشاحيف العبر بيهه الضوه ولايات
ويٍلم الجروف هلال
صوت الدم خضار الله وصابع زمزم بخيط الگمر تنعه
وضفيره ازف ضوه مالف غنجهه خيال
وديرة كوس والوشله حطب چانت
بذمة ياعرج مبخوت مد ريجه بسمه التنور
بذمة ياشفايف غصن ديرم ماحچاهه الفوس
صوت الدم چفن منفوس
صوت الدم حده بروحه عله ممشه الفوس
محاچيه ثكاله وي الشمع تطفه وترد سچه
مكاتيبه تبات ع المنايه جناح
يزهگ كل حرف بيهه عرايس هم
يسافر حزن طرگ الدم
ينگط خيمه للبدن نحرهن شهگة موادع
يعتب والنزف بسكوت
مرساله يوشل الشمس غبشة نهد لو فز بالثياب غروب
مرساله يلف الدرب مطرة شوگ
يرسم لهفته بدمه
يِصليه الفشگ ويتوب
بعيونه محطة موت
وثيابه بريد وداع
مايدري بدفو حلمه بجفن برد الگبر غافي
والغربة خذت گلبه عله صدور الگطن بارود
بين رموشه ضحك مغيسل ايهفي سفر طوس لسچچ جرحه
بين جدامه بير احزاب يبلع يونس وي الحوت
بين چفوفه محبس ماشرب حس الچراچف صوت
صوت الدم غريب الصوت
يعبر گصب بعناد بگلب راعي
اولو ذيب السهر ساعي
چم نجمه بصرايف عيد تتبده الطواريه
صوت الدم يفر غروب المتاناه
يتغنه بروازين التلم الشيب
يگلب بالنجم بوجوه المسامر
يخم هروش الولايه بتراچي الموت
ويصيح انه الچفيت بكل شبر هندس عمر مصباح
هذا انه الينفض عنبر وي الريح من چان الفشگ مرواح
شِمرت الطيف بعيون اللحد مامش وطن ينباع
هذا انه بوطن حيطان كاغد والتراب نذور
لاسير برد بچفوف
لادخان دغدغ كل نوايه الشوف
صوت الدم يچل وي الهوى معاتب
يرد چانون برياگ الهوى مثاگب
يرد لولايته الضمهه التعب قربان
الغطتته سمه الشيله عله غيمه اخ
يرد فوگ الدروب شموع يمسح كل جدم لليل
يندهه كل اصابيع التزر العوز
عگبه مشگگه البيبان
صوت الدم غريب شماسگة البرگع شراينه
شما نثت كصيبه بجيده شوغة فيض مايقره
شماهوس ندى بوحشة سعف شوفه عذر كبره
صوت الدم سحگ كل المري ومارد
بچة ولايه تجاعيده برخص زيبگ
عبر چرباية ضنونه بچي ومارد
ضاعت گذلة احلامه سراب فياي
مشطهه الرمل دخان
اخذهه ابلا شگه النسيان
ضاعت دورة شموسه بگايا انسان
مستاهد وطن يحيٍه
صوت الدم علگ نيشان
لاهيل اليشم طوله وِيرد چفه لمعاضد شم
لاتسيورة الله عليه لاديرة حضن يلتم
گبل ادم غريب الدم
م
رد مع اقتباس