هنا

[فقار الكرخي]

هذا انه رسايل ماشرتهه چفوف
مخنوگه بشبابيچ التراب وجوه معگوده
هذا انه ضفاير ماعبرهه الشيب
لمهه الغيم بكتاره
ومضت بيد التعب شاره
هذا انه درب غربه
اجيس اجدام ال تمرني مساحي بسدري من تعبر
وگولن شتله مروه
هذا انه غصن توه
هذا انه عمر سنبل عله حلوگ
المناجل سابح بلوني
هذا انه نعش فرًاش بعيون الرمح مشيول
اضم رمشيني نگلة شوف
تاخذني الشبابيچي
يسدي من الدرب عاگول
هذا انه حمام اسمر
بعتبة كل نهر گطعي جنح مشتول
هذا انه غناوي الناس
هذا انه التراب اليطگ من يعطش مهفة ياس
هذا انه البچه ناسه ولا ردهم رفيف الكاس
الحزن رافگ عيون رماد
رفگه كل نثايا حجول
هذا انه بقرابين العطش
طيحة مطر مكتول
افرفح والتعب مگيول
اشاگف والنفس خنجر يحز الصوت
اخضر بالمرايه اعذار ويرده بطريجه الموت
هذا انه
هذا انه اجيت من التعب للموت
اجيت مكحل سنيني
مواويل وزعل مايصغر بخاطر
اجيت منگع بحزني عمر يجزي الثلاثينات
ماچني ابن باجر
اجيت لهلي وعيوني تطرگ الشوف بخدودي
وهدومي ركش فاله
اجيت وكل ضلع خنجر
وگلبي من البچي فاحط نحر ليله
وجدامي تفز مهره وتچل ثكله بنواعي
اجيت او ريتي ترابي ولاشب الهوى ساعي
اجيت الديرتي
لبيبان الولايه التغنه بدمه ال گطاعي
لروازيني عگد هندس
وليل ايمد اصابيعه
وي كل اصبع ينگط بير بعيون الصبح راعي
شميت الوطن صحره ودريت الگاع مو گاعي
لا شلالتي الشگره تلف طولي بجدايلهه
لا رملة محاچيّ جرف بشفافه شايله
لا مشحوف طر شوگه
لارگص الشبچ ينشاف وعيون الضوه تبوگه
لابردي اليدلي المنجل شما ضاع بعروگه
گبل طيف النخل مليوح
يزف الريح بعثوگه
السواجي بجيد ال حديثات
نجمة شوگ معلوگه
النهر ثوب عله ستر الطين
من ينشگ يطيح عله الجرف حمري
هذا انه اجيت مگيد بصبري
هذا انه وحيد من الحزن للخوف
هذا انه نحيل من الدرب للشوف
اتوچه بنوايه الحي عسه هلال بشليلي ايبات
وفر شكبان ع المرانه من ازهگ
عسى العنبر سمه ملاگه
اطش عمري عصافير عله سيد منعم من بعيد
لوطاح الگمر شط لضمه جروحي
لون ليليه ماتجزي لبيبان العشگ روحي
هاي عيوني صايح ليل
وضنوني عمر شچوه
ومسابح موت بچفوفي
هذا انه افرفح دهلتي دموعي
وخدي مشارة مشابگ
ولا چف حنطه سولفني
هذا انه حسن كهرب
مدفون بصراير طين
بلچت غيمه تاخذني





صفاء ثابت الغزالي

[ياقوت العزاوي]

جميل