ابوذيات ل كاظم اسماعيل الكاطع
الجو مغبّر يناهي اليوم وتراب
وعيوني تصد للضعن وتراب
حسافه تصير بين احجار وتراب
ونادي ولا ترد صوتي عليه
تعال وشوف بالدلاّل شيبات
كبرنه وصار اسمنه اليوم شيبات
اعاين بالمرايه وشفت شيبات
گلت ياروح هذا انذار اليّه
ظل غامض سؤالي اوياك منحل
وجسمي امن السهر يا ليل منحل
وحيِاتك صرت بين الناس منحل
العسل حصتك وانه اللسعات اليّه
اخيول اهواك يا مدلول عنها
بليل وگبل طرّة الفجر عنها
ارض چانت ممحله اشلون عنها
ارحل والعشب غز عالوطيه
دموعي فوگ روس الوجن ماحن
على الحنه دليلي وعلي ماحن
اشو وكتي لعب وياي ماحن
محن ايوب من رب البريه
انه مهدّم لكن وصلك بناني
وندم عالراح عضيته بناني
يشوفوني قوي وصاحي بناني
لچن في داخلي علّه خفيه
ذلولي هام بالبيده فتاها
عليك ويا شرع چتلي فتاها
زليخه انته صرت وانه فتاها
وصرت بيك المثل مضروب بيه
كاظم اسماعيل الگاطع
رد مع اقتباس
