يظل ذنب الخميس برگبة الجمعه
اجيتچ والگلب صندوگ
بي لهفه وعطر .. وبي خوف
خوف إشگد حلو . ..
بي ليل .. ليل بوجنته شمعه
اجيت وگلبي يدفعني
ايتعثّر يدفع الخطوات وادفعه
ربيع وخضّر الصبير
والشجره عروس مزوگه وحلّت گصايبها
ومشت بالشارع امفّرعه
ورّد كل هرش مدفون .. اصابع خضر
والورده اعله خصر الروح متربعه
جيتچ من طريق بعيد .. وبعيني
شكو بعيني....
اظن ضحكه خجوله مگبعه ابدمعه
اظن المستحه ويا حيف
لا ذنبي ولا ذنبچ
يظل ذنب الخميس برگبة الجمعه
انتي امن السنه العيدين
وانتي امن الاسبوع الويلة الجمعه
بيچ من الشمس وجنات
وانتي امن العيون الناعسه الوسعه
وانتي بالحسن فينوس
وانتي بالشعر فدعه
وانتي لليحب مكتوب
وانتي لليحارب خوذته ودرعه
وانتي للضرير إعيون
وانتي للوحيد الينولي فزعه
واذا للدنيا خمس فروض
لا .. انتي عليه افروض الچ سبعه
انا بلياچ ليل فراگ
لا ريّة گمر تلهث على الشباچ
ولا مطرب الحي يغني ونسمعه
وارخص وانشري وانباع
مدري بيا رصيف تصير شذرات العمر سلعه
ولو يحچي القطار الجيت بي چا گال :
دگات الگلب .. غلبتني بالسرعه
جيتچ معتني خطار
مثل الهور من يگصد محب خطار
ياخذ كل نسيمه ومايه وطيوره
خليت الگلب عالماي
واستنظر..
اذا ما صارت القسمه
اتيهه وتاخذه السوره
بعيونچ بحر واسرار
وسيوف وسمه ومحّار
بعيونچ شعر مانعرف ابحوره
بعيونچ ضحك وادموع .. وهمس
ماندري بيه مسموع لو ممنوع
بعيونچ مغني اخرس يهنيال العرف طوره
وعرف علته وعرف طبعه
اظنه المستحه ويا حيف .. لا ذنبي ولا ذنبچ
يظل ذنب الخميس برگبة الجمعه
كاظم اسماعيل الگاطع
رد مع اقتباس
