بصدورنه حچايه ملامه
( فاگدينك )
فاگدينك وتر ليل
اليعزف الگمره عله كل مسرح شواطي
وترگص بروجاته ضيّ !
فاگدينك فرحة عيون المناجل
لو ثگل حزن السنابل ونكسر بالطين فيّ !
فاگدينك غيمه يتراجف نهدهه چلمه چلمه
فوگ صبير الدفاتر
فوگ من العمر غربه
ونت كل ماضاع ضيك نعش نغبش
هاك نشف كل سواجي الغربت بصدورنه حچايه ملامه
او لا رمل شوفك شربهه
هاك لف ضنونه بمحراب جيدك
وبمراسيل القيامه بيرغ لكل توبه خذنه
يامطر عازه شتهينه تغسل دروب التضم حزنك غناوي
تترس الدنيا گلايد لو فهه الطوگ وي ضحكه كل گصيبه
تبزغ بكل خطوه سجادة خضار
فاگدينك !
لاتطفي نجومك النشرب ضواهه
وترشد الليل عله عذرك
هب سموم بعين كل ميت بچاك
وامشي نعناع عله طولك لو نهر ليله شتهاك
كل حرير تلمه تسبيحه بصبعك
كل نفس لهفه يشبهك لو ركض رگبه عله سندانه دخيل
من نتيهه بعين كل شتوة تزفنه درب مشراگه نرسمك
ياحرير شضار حظنك
لو نسه خيوطه عله چف مغزل سبيل !
ياحرير
بين برحي شفافك مگدر حزنه
من رماد ثيابنه لروحك اخذنه ....
فوگ كل شاطي نذر عمره عله هيمه يموت شاعر
فوگ كل نخله شعب دخان غنه
وچد التنور عينه والسعف مر برمشهه خيوط كحله
ذاك همنه جدام ثكله
ذاك همنه فايض بحزن الخرايب ما كسر للگاع خاطر
ذاك دمنه عابر سنين البراري ماشرنّه شموس فرهه
يرجه كل مشحوف حافي يحبل بجرفين باچر
ذاك شوف رموشنه گبالك يزيف
ماحونه عشوش طيفك
اخذ دورة مستحانه وذاك نباع الحچي العاگد مكانه
ماعبر صوب الشفايف
اخذ روح جدامنه جنازه بمرامك
فاگدينك
والگلب طرگ شرراينه عله سدره
ونهر حدر الدم مشالك
انت ياخشبة عرايس تنثر العيب بصواني
حتى نگاط الشمع يفرش لهاتك
انت من ياقبله اجيت بدين نحرك ؟
بين اصابيعك اخذنه ومن جديد ارسمنه كفره
فوگ رملة مشتهاتك
سبل رموشك نشيد
وفضح دموع الضلام
النگعت بكل طول فاله
انت يملولح ندى گليبك عذاب
ضيع چرچف لو ثگل بعيون رمده طيف شباچين ضيع
بيع روحك لو رخص بدروبنه متاناك بيع
حسبه وي الشمع ضيع
عطر وي نفنوف كل غفوة بنفسج حسّب يغنيك ضيع
لو فهت بچفوفنه سنين الرسايل
غرب بعشگك ربيع
ليش تانيت السراب هلال فيضه يچفي نگاطك صحاري
ليش والمت الشحيح متون معبر
ذاك شوگك شابخ ضعون الضهاري
ويعبر عگود الطلاسم لو رخص چلمه حريرك
چلبت فوگ الصدور الگالت مرادك مشاعل رمح شايط
ليش ساومت القصيده الحلفت بدمنه تجيبك
ونت تدري الاخ عثره
وين هزيت الچفافي وبايعت رخص النواظر
وين حليت الضفاير ونچفت كل غبشه هندس
فرهدت كل النوايا الصلتك حنة نذوره
ضاعت احلامك سفر ريش بتراب
وجع صبخة كل حرف بيهه يصيحك والكواغد بير چانت
لغير ديره تمشط بريحك ليالي
لغير ديره يزهي لونك غيمه لفتوگ السكاره
مسافر بحزنك الابيض للشمس تشتل صباحك
تريد كل لمعة جفن ثايه عله دربك
عابر بروحك ثواب عله الشضايا الچتفن عمر السنابل
والأصابع چانت بلون السمه گبال المحطه
دير وجهك نشفت شفاف المناير
غطي زلفك عبرت عله بليس هلهوله الضماير
ونت كل چانون صاحك حطب حايل ثلج تفزع
ونت بعناد البيادر تطفي ريحك
ونت كل ماجاسك عتاب القصايد
گمره من كل خوره تطلع
عودت كل الشوارع گبل مسحگ ليل تفرشلك صدرهه
عودت كل الحناجر تندب اسمك لو بهت صوت البلابل
ليش ماخذت الشموع الباتت لوجهك جرايد
ونت كل ضحكه بسمارك تسحل الجنه گناطر
ليش عبرت الحزن چذبه بقميصك
ليش سولفت الضباب دروب نثيه
فاگدينك شذر والريه اصابع
فاگدينك جنح بِشباچ السواتر عطش ضايع
بين صوبينك يزمزم
وزه بردي استاحش ايغنيك ليله
ونت بابك للعثر شوگ عله رزة مشتهاته ايبوگ حيله
ركضيت الگمر ديره
يلهث بمهرة زياجك ضوه خيله
ضيعتنه هروش والدنيا مساحي
غربتنه تراب والخطوه سواجي
عاتبينه الفرح ليله
وگمنه نتوسل حزن كل المعاضد غاد يلعب
انت يا سباح باچر
صُوغنه من الماي گطره تِبدي ناعور الرسايل
جِيس كل ذابل ضريح بديم ريجك
فاگدينك
حدر شوغات الضلوع تهفي شوگك
من ينزّ غروب لچمه
فاگدينك فوگ سكتات الرموش طيوف نجمه
فاگدينك
فاگدينك
م
رد مع اقتباس
