انه والحسن وحسين كمنه
صلاة الوحشه بويه انصلي لأمنه
آه آه نبضات الكلب اه اه ضماهه الترب
صلاة الوحشه بويه انصلي لامنه
**************
اخوي الحسن نادانه ابكلامه
غدينه اليله من امنه يتامه
خل انگوم يخواني ابسلامه
ابصلاة الوحشه نطرد كل ظلامه
الظلام العتم الدنيا بهجرها
الجنه استانست تشتم عطرها
أه اه فرگاهه صعب اه اه ضماهه الترب
*****************
الجنه استبشرت صارت وطنها
ودار المرتضى مفجوعه چنها
جنه البارحه نغفه ابحضنها
وظن هسه الترب غافي ابجفنها
چفها المدمي من فرت رحاهه
وسفه الترب يابويه غطاهه
اه اه حگها منغصب اه اه ضماهه الترب
*****************
گبل صلينه للهادي قبلها
صلاة الوحشه والمحسن طفلها
لچن ماحسبينه انصلي الها
صلاة اموادع الزهره لهلها
کبرنه اودمعنه اويانه كبر
وابكل ركعه عالوجنات حدر
اه اه يهتف من يصب اه اه ضماهه الترب
*****************
يبويه حسين اشوفنه ابصلاته
ابحياته ايجود للچانت حياته
غدت وسط الگبر كل امنياته
تنوح اعليه بالطف ابمماته
چنت اسمع تراتيله ابقنوته
يريد الزهره تحضر كون موته
اه اه بهوال الحرب اه اه ضماهه الترب
*****************
غدينه كل فرد لحضة ركوعه
على الخدين تتگاطر دموعه
واخوي حسين ناداهه ابخشوعه
الهشم ضلعچ غدا يسحك ضلوعه
ينادي اودمعته بعينه غزيره
المصيرچ فقط يتشابه مصيره
اه اه مابين الغرب اه اه ضماهه الترب
*****************
يبويه اوداعت الزهره الزچيه
تمنيت الصله ركعات ميه
حتى اشرح عذاب الغاضريه
من اروحن عالهزل بويه سبيه
ابصلاتي استذكرت لمصاب الحسين
ختمنه ابدمعه يابويه الركعتين
اه اه گلبي الملتهب ** اه اه ضماهه الترب
---------------
*الشاعر: مازن الشطري*
*اداء: عمـــــار الكنانــي*
---------------
رد مع اقتباس
المشاركة الأصلية كتبت بواسطة sawsanmahmoud
