درر العراق

نوفل أُسامة · 29/February/2020

١ / احنة يحسين النحبـك
وانت مو لازم تحبنـة
بالعشك خلينه نتعـب
واحنة راحتـة بتعبنـة

ها يحسين وانت منـة وبينة
وين تريد براحتك خلينة
المهم كون من نموت ڪَبالك
كون نموت وانت راضي علينة

روح ياصاحبنة بالخيمة استراح
واحنه ويـَ عباس نتلكَة الرماح
واحنه واحدنه سهم لمن يطيح
عـ الأَقل يكتلة واحد كون طاح

تشوف بعينك عشكَ سبعينك
______________________

٢ / ماحسبنه حساب غيرك
انت الاول وانت الأول
انت من تزعل علينـة
احنـة هم علينه نزعل

خل نرتاح يله دير متونك
نصطف شوك وانت غمض عيونك
حتى نصيح باسمك وتتباوع
واحنه نكول ها حسين شلونك

عدنـة شغلـة وياك لاڪـن مستحين
مره وحده نريد تضحك يالحنين
هو مو وكت الضحك بس من تصير
نركض عله سهامهم متسودنين

تشوف بعينك عشكَ سبعينـك
______________________

٣ / باچر تفشل رمحهم
نحرك يصير احلى منـة
وفشلة منك يابو الأكبر
من نرد لـ بيَوت اهلنـة

كون الخيل ڪَبلك احنة تدوسنـة
ويمشي وياك عـَ الرمح ناموسنـة
فشله يروح عـَ الرمح بس راسك
واحنه وياك صار خير بروسنه

احنة لو ما انت ما نعرف حرام
ولانشيل جفوفنة ترد السلام
احنة سبعينك ومو كُل سـاع راي
انت اشر واحنة نركض عـَ الـّسهام

تشوف بعينك عشكَ سبعينك
______________________

٤ / يا نهر محـد يمُلكـك
تمـُلك الدنية واهلهـا
والنهر لو مرله ديرة
ينحسب للديره كلها

يـ مريت بس اسم بديارنـا
وانحبيت حتى عد زغارنـا
چنه نڪَول لـ اليڪَول شلونكم
زين حسين يعني زينـة خبـارنا

عدل ميت ماضل يمك غريب
ساتر الدنيا يبو الثوب السليب
بلا شـمحصل الماميت عليك
عود من يزورك يسجلة حبيب

تشوف بعينك عشك سبعينكَ
____________________

٥ / لازم تعــــذرة اليحبك
لـو فُڪَد عقلـة وصوابـة
انت حتـى الـ مالة والد
من يجيك تكلـة بـابـا

ماخليت واحد يحس ضايع
حتى الطير من نعمتك شابع
يالمرتين متت يابو سكينه
عاشر يوم وحده يوم السابع

يالحنين ومن شفت عباس مات
متت يمه والله ردك لـ الحياة
الله خالق كُلشي لاجلك ياحسين
الناس والحُب والڪـواڪب والصلاة

تشوف بعينـك عشـكَ سبعينك

_______

اداء : فـاقد الـمـوسوي

ڪـلمات : محـمد الـموسوي

تـدويـني