هنا

[نـايـا]

هاي شنو الظاهر فضولي بـ الاسئلة ازعج بعض الزملاء ^__^
اني كلش اعتذر منكم و ان شاء الله احاول اقلل فضولي لأجلكم ^__^

ع طاري الفضول

١ _ اذا سويتي عزيمة للاعضاء و بيتج ما يكفي غير لـ ١٠ اصدقاء ، منو راح تعزمين ؟ (تخيلي تخيلي لان ادري بالواقع لو تموتين ما تسويلنه استكان چاي)

انصب جادر واعزمكم كلكم مستحيل افرق بينكم
انت دائما تحاول تشوه سمعتي رامي ترة تحملتك هواي بهذا الموضوع من شوكت اني بخيله يا جاحد

٢ _ شوكت تصيرين عصبية و انتِ بكل وقت بالمنتدى تضحكين و تحششين ؟ تره هذا برود الاعصاب يزعج البعض او بعتبار البعض صارت كلمة ما محببة من وره حيدر العبادي خلي نگول يزعجني الي ^__*

هههههههه والله يا رامي مو من مصلحتكم اعصب تحملني واني ريلاكس

ماكو شيء يستوجب العصبية ..او انت تعرف كيف تصيغ السؤال وما عصبتني تجعل الواحد يستقبلة برحابة صدر

٣ _ هذا السؤال يحتاجله صفنة منچ ، في حال چنتي بمكان سامر و المُنتدى مُلك الچ ، و اكو اشخاص يزعجوج و يزعجون غيرج ، شنو حيكون رد فعلچ اتجاههم ؟ ترحين لخيار الحظر لو تعتقدين التجاهل يجيب نتيجة لو شنو حتسوين بالضبط ؟ ^__^

اذا يزعجني افضل التجاهل
اما اذا يسبب مشاكل الغيري اكيد خيار الحظر بالنهاية ماراح افضل عضو على مجموعة اعضاء


٤ _ شنو الفرق بين ما احبج و احقد عليج ؟ تگدرين تنطيني امثله من واقع الدرر حتى افتهم جوابج ؟

الي ما يحب يكدر يتجاهل وجودي وتمشي حياته طبيعية
بس الحاقد يحاول ينتهز اي فرصة ويضرني بيها

ماعندي امثلة

٥ _ بصراحة نايا ، تعتقدين وجودج بهذا الموضوع وبهاي الفترة خلاج تنفسين عن نفسچ شوي و حسيتي انه هذا منبر حتى تدافعين بي عن نفسج ما اقصد عن مشكلة مُعينة بس اقصد بشكل عام ؟
ادافع عن نفسي لا ابدا ..صدكني مامضطرة ابرر اي تصرف طالما قانوني
بس احيانا نحتاج نخلي النقاط على الحروف حتى تتوضح وجهات النظر والكل يكون على بينه

٦ _ منو من المراقبين حالياً تعتقدين بي انه مؤهل يكون نائب و اذا ماكو فـ مابيها اي احراج هذه وجهة نظرج ، و منو من المشرفين تعتقدين مؤهل يكون مراقب ؟

ماراح اجاوب حتى محد يضوج ههههه

٧ _ شنو رد فعلج من تشوفين واحد يزحفلج بس المشكلة هو مؤدب وما غلط بكلمة وحدة او تجاوز حده ؟ هع

قصدك اخلاقي

عادي اخذ الموضوع بالمزح وتصير مرات

٨ _ ثنائي بالدرر كلش تحبين الصداقة القوية بيناتهم ؟

قاسم علي الشمري راهب فم اللبلاب عمو العراب

٩ _ شنو چان حلمچ من چنتي صغيرة و من كبرتي شفتي چان مستحيل يتحقق او اصلاً نسيتيه بمرور الوقت ؟

ما اذكر


١٠ _ اكثر سؤال محرج طرحته اني و ما جاوبتي عليه بصدق حتى لا تزعلين احد ؟

رقم ٦

[نـايـا]

احم احم

بأعتبارج تغلسين عن الاشياء الخاصة

خل اسئل عن اشياء عامه


1 . ليش الله يكول كيدهن عظيم عليجن ؟
ومن نجي مثلا عليج نلكاج حبابة وطيوبة وماكو منج
معقولة جاي تمثلين علينه
لو الاية الكريمه بيها اشكال .

اذا تجي للقرأن فاول كيد كان من اخوان يوسف ..يعني انتو علمتونه هههه
انت الاحسن فقار تسلم


2 . هسه اذا اعيش حياتج
اعيش مرتاح لو شابع قهر

لا ما توصل للتخمة مال القهر هههه
تعيش حياة معتدلة بين وبين


3 . اذا اجة هسه اجلج ومتي
حسب رأيج بالمسويته بحياتج
الله وين يذبج بالجنه لو بالنار

اعتقد بالنص ههههه

4 . شنو مشكلة النسوان
من تريد تحط كحلة تفتح حلكها
وين الربط

حتى ما تتحرك عينها وتنفكس

5 . قدمي نصيحة للبنات الما متزوجات
بأعتبارج صاحبة تجربة

ابني مستقبلج الخاص وبعدين فكري بالزواج

6 . تعالي خلي هاي الاسماء بالترتيب
من الاكثر معزة الى الاقل

امج
زوجج
الله
عمتج
الوطن
ابوج

اعرف كلهم عزاز عدى عمتج بس سفطيهم

هههههه شكد ظالمني

الله
امي ابوية ..متساوين بالمكانة
زوجي
عمتي
الوطن

7 . تكدرين تذبحين دجاجة

لا يمه

8 . لو حياتج كتاب
شنو ممكن يكون عنوانها

ملل هههه

9 . شي سويتي ولساعج نادمه عليه

ماكو او ما اذكر هسه

10 . كل الاعضاء يكولون عليج بخيلة بالتقييم .
معقولة يجذبون ؟

لا حشاهم ههههههه
بس ناكرين

هسة قابل راح تخسرين شي من تقيمين
لو راح يتغير لونج
المن ضامتهن للعيد ؟
حتى بالعيد هم متنطين تقييم

الله يساعد المجدي اليدك بابكم

هههههه والله انسى مرات شجاكم منا وهيج اداريكم بس اعتقوني



واكتفي بهذا القدر
واشكر الطيبة فريال
حسب ما كال رامي اسم نايا هو فريال

ليش مو دلال
ههههه
حياك الله فقار

[نـايـا]

من خلال مفهوم علم النفس
الصراحة- الهدف العام- الهزل والجد- القياسات واللون- متابعة برامج معينة- الخطوط الحمر- الرأي في المتحدث،
نستطيع فهم الشخصية ان كانت الاجابات صادقة بدون مجاملة.
شكرا للتواصل.

شكرا جزيلا لتحليل الشخصية
انرت اخي

[الملاذ الاخير]

صباحكم ورد وجمعة مباركة

رجعنالج نايا :

1- شنو برجج ؟ وهل عندج ايمان بهاي الشغلات ؟ واذا عندج ايمان وشعجب ماكو سعاد العفو اذا عندج ايمان بيهن ليش مانشوفج تدخليلهن ولا تردين اي رد عليهن ؟
2- الاحداث الحالية والوباء الحالي اكو عالم تكول حرب الجيل الرابع ( الحرب البايولوجية ) ؟ شنو رأيج ؟
3- لو كان نهار الجمعة اخر نهار الج بالحياة شنو راح تسوين ؟
4- عضو وشخص اخطأتي بحقه ومتندمة على خطأج ؟
5- ايهما اجمل ، العفو ام العطاء ؟
6- علاقات النت الاجتماعية ( حب النت ) شنو رأيج بي ؟


شكراً نايا

[حلم عمري]

مرحبا اختي

[نـايـا]

صباحكم ورد وجمعة مباركة

رجعنالج نايا :

1- شنو برجج ؟ وهل عندج ايمان بهاي الشغلات ؟ واذا عندج ايمان وشعجب ماكو سعاد العفو اذا عندج ايمان بيهن ليش مانشوفج تدخليلهن ولا تردين اي رد عليهن ؟
هههه

برج الدلو
احب اقرأ الابراج بين فترة واخرى لكن ما عندي ايمان مطلق مجرد معرفة وتعجبني صفات الابراج اكثر من التنبؤات اليومية

2- الاحداث الحالية والوباء الحالي اكو عالم تكول حرب الجيل الرابع ( الحرب البايولوجية ) ؟ شنو رأيج ؟

رغم هذا المرض شائع لكن ماعندي متابعة كافية لإبداء رأيي
الله يبعده عن الجميع ..ويشافي المصابين به

3- لو كان نهار الجمعة اخر نهار الج بالحياة شنو راح تسوين ؟
اودع اهلي

4- عضو وشخص اخطأتي بحقه ومتندمة على خطأج ؟
عضو ماكو ..وان كان يوجد اطلب المسامحة منه
شخص ايضا ماكو

5- ايهما اجمل ، العفو ام العطاء ؟

المرتبة الاولى العفو ..يجعل النفس مطمئنه
العطاء ايضا شي جميل

6- علاقات النت الاجتماعية ( حب النت ) شنو رأيج بي ؟
العلاقات العامة وتبادل الرأي والثقافات تزيدك معرفة واطلاع
علاقات الحب اشوفها مجازفة عبر النت ..خصوصا اي شخص يكدر يتقمص شخصية تختلف عن شخصيتة الحقيقية
وبكل الاحوال اذا اشخاص ناضجين ويقدرون هذا الرابط لابأس

شكراً نايا

جمعة طيبة ومباركة على الجميع ..اوقات سعيدة عليكم دررنا

الشكر الجزيل لك احمد

[نـايـا]

مرحبا اختي

اهلا حبيبتي

[الملاذ الاخير]

جمعة طيبة ومباركة على الجميع ..اوقات سعيدة عليكم دررنا

الشكر الجزيل لك احمد

ما ادري توقعت راح تكولين برج خليفة لو برج ايفل

المهم جزيل الشكر الج نايا .. وشكراً لرحابة صدرج
نتمنالج التوفيق والسعادة


نشوفكم مع عدد جديد وضيف جديد بعون الله
يغلق الموضوع مع الود

[نـايـا]

شكرا جزيلا احمد على حسن الضيافة