مساءكم وصباحكم ورد
اليوم المزاج هَم مو زين بس يكولون شوية أحسن من البارحة، المهم أريد أسلّط الضوء على المشكلات اللي يعاني منها التدريسي -يعني الأستاذ- بالجامعات العراقية، رح أكتب المشاكل اللي شفتهن ويا ريت اليعرف بعد يكتبهن هنا مشكوراً.
1 التقييد الشديد: هاذي مشكلة نواجهها لمن نريد نختار مناهج مقررات للطلبة، يعني ننجبر نلتزم بالكتاب اللي مقررته اللجنة القطّاعية -لجنة العمداء- بحجة إنه كتاب رصين، المصيبة هذا الكتاب قديم أكل عليه الدهر وشرب وأغلب معلوماته تغيرت بالوقت الحاضر، بس ما أدري شنو سبب التزمُّت عند لجنة العمداء وعند الوزارة اللي تخلق من التدريسي الجامعي -خصوصاً الذين هُم في مرتبة مدرس مساعد ومدرس- ببغاء ؟! بينما في الدول المتطورة تعطى حرية للأستاذ الجامعي يختار اليشوفه مناسب لكن بعد موافقة عميد الكلية اذا كان الاستاذ حديث العهد بالتدريس.
2 الترقيات وما أدراك ما الترقيات، بلاءٌ أنزلته وزارة التعليم الواطي -قصدي العالي- على الاستاذ الجامعي المغضوب عليه، يجبروك تكتب 4 بحوث اذا مو أكثر حتى تترقى من مدرس مساعد الى مدرس والمرتبة الوراها ما أدري بس أكيد كارثة وقهر، والأدهى والأمَر يجبرون اللي يريد يترقى الى مرتبة استاذ مساعد يجبروه على النشر في مجلة سكوباس ، طبعاً مجلات سكوباس أكثرها شركات يعني اذا بحثك خريط بخريط ما طول انت تدفع رسوم النشر اللي ما يقل عن 500 دولار للبحث رح ينشروه ومن تكمل نشر بحثين مدري ثلاثة وتنقط ب1500 دولار على الأقل ذاك الوكت تترقى الى استاذ مساعد .
3 الأساتذة اللي يشرفون على رسائل ماجستير وأطاريح دكتوراه: هذولة مفروض الوزارة الموقرة تنطيهم أجور اشراف لأن هذا شي مو سهل، تخيل يجيك تكليف تشرف على 3 طلبة دكتوراه و5 ماجستير .. يعني لازم تنطي تليفونك لطلّابك حتى يخابروك ويحددون وياك موعد يجوك بيه للكلية يطلعون الجزئيات مال الرسالة أو الأطروحة -حسب مرحلة الطالب- وانت لازم لو تقراها كدامهم وتؤشر إلهم على الأخطاء لو تاخذهن للبيت تقراهن تتعب عيونك باختصار شغلة كلش نحسة، تدرون الوزارة من سنة 2014 وانتو جايين لغو الأجور على الاشراف؟ يعني اللي يشرفون على رسائل ماستر وأطاريح دكتوراه صار ما ينطوهم فلوس بين قوسين اركض والعشا خُبّاز، طبعاً حُجَّتهم السخيفة حاضرة (تقشف وموازنة العراق ما تكفي بسبب انخفاض سعر النفط) زين اذا قبلنا سخافة الحجة المذكورة ومشيناها من 2014 الى 2017 لأن نزل النفط وكنا ملتهين بالصرف على قتال داعش الإرهابي، بس وراها عذركم يا وزارة ما مقبول أبداً لأن الشكر لله صعد سعر النفط وخلصنا من داعش، بس الظاهر أكو تقفيص بالموضوع تريدون عمل قسري (سُخرة).
4 بالكليات الأهلية : معظم الكليات الأهلية المستحدثة ما تضمن حق الأستاذ، طبعاً يطلبون منه طلبات متعبة مقابل راتب تافه غير مُجزي، وإذا تعترض أو ما تعجبهم يفسخون عقدك ، وللعلم أكو كليات أصلاً ما يسوولك عقد حتى لتحتج عليهم وترفع ضدهم دعوى بالمحكمة، بس الصوج من وزارة التعليم الناصي والبحث العدمي اللي ما بيهة خير تضمن حق التدريسي بالكليات الأهلية.
5 أكو شغلات كانن ببالي قبل ما أكتب هالموضوع بس نسيتهن لأن مخي بعده مشوّش اذا هنا أستاذ جامعي يواجه أو شايف مشاكل أخرى حبذا يتفضل يكتبهن والسلام عليكم
رد مع اقتباس
المشاركة الأصلية كتبت بواسطة Suzana
