مسّاكم الله بالخير لليقرون الموضوع هسة أو بالمساء، وصبّحكم الله بالخير لليقروه الصبح:
اعذروني ما راح اكدر أكتب بالفصيح لأن راسي دايخ ب5 أوراق بحث وسمينار ولأن كلبي (الكاف ثقيلة g) مورّم من التعليم الجامعي وطلايبه ، قبل ما أبدأ اذا الموضوع مكانه بغير منتدى خوية الاداريين انتو انقلوه للمكان المناسب بلا ما تنبهوني بس مو تودّوه للمكرر ترة هذا يسموه تدليس واحتيال ههههههه.
هسة نبدي وياكم بسلسلة المصايب وأريد تكتبون اللي تعرفوهن بعد :
أول شي على مستوى الدراسات الأولية (البكالوريوس) ، المناهج المعتمدة مِن اللجان القطّاعية أغلبها قديمة ما تواكب روح العصر والتطوّر اللي صار بالعالم، يعني الطالب المسكين يهلك دراسة تالي من يتخرج يريد يشتغل باختصاصه ينصدم لأن أغلب المعلومات اللي أخذهن من الكلية حالياً متغيرات، زين يا لجنة العمداء ليش ما تعتمدون كتب جديدة ؟ راح يجاوبوك جواب روبوتي سخيف (المناهج المعتمديهن يمتازن بالرصانة والكتب المؤلفة بالوقت الحاضر مابيهن رصانة) .. سلامات يا لجان العمداء يعني تضحّون بعلمية الطالب الجامعي علمود رصانة؟!!! زين معقولة هالأساتذة الشباب اللي ديتخرجون من الدراسات العليا واللي معلوماتهم جاي يحدّثوهن يوم بيوم معقولة محد بيهم يفتهم ؟!!! هذا تزمُّت فضيع ، والأدهى من هذا اذا انت استاذ لمادة معينة تريد تترك الكتاب القديم المترّب وتنطي للطلبة كتاب جديد وبيه رصانة رح تلاقي معارضة بحجة سخيفة أخرى مبنية على سخافة الحجة الأولى (لازم تدرّس عالكتاب القديم لأن معتمدته اللجنة القطاعية يعني لجنة العمداء) الظاهر لجنة العمداء آلهة ومؤلفي الكتب القديمة أنبياء فاللي يخالفهم كافر زنديق يستحق الجَلد.
ثاني شي على مستوى الدراسات العليا -الدبلوم العالي والماجستير والدكتوراه- :
أول شي بالسنة التحضيرية تنذبح على قبلة محمد ، تهلك دراسة امتحانات وبحوث وأوراق عمل، كل هذا ويا ريت تعبك وكتابتك تعجب الأستاذ ، ما أشمل الكل بس أكو أساتذة شتجاوبه ميقبل ، ثاني شغلة بالمناقشة ويا ستّار من المناقشة: لجنة المناقشة عدهم سياسة كارثية أول ما يبدي يناقشك يمدحك بكلمتين ثلاثة بعدين يحط الفاصل اللي هو عبارة عن التحضير لعملية ذبحك بسيف أعمى ، يكول (رغم الجهد اللي نشكر الباحث عليه لكن يبقى عمل بشري لا يخلو من الأخطاء ، لذلك لاحظنا الأخطاء التالية:) ويخبزك ب20 غلطة -نصهن مصطنعات- طبعاً بعض قليل من المناقشين أسلوبه رزالة مبطنة يعني يمسح بالطالب الكاع ، باختصار بس ناقص يوكفك قصاص على تَك رِجِل يَم سلة الزبل ويكلك افتح ايدك ويخبزك 12 عودة مثل سالفة المتوسطة، واذا حظك واكع من الطابق الثاني يصير بلجنة مناقشتك عضو متعارك وية مشرفك .. خالييييي الّا يجرم بيك ويطلع ثاره وية مشرفك براسك وأنت يا مسكين تبلعها وتسكت حتى لا الأفندي يتنرفز ويرفض رسالتك ويضيع تعبك نكاية بمشرفك.
ثالث شي علاقات الجامعات مع بعضها :
هنا تسكب العبرات من المصائب الغبرات، اللي عنده عرف باللجان القطاعية خلي يسأله عن الكليات المتعاركين بيناتهم، واللي حتماً ينعكس على الطلّاب المساكين مالاتهم، لذلك عزيزي خريج البكالوريوس لمن تريد تكمل ماستر بكلية لازم تعرف علاقتها بكليتك اللي خرجتك حتى لا يلعبون بيك طوبة ونفس الكلام نوجهه لأبو الماجستير اللي يريد يكمل دكتوراه بكلية غير اللي كمل بيهة ماستر، وطبعاً العلاقة تنعكس على لجان المناقشة فإذا شفت أستاذ من كلية متعاركة وية كليتك نصيحة اختم القرآن قبل ما تفوت لأن رح يشويك .
باختصار التعليم الجامعي بالعراق إجرام بحق الطلبة المساكين خصوصاً الدراسات العليا، هذا كلام عن تجربة طالب دكتوراه ومشتغل بالتدريس الجامعي 3 سنوات، ملاحظة الكلام غير موجه الى كلية الحقوق -ولو اليوم فلشونا تفليش دك أوراق عمل ههههه- بس شفتها من حظرت مناقشات أصدقائي -بدون ذكر تخصصاتهم ولا كلياتهم- وشفتها من درّست الأولية والمعلومات الملغية اللي بالمناهج القديمة.
بالنهاية سلامتكم وسولفو لي اذا أكو بعد مشاكل تخص التعليم مو يجي واحد يكلي (البنات متكبرات واذا تصارح تنضرب بوري) ترة اضربه بوري ههههه
رد مع اقتباس
المشاركة الأصلية كتبت بواسطة Mohammed K.F
