هنا

[د. حسن سعيد]

حاليا سياسة الادارة بقسم النقاشات واتصور هي الاهم انه حرية التعبير والراي والمعتقد مكفولة للجميع دون تمييز عضو على حساب عضو آخر ودون التعرض لاي عضو مختلف معاك في تفكيره او معتقده بالاساءة اللفظية ..

ولو صعب أثق بهالسالفة مال حرية التعبير لأن شبعت عقوبات بسببها ، لكن ما دامت صادر منج معناها ثقة أما غيرج اعذريني ما أضمن أحد الا ما ندر

[Suzana]

حذف المواضيع التالفة طبيعي وضروري لضمان انسيابية قاعدة بيانات المنتدى، لكن يا صديقي لمن تنحذف مواضيعك وجمالة تتعاقب لأنك تخالف الإدارة أو دافعت عن رمز من رموزك في مقابل تهجم غير لائق من أحدهم عليه هذا سبب وجيه لترك المنتدى ليس فارغاً كما تظن يا عزيزي

اي تهجم غير لائق راح يكون بيه اجراء

[Suzana]

سسوزان ممكن اكلج شيء

تفضلي

[د. حسن سعيد]

حبيبي جانن يمثلن وجهة نظر الشارع و قضية غلقهم تعود ل اسباب شخصية ، خاصةً و ان دومين شط العرب متواجد عند فادي فالح مدير منتديات فنر توب لان هو مسؤول الاستضافة فـ يعني كل البيانات موجودة لحد الان ، ماكو اي نظرية مؤامرة بهل موضوع سيدنا هههه بس هنه تراجعن بسبب دخول الفيس بوك ذيج الفترة والناس راحتله بسبب التطورات لان المنتديات اصلا مجان بيها طريقة للتواصل ، يعني رسائل خاصة جانت محدودة و رسائل الزوار هاي ميزة طلعت ب ٢٠٠٩ وحققت طفرة نوعية

وين رحت حبيب قلبي؟ مو سالفة مؤامرة بس فعلاً الفيس بوك هو السبب يعني مثل ما كتلك مو شغلة ادارة وأعضاء إنما أسباب تقنية

[نـايـا]

محتاجين جايات لفات

هاي كل المشاكل بسبب الادارة
زين والاداري الي يترك بسبب الاعضاء هذا ماله حق تذكروا

[الملاذ الاخير]

حياك الله دكتور

يا اخي من تشوف واحد يحجي
ويكول بعض الاداريين موزينين

يا اخي كول منو هذوله حتى الاعضاء تعرفهم منو

بعد ليش ساكت عن الحق
اذن انت اسوء منهم


كول مثلا فلانه ظلمتني بكذا موضوع

وخل اندز على فلانه واناقش سبب ظلمك
مو بس تلمح وما تذكر اسامي
حتى ميجي فلان ويطلع سوالفك السودة



ممنون منك دكتور يا طيب

فقار احنة اذا نبقى نجيب فلان ونجيب فلانة فاليوم الدين مانخلص ..
اكو اخطاء فعلاً واكو اعضاء انظلمت محد ينكر هذا الشي .. اللي نريده شنو ؟

نتجنب الاخطاء اللي صارت من الجانبين الادارة وسائر الاعضاء
مواضيع النقاش جاي تسبب هواي فراغات بين الاعضاء من خلال تصادم الافكار .. واني احد الاعضاء اللي انسحبت من النقاشات لان ما اريد اخسر احد من الاعضاء لان شفت بعضهم جاي يتشنج ويضوج
اكو اعضاء كوفئة جداً ويليق بيها المنصب الاداري مثل حضرتك ورماد .. وشفت بوادر التغيير نحو الافضل بالادارة الحالية
سوزانة ونايا ومراقبين دمهم مثل العسل ..

اتمنى من الجميع واني خادمكم واخوكم الزغير .. تنسون الخلافات القديمة وتبدون بداية جديدة
ماندري كل شخص شكد بعد يطول .. ماتحسون غير موضوع انشر فلان في ذمة الله .. شنو راح يكون موقفك من هو زعلان عليك .


راح نقدم مجموعة حلول في ضوء المشاكل اعلاه بس نطلب العمل الجماعي من الجميع
وماكو احلى من ينذكر الانسان بطيب .. والله العضو فلان جان افضل عضو بالدرر الله يحفظه ويرجعه بسلامة

صدكوني حقكم تعتبون بس كثرة العتب هم موزينة واحنة مو بس اصدقاء ان شاء الله اخوة ويجمعنا هالصرح الجميل
واتمنى للجميع الموفقية وان شاء الله نشوفكم باعلى المراتب


اسف ع الاطالة
تحياتي

[د. حسن سعيد]

مسألة أخرى نسيناها ، قضية تجميد المواضيع الترفيهية، يعني اذا شوية صارت دردشة بموضوع هو أصلاً من المواضيع المستمرة بسرعة تنحذف الردود واحتمال ينغلق الموضوع، هذا شي سمعته من أكثر من عضو وربما كان سبب مغادرة بعضهم، يعني ما دام اسمه (منتدى المرح والمواضيع المستمرة) اذاً لا بد من تقبل الدردشة في بعض الردود على مواضيعه حتى ليشعر الأعضاء بأنهم مقيدون بشكل عسكري

[عضوية122513]

مدام الكل حجواا خليني احجي
الكل يعرف انه انا دخلت للمنتدى منذ اشهر وماذيت اي شخص بحجايه وجنت طيبة حيل معهم
بس مو اهنا مشكلة
مشكلة اكو بعض من الناس اهنا متكبريين انثى كانت او رجل بس ماكولج من اداري او عضو او ...الخ بدون تحديد
حتى منخسر بعض
تخيلي عيني عينك يعلق للكل ولجميع مواضيع اعضاء ويدخل ع موضوعي يشوفه ويغلس
لو يشدد بلقوانين
وهوه يم غيري فاتحه ع غربي
لو يصير فدشي براسي وهوه كله عيوب

لو .. لو ..الخ

هاي اابسط شي بلنسبه لبعض
بس تدرين شكد تضوج الاعضاء وتخليهم ينزعجون

اما الترقياااات
ف اكوناس اجدر بهواي ومتفاعلين 24 ساعةة
واكو ناس اصلان مشايفييهم وراسا صارو من ضمن الكادر الاداري
وين العدل والاصناف بكلشيء
اختي
يعني لتزعليين سوزي حقهم بعض الاعضاء من يحجووون
واكيد راح يذبووون ألوم والحق عليج وع مديرنا

[Suzana]

بصراحة نشعر بفقدان اسماء كان لها اسم يتابعه الكثير ربما لا اعرف الاسباب ربما ادارية أو شخصية ولكنني عاصرت اشخاص كثيرين كوني عضو قديم في هذه المنتديدات كان لنا نقاشات اقوى ومثمرةوربما فيها اختلافات في الاراء ولكن لم يكن هناك تشنج من اي موضوع يطرح ولم نبين يوما اي لاي جهة او مذهب نكون ولا نصع التعصب المبتور....ربما سبب هذا الهجر اداري وربما دخول اعضاء كثيرين لا يهمهم التطوير بقدر ما يهمهم الظهور لتكون هناك مواضيع لها قيمة ادبية وربما ثقافية واجتماعية وعلمية ولكن لا يمرها احد وان مر فانه مرور الكرام ....تحياتي لك يا راقي

تحياتي لك وشكرا لرايك الغالي ابن الوطن

انه الزمن ياسيد الكلمات...سوف اجيبك على شكل رؤؤس اقلام والباقى عليك...
البشر يكبرون وينضجون ويصبحون اكثر حساسيه لاى كلمه او موقف
انه صراع الاجيال وتداخلها اما توافقا او تشابكا او تضادا...
انه اهتمامات الناس المختلفه وميولهم وشغفهم التى تتغير دوريا مع كل مرحله... وهم أحرار فى التواجد فى اى مكان يرتاحون له..
المواضيع التى لافائده لدى تكون تكون محط اهتمام غيرى من الاعضاء.. والمواضيع التى اراها فى القمه.. يراها غير فى الحضيض.
والاهم.. المزاجيه اذ ان( اغلب) رواد النت عموما والمنتديات تحديدا هم اناس مزاجيون يملون بسرعه...
والاكثر اهميه عندما لاتجد نفسك فى مكان ما.. يصبح وجودك مجرد مضيعه للوقت..
(البعض) يشعر ان الاجيال الجديده واهتماماتها تختلف جذريا عن اسلوب تفكيره او اسلوبه فيشعر بالغربه الالكنرونيه..
الاداريون مثلنا.. لديهم اهتمامات واساليب مختلفه فى معالجه الحالات الطارئه.. منهم يفكر كقائد ومنهم يفكر كرئيس ومدير..
وهنالك ايضا قوانين وشروط يجب الالتزام بها حتى وان كنت غير مؤمن بها...
من باب حمايه القانون والذوق وفن معالجه التجمعات البشريه المختلفه...
من يهاجر يحن ومن يحن لابد ان يرجع.. ومن يرجع لابد من احتضانه بود..
هذة ليست مشكله الدرر...
انها مشكله الحياه..
الناس يتغيرون.. والاصدقاء يتبدلون.. ولايبقى الا الاصيل ايها الاصيل

مودتى

تمام ..ومودتنا لك ايضا

كان عندي نية أذكر بعض الاسباب لكن بعض الأراء وقساوة الكلام في بعض التعليقات صادمة وحسيت بصعوبة ايجاد منهج او نظام يرضي الجميع
والله يكون بعون المتصدين لهذا الأمر

برأيي المشكلة بدأت والفجوة اتسعت بين الاعضاء القدامى وإدارة المنتدى وبالاخص سامر فالاعضاء القدامى يعتبرون سامر وسوزانا اصدقاء ورفاق الدرب في المنتدى
المشكلة بدأت لمن تركت سوزانا الإدارة والكلام الي وصلنا عن الطريقة الي عزل بيها سامر سوزانا كانت مزعجة جدا وقاسية وتجعل من الثقة بسامر شبه مستحيلة ( دون الخوض في تفاصيل الحكاية الي وصلتنا) هذا الحدث اثر في نفوس الكثيرين حتى اصاب الكثير من الاعضاء الذين هم نواة المنتدى البرود وعدم الرغبة بالتواجد ...الخ

بعدها الاخ محمد كان قاسي بالتعامل مع مخالفات بعض الاعضاء ومتسرع كما ذكر هو ... وهذا أزم الوضع أكثر

الإدارة تتعامل باستخفاف مع بعض الاعضاء .. الإداري يحس أنه غير مضطر لتبرير إجرائه .. مثلاً ايام كنت مشرف شفت اسباب مذكورة في ملفات اعضاء محظورين صادمة والله . استهزاء ولا يوجد فيها اي مبرر للحظر مع العلم القوانين تنص على ذكر سبب الحظر وان يكون السبب معقول وقانوني
مثل هكذا تصرفات تأثر على كل الاعضاء حتى الغير مخالفين، يعني لمن العضو يشوف غيره ينظلم راح يتضايق من هذا التصرف واذا تكرر الحدث راح يصير تراكم وبالتالي في اللاوعي راح يشعر بعدم الراحةوعدم الرغبة بالتواجد
أرى ضروري لمن يصير فد حدث معين بالمنتدى تطرح الإدارة موضوع وتذكر تفاصيل المشكلة وحلولها حتى لا يكون هناك تأويل وظنون من قبل الأعضاء

واكو نقطة جدا مهمة وهي المواضيع الدينية والسياسية
ما اعرف ليش الادارة تسمح لبعض الاعضاء الي ما يتجاوز عددهم اصابع اليد الواحدة بالتجاوز والنيل من عقائد الاخرين بألفاظ نابية بحجة التعبير عن الرأي
الأنسان ممكن يعبر عن رأيه بدون ما يغلط ويشتم رموز الاخرين . وعلى الإدارة ان ما تقبل الشخص الغير قادر على ادارة الحوار بدون التجاوز على الاخر . او على الاقل اذا منريد نخسر العضو كلما يشتم او يتجاوز بالالفاظ اعدل مشاركته حتى يحس بالخطأ، الي اشوفه يحصل هذا العضو على دعم من بعض الإدارة ويسمونه مثقف ولا ادري اين محل الثقافة هنا ؟؟ فالثقافة من أول أثارها تكسب أهلها الخلق الرفيع والذوق والحضور الملائم للذوق العام وتهذب الفاظهم ... الخ
وهذه ظاهرة سيئة وهي السبب في ابتعاد الكثيرين عن المواضيع النقاشية وقسم النقاشات

متأكد أغلب الإداريين الحاليين والسابقين حريصين على المنتدى ويهمهم ان يستمر ويرتقي لكن العائق كان الطريقة والاسلوب في التعامل مع المشاكل والأزمات

ما حبيت أذكر مشاكلي الشخصية لأن الموضوع للمنتدى وسبل معالجة السلبيات
عندي مجموعة مشاكل احتفظ بها لمناسبة أخرى

شكرا عبدالله
نتمنى نسمع كل المشاكل عبدالله حتى مايبقى شي عالق

[Haidar Iraq]

(المشاركه الاصليه بواسطة قزومه)

ماكولج من اداري او عضو او ...الخ بدون تحديد
حتى منخسر بعض
تخيلي عيني عينك يعلق للكل ولجميع مواضيع اعضاء ويدخل ع موضوعي يشوفه ويغلس
لو يشدد بلقوانين

حسبالي اني .. طلع اداري ..
والدليل (لو يشدد بالقوانين ) ..