أصعب نصيحة في الكون هي أبسطهن ..
"خليك على طبيعتك"..
كلمة مستهلكة.. انكَالت هواي وصارت سخيفة ومكررة وما بيهة اي طعم.. و من كثر ما المزيفيين يكَولوها حولوها لكلمة كريهة.. وهمة قاصدين بيها "خليك على طبيعتك اللي احنا موافقين عليها ومتقبلينهة بس"
"خليك على طبيعتك " يعني ماتدعي شي مو حقيقتك .. ماتزيف نفسك .. كَول اللي داخلك حتى لو غلط.. اغلط براحتك ودور على اللي يتقبلك بغلطك مو اللي يحاول سنين يعلمك الصح وين و كإنه نبي.. وهو بالاخر يربيك على الصح مالتة اللي اتعلمه من الصح "مالتهم"..
خليك على طبيعتك يعني تنسى روبوتات المجتمع.. الناس اللي علموك تضحك شلون وتتشاقة شلون وشنو اللي يصح واللي مايصح .. تريد تصير طيب وينكَال عليك محترم سوي هيج .. هم عاشوا سنين يتعلمون الزيف لحد ماشربوه واجو بكل انحطاط يعلموه الك .. انساهم..
خليك على طبيعتك يعني تنسى شغلة اسمها نظرة الناس ألك.. اذا تسب سب .. اذا تصلي صلي.. سوي هاي الامور علمودك انت مو علمود أي احد ثاني ولا علمود يكَولون عليك هذا هيج وذاك هيج
خليك على طبيعتك يعني ماتجذب مهما كان قبحك.. (ماتخلين نقطة زينة على وجهج وتضحكين وانتي تواجهن الناس علمود ما خايفة).. علمود انت فخور بنفسك مهما كانت روحك معيوبة و ما مركبة صح..
خليك على طبيعتك يعني حب مثل ما انت.. حب بعيوبك وتقليديتك وسخافتك ومللك وتكرارك.. حب من غير ماتسوي اللي تشوفه وتقراه بكَروبات الفيس عن الرومانسية.. لما تسوي هاي الامور انت ضحكت على كَلوب هواي ناس وثقوا بيك وانت تمثل و تضن نفسك على طبيعتك..
زين أكَلك شغلة ..
مستحيل اكو بني آدم مبرمج راح يعرف يبقى بني آدم.. برمجتهم تبقة تعشش سنين بداخلك لحد ماتلكَي نفسك تدافع عن قيمهم ومبادئهم بدون ماتعرف ليش.. تحب بطريقتهم بدون ماتعرف.. تربي اطفالك بنفس التفاصيل وانت تلعن نفسك كل يوم وما تعرف صرت هيج شلون ..
خليك على طبيعتك يعني تعرف انك راح تبقة خايف.. لوحدك..مرعوب من انك خارج الصندوق مرفوض من معظم البشر.. انك مايبقة عندك نقطة أمان غير قلبك اللي تواسي بنفسك .. تدعي ربنك كل يوم انك تقابل الشخص اللي يحبك ويعشقك وانت ما تزيف تفصيلة في عشقك الة .. ويحب قبحك هذا ويفتخر بيه
أصعب نصيحة في الكون هي أبسطها..
إنك "تصير نفسك "..
#مرتضى_مالك
رد مع اقتباس
المشاركة الأصلية كتبت بواسطة Suzana
