عيني.. اگـبالهه عيون الأحبـنهم يـلوحن
عيني.. امفتـشه اشوفنهم أغمض هم اشـوفن
عيني شبگتهم
وايدي فگدتهم
عيني .. عيني
***********************
گبالي اشوفنـهم وگولن ردو اوگالو خطيه
واركض اركاض اعله ظلهم وروحي تسحل گبلي بيه
شما أمد اچفوفي ليهم خاليـات اترد اديه
لاهم العـافوا عيـوني ولا هم الردو عليه
مدري.. ليش أريدنهم يجوني ومايجوني
مدري.. آنه ادللهم وهمه إيعـذبوني
ماردت منهم
غير شوفتهم
عيني .. عيني
***********************
غايره عيوني عليهم وآنه أدريهم نسوني
وادري چذابة صورهم غير كون أقنع عيوني
واركض اشما عيني شافت واوصل وگالت جزوني
كافي تعبانة يعيني وهمه گبلچ تعبوني
ماهم .. كافي ياعيني الصور حدهن لـرمشي
ماهم .. راحو ومنا وغادي نشوف كلشي
ظالت المن !!
ياعيوني اعمن
عيني .. عيني
***********************
كلشي يستغربني صاير دمعتي النزلت ونوحي
كلشي گام ايعيـل بيه الليل والصفنة وجروحي
جرح بيه يصيح موتي وجرح ليهم گلي روحي
عبرت كل السوالف بس المتعبتني روحي
روحي .. تدري بيهم ماتو وماترضى تقنع
روحي .. لا رضت تنساهم ولا ترضى تطلع
بالعمــر شلي
مـوتي أحسن لي
عيني .. عيني
***********************
زين مني ويدگ گلبي وزين ماودعني صبري
صافنة وكلساع رآي وساعه ادري وساعه مدري
روحي طفله تريد ترجع وآنه جاز الشيب عمري
ساجدة بنيه البلكي وفايضه ادموعي اعله كبـري
بلكـي .. اشيلن راسي والگه الفـارگوني!
بلكـي .. جفـو عيـني الچنت اسميهم عيوني
ليش الاهواهم
لازم انسـاهم!
عيني .. عيني
***********************
گلبـي يتلولح بـديه ويابس من الهجر هرشي
واگفه ومشدوهة بيهم ومدري اروح مدري اظلن مدري أمشي
ابعيني بس الدنيـه سودة وبيها ابيض صار كلـشي
سـيروا للموت همه وسير الشيب اعله رمشي
ناموا .. واعز واحد طفه عينه وخله عيني
ناموا .. لا يدليني ابمـكانه ولا يجيني
ظالت المن !!
ياعيوني اعمن
عيني .. عيني
***********************
الكلـمات للمبـدع : أحمد المشــرفاوي
Zahraa Al obaidi
لــتحميـل القصيـدة Mp3
'إضغـط هُـنا'
رد مع اقتباس
المشاركة الأصلية كتبت بواسطة Haidar Iraq
