آنه وصورتك والكاس ،،
ووجهك جان رابعنه
أشتهيتك تسكت بروحي
حجي البلصور مابي صوت بي معنى
جاي أسمع ونين بهوسة جروحي
أشيطفي الدنيا اريد ارتاح من روحي
شنو ذنبي غريب وديرتي احساسي
وشنو ذنبي انخلقت لناس مو ناسي
وشنو ذنبي اديرن غيركم بالكاس وصوركم تصعد براسي
ماعندي الينسيني وأكول تهون عشرتكم
واكول انسى ...شينسيني وبعدهي تدردم براسي سوالفكم
واكول ارتاح وانه الفاتحه تبين عرس يمي
أمنهد ما فاركت بليل ضحكتكم
تركتوني وشنو الغايه ليش الي ضميرة انسان ما ينذكر بحجاية
وانه امنرد ابيع الشوف اتوضه بضوه اليمشون واتوكل علمراية
اريد ارتاح
ياطير اليبيع جناح
هاي الناس خلتني ادور بلسما ولاية
واطيرلكم عطر مبيوع شابع شم
وامرلكم هلا الكيعان لو شافت فلح تلتم
واخاف وجوه هاي الناس تخنكني
اجيكم بالهوه محزم
وانه مابيه لثكة ليل
اخاف انباك.... هذاك انه ضوه ملثم
هذاك انه انوخذ لوني
من تغيب الشمس للسما يسافر دم
تمنيتكم ...
يلا الصبع يتمنى كل الناس ما تندم
ضعت بوجوه وادم ما تعرف تشوف
اريدن عين تلكاني
واريدن صوت يخدر من يكول اسمي
واريدن اخ تنساني
مشه عمري بتواليه وانه متاني
صفنتلها وشفت الفراك تاليته عشك ثاني
صغرتوا بعيني وتمنيتكم يمي
مرات الوطن خيمه
وادم كلمن وضيمه
جنت كطرة واجت شمس الله باستني وصرت غيمة
اريد انسه وهواكم يعبر بروحي ويذكرني
وضواكم ينجفي براسي ويكبرني
اشتهيت ابجي واشم ريحتكم من بعيد وارسمكم
اثاري العطر هم يحجي
زياد البصراوي
رد مع اقتباس
