اگو مره ضاجت من رجلها بسبب مشاكل بينهم وطلبت منه يطلگها ،،
هوه ماقبل ورفض يطلگها،،
هيه هم ثاني يوم راحت للشيخ واشتكت عنده من رجلها،،
ولزمت ايد الشيخ وحبتها بس يخلصها منه،،
طبعا الشيخ عاقل وصاحب حظ و بخت ومايرضى بالطلاگ لان الطلاگ مو شي سهل،،
فحاول وياها بكل طريقه حته يردها لرجلها وهيه ماتقبل،،
الشيخ من شاف المره مصرة على الطلاگ،،
گلها ميخالف اطلگچ منه بس عندي شرط عليچ،،
گالتله شيخ اشرط وانه موافقة،،
گلها اريدچ تسويلي غدة باچر ،،
وكون الغده التسوينه مابيه شي من بيتچ تلمينه من نسوان السلف وحته الملح هم تطلبينه،،
گالتله صار و چنك على غده،،
هيه هم من الصبح دارت على نسوان السلف تلم بغده الشيخ،،
طبعا هاي من تروح لبيت جيرانها تسولف سالفتها لجارتها وشلون رجلها موزين وياها وظالمها،،
جارتها من تسمعها هم تشكي همها وظلم رجلها وشلون يغلط عليها ويكتلها،،
وهاي عادة النسوان وحده تشكي ضيمها للاخرى من يتلاگن،،
المهم هاي المره وره مالمت غدة الشيخ وسولفت سالفتها لنسوان السلف وسمعت سوالفهن،،
شافت اشو رجلها مثل باقي الزلم ويجوز احسن منهم لان اليشوف مصيبة غيره تهون عليه مصيبته،،
طبخت الغده وشالته واخذته للشيخ بمضيفه،،
گالتله شيخنا هذا غداك تاكله هني وعافيه،،
بس انه بعد بطلت ماريد اطلگ من رجلي،،
هذا ابو بيتي وعزتي ومهابتي وحته من يغلط عليه هم قابله بيه،،،
طبعا قصد الشيخ من طلب الغده مو الاكل ،،
لا،،، بس رادها اطب البيوت وتشوف وتسمع بنفسها وتعرف شلون عايشه الناس ،،
~~~~~~~~~~
العبره من السالفه،،
ماكو اليوم زوج كامل المواصفات ولا اكو مرة كامله،،
والعوائل اللي الله ساترها وعايشه ومتجانسه،،
مو لان حياتهم مثاليه مثل مانتصور،،
لا،،لان هذه العوائل يردون يعيشون بسلام ويربون اطفالهم،،
طبعا هذا مو تبرير لسوء اخلاق بعض الازواج والزوجات،،
بس تره همه نفس الناس اللي عاشوا قبل وعاشوا هسه،،
وبيهم صفات زينة وموزينه وهمه بشر ويغلطون ويصيبون،،
لكن گبل العلاقات اقوى وتستمر اكثر،،
اليوم تشوف كثرة نسبة الطلاق وخاصة بين الشباب وبنسبة عاليه ،،
فلا الزلم تغيرت ولا النسوان تغيرت بس اللي تغير هوه الرغبة بالستر وفهم معنى الحياة الزوجيه وقيمتها،،
مشكلة شبابنا الانفتاح اللي صار وصاروا يصدگون بالمسلسلات والروايات والعلاقات بمواقع التواصل الاجتماعي،،
طبعا وهيچ علاقات مثالية حته مموجوده على وجه الارض،،
وسعادة العوائل هيه من استقرارها ورغبتنا باستمرارها ،،
ودمتم بخير...
منقول للأمانة
رد مع اقتباس
