هنا

[بـشــــار]

طاب مساءك يا وطن

خلصنا من سالفة شيعة وسنة
طلعت النه سالفة جوكر وذيل ..

المهم
الي يستحي والي يخاف والي يجامل فالأفضل يروح يتابع قناة العهد لو سباق السلاحف ع العراقية..

ورجاء أخوي من المراقبين والنواب وأحلفكم بروح كل شهيد وبغيرتكم ما أريد حذف أي كلمة راح أكتبها ولا أريد هالموضوع ينغلق وكلكم تعرفوني كلش زين أني بالحق أحجي معلكَ ..

ثورة تشرين الي بين هلالين " ثورة الأحرار " ثورة المساكين ثورة اليتامى والجياع والمغضوب عليهم من كل سياسي ما يمتلك بجلدة قطرة شرف من سنة 2003 لغاية هاي اللحظة الي دأكتب بيها موضوعي ..

هاي الثورة ولأول مرة من 2003 طلع الشعب بأيد وحدة ولو بكَلبي عتب ع المناطق الي ما طلعت بالبداية بس أنطيتهم كل الحق بعدها لأن هم طلعوا قبل هالثورة وطببولهم داعش المسرحية المضحكة وخلو نارها تاكل بحطبها والي ساند بتدمير مناطقهم شيوخ الفلس الي جان يرفض صدر أمه من جان صغير وياكل ويشرب خيانة وفساد ..
وأنتهت ذيج المظاهرات بالطريقة الي كلنا نعرفها وراحو بيها شباب بسطال الواحد منهم يشرف كل سياسي ولحد يكَلي لا تكفر وحرام وخرجت من الملة لأن ديني وملتي هو العراق ..

بعد ذيج الثورة أصبح الجيش العراقي جيش ما اله اي قيمة وصدرت فتوى الحشد الشعبي والي من وراها شكو كَبر موجود بالنجف أنصح كل شريف يروح يسجد عليه ..

وهنا بدت الأقزام تكَمز هنا وهناك
وشكول مشكوك بوطنيتها ..

هادي العامري الي بحرب ال8 سنوات جان يقاتل الجيش العراقي ويه العدو انذاك الأيراني والي قبل داعش جان متهم بقضايا فساد أصبح فجأة قائد وشريف وخط أحمر وحامي العرض ووكيل الله ..

مقتدى الصدر الي يمشي بصيت أبوه والي مواقفة تبين أنه شخص متقلب وجاهل سياسيا ولوما صيت أبوه محد يعرفه الي هو السبب الرئيسي لدمار وخراب العراق لان كل فصيل مسلح اليوم باختلاف مسمياته جان بالسابق تحت أمرته وأذا أكو شخص صدري حاب يناقشني فأرجو منه يحط عقل براسه ويتفضل يناقشني أو يسبني برسالة خاصة أو همسة ..

قيس الخزعلي هالشخصية المجرمة الي مقتدى بنفسه بإيحاء كَال شخص من جيش المهدي جان بوقت الحرب الطائفية أخوه أنقتل ومن وره هالشي أنتقم وقتل 1500 شخص بس علمود أخوه وهالشخص هو قيس الخزعلي أبو العصائب ..

أبو مهدي المهندس هالشخص لأن مات ما راح أجيب طاريه من باب أذكروا محاسن موتاكم ..

هسه تخيلوا العراق ويايه شويه ..
تخيل العراق ما بي مقتدى الصدر بالضبط مثل ما أريدك تتخيل العراق بدون صدام حسين من 1990 لغاية 2003 ..

تخيل العراق بي رجل سياسي من 2003 لغاية اللحظة ما مدح وتلوكَ وتملق لدول الجوار وخدم أجنداتها والشيطان الأكبر حسب تسميتهم أمريكا ..

تخيل العراق وزير يحافظ على وزارته وبكل دورة أنتخابية يبقى ثابت لأنه رجل كفوء وما باكَ وما متهم بأي قضية فساد ..

تخيل العراق من 2003 سياسي واحد ، واحد بس ما حجه بنبره طائفية وما كَال أنه سني وانه شيعي ، رجل واحد بس ..

ما راح تلكَون هيج شخص لو تبقون تفكرون منا لألفين سنة والسبب ..

لأن وين ماكو واحد لا علم ولا فهم ولا غيرة وشاف ما شاف وجايع وحرامي وطافي وصحى شاف نفسه كَاعد على كرسي ..

وأنطلقت ثورة تشرين بعد تحمل لو النبي أيوب موجود يكَول عمي هذا يا صبر الي عندي كَدام صبر العراقي وطلع الشعب يهتف ويكَول أريد وطن ..أريد حقي ..أريد اعيش ..أريد العراق الي سرقتوا مني بوضح النهار ..

وبلشت تصرفات القمع الي تدعم كلامي أعلاه ..
بلش القتل والقنص والرصاص الحي الموجه والدخانيات القاتلة وكل وسائل القمع الغير مصرح أستخدامها لفض مظاهرة ..

وبلش ركب الموجة من السياسين كلنا وياها لا لا هاي ثورة جوكرية لا يابه هاي ثورة لازم تصير ونأيدها لك لا عمي شتصير هذولي مدعومين من أمريكا والي يقودهم البشير وستيفن نبيل وحسين تقريبا..

وقنوات السلطة والأحزاب كلها وكَفت بوجه هالثورة وهذولي نفسهم وأقسم بشرف أمي لو الأمام علي موجود وطلع ويه هالشباب جان كَالو عنه جوكر وجان كَالو عنه مندس ويمكن تجي دخانية وبوكتها يطلع عبد الكريم خلف يكَلك الأمام ما أستشهد بدخانية بس مات موت الله أو يكَلك هو حي والأن يحتسي القهوة مع ترامب لعقد صفقة أطاحة بالعراق ..

وهنا أتذكر مقولة علي الوردي السياسيون لا يبالون أن يقتلوا الأنبياء إذا وجدوهم يقفون عقبة في طريقهم إلى الكراسي ..

يا أخي يا عاقل يا واعي يا دارس يا مثقف لك ترضى أنت هيج شكولات تحكمك ؟

يمعود أي راضي ع الأقل أني ضد غلق المدارس وضد قطع الطرق والجسور والشوارع ..

لك أنطيني مدرسة وحدة من تمطر الدنيا متفيض ..
لك أنطيني مدرسة وحدة صفوفها نظيفة ومقاعدها جديدة ..
لك أنطيني مؤسسة تعليمية ومنهج تعليمي يرتقي بالبلد أشو أعظم أنجاز سويتو هو أهم شي الشعب يدكَ ويلطم ويوزع قيمة ..

لك أنطيني جسر واحد أنبنى
أنطيني شارع ما بي صبة وما محفور ونظيف ..
لك أنطيني صرف صحي بي خير من تمطر الدنيا ما تغركَ بيها بغداد والمحافظات ..


ويكَلك عمي داوم
ويكَلك لا تكَطع طريق
هم لو أوادم شنو الي يعجزهم يوفرون كل هاي الخدمات ؟؟
ببساطة ميكَدرون
لأن ربع الله خدمتهم الرئيسة شلون يبوكَك وشلون يستغلك وشلون يذلك من يقدملك أنجاز عظيم ويوزعلك عدس ..

هي هاي ثورة جوكرية
هي هاي ثورة لو مدعومة فعلاً من أمريكا جان هسه شلع تلاكَيهم ع الحدود الأيرانية وأحتمال أيران ترفض دخولهم تكَلهم أش ورقتكم أحتركَت روحو أرجعو لشغلتكم الأولى قبل ما تجون للعراق ..

وهسه نجي لسؤال مهم البعض يسألوا وين المرجعية بعد كل هالأحداث الي صارت ..
ليش ما تدخل ..
ليش ما تنطي فتوى ..
والجواب بسيط وصريح
المرجعية محكوم عليها من هالطبقة الفاسدة مثل ممحكوم علينا ..
لأن بكل بساطة يكَدرون يدمرون المرجعية ولا تصدكَ بحجيهم من يكَلولك أحنا ويه المرجعية لأن لو هم وياها جان طبقوا كلامها وجان هسة الشعب عايش وجان هسة أبن ثنوة يلقي قصائده بالتحرير وأحمد مهنا يصوره ..

بأختصار هالثورة لازم تنجح حتى لو كلفتنا أرواحنا ..
هالثورة أي شخص يحاول يقلل منها ويوكَف بالضد منها فهو شخص مستفاد وشخص يرضى بالذل واليكتلك يصيح هيهات منه الذلة واليكتلك أكثر يبجي ع الحسين الي هو قائد الأحرار بالزيارة وهم ألي خانوا الحسين نفسهم نفسهم بعقليتهم الفرق بس بالشكول ..

هالثورة إذا راحو بيها ستمية ف كل روح بيها راح تحاسبك يوم القيامة وما راح يكَلك الله أنت كفرت بيه لو أمنت بيه بس راح يكَلك أنت جبان ورضيت بالذل وساهمت بقتل أخوتك وهاي صلاتك وصيامك وزكاتك روح كَركَط بيهن من تكَعد ويه أبو جهل بجهنم ..

وكَلنا بالمظاهرات
الوعي قائد
لا تمشي ورا شخصية
أمشي ورا عراقك
لا تمشي ورا سياسي
لا تمشي ورا معمم
ولا تموت
حتى وأن قتلت لا تموت
بس أمشي ورا العراق راح تضل حي لو يتزرف جسمك تزرف ..

وبالنهاية
عذرا على كل كلمة قد يعتبرها البعض سيئة
بس ماكو بهالوضع سوء أكبر من الي كاعد نشوفه

المساحة مفتوحة للجميع

[Suzana]

احيييك بشار ع الطرح ولاحقا يكون لي نقاش متابعة للموضوع.. واطمئن مراح ينحذف شي من الموضوع او الردود ...

[ابراهيم حسن]

ليس لي الا ان اثني عل طرحك المنطقي المثقف المعقول وهو من الواقع المرير الذي نعيشه منذ 2003 الحمد لله اني لم ولن امشي او انتمي لاي تيار او حزب انتمائي هو العراق فقط شكراً لهذا الكم الواسع من السرد الصريح الواعي

[فقار الكرخي]

الكلام مال واحد كلبة مو بس معطب

بس اني عندي سؤال ؟

هو العراق شوكت جان مرتاح
حتى هسة تريدة يرتاح .

من زمن النبي ولهذا يومك
حروب جان ياخذهم النبي ويرجعهم مكصكصين لو موتى
وراها معارك الخلفاء بيناتهم
وراها الأئمة
وانته ماشي
هاي البقعه من العالم ماشافت راحة ابد
او ولا راح تشوف راحة .

وارجع واكول العلة بالشعب نفسة
لا مقتدى ولا ابن مردوف
هو الشعب يروح ينتخب هذولة ويجي يركظ وهم ميكولون باطل

فلا تحرك كلبك
وانصحك نصيحة اخوية
لاتنتظر فرحة او خير من اي واحد يجي يحكم





عاشت ايدك بشار

[Haidar Iraq]

إلى كُل من يقرأ هذه الكلمات ..
من الأخوه الأعضاء والزوار في مُنتدى دُرر العراق ..
____

هُناك خوف من سَرقة وتَدمير ثورة أكتوبر بالعراق الجريح .. ودخولها في خط السَرقه الإنتهازيه من شخصيات ومتحذلقين .. ومَن يَقفزون على تضحيات دماء الشُهداء .. للحصول على مكاسب شَخصيه .. او الإستفاده مادياً من هُنا وهُناك ..
هذه الثوره يَجب ان تَنجح مهما كَلف الأمر ..
ولاتجعلوها تَندَثر وتصبح في مَهب الريح ..
والأهم من هذا .. ( تذكروا شُهداء الثوره ) ..
فلا تخذلووووووووهم .. واستمروا في ثورتكم ضد الفاسدين ..
شكراً لك أخ بشار على طرح الموضوع ..

[Laraa]

اخ بشار ببساطة طالما الشعب منقسم صعب يتعدل الوضع
القلة القليلة جدًا هي اللي كلمتها العراق اما البقية
فكلمتهم مقتدى لو فائق الشيخ علي لو ينتظرون كل جمعة خطبة المرجعية
هذه العقول شتترجى منها !!

كل هذه الاصنام محد يصعد ويكبر راسها غير الشعب
دم العراقيين مو برگبة مقتدى ، دمهم برگبة كل واحد تابع لمقتدى وآل الصدر عمومًا
دمهم برگبة كل واحد راح انتخب هالحثالة وآمن بتغيير ولو بسيط يجي من هالجلادين
دمهم برگبة المرجعية واللي يزعل خلي يزعل

شوف شسوه مقتدى بالعالم ، التظاهرات كانت سلمية و حولها لبرك من الدماء
من بعد ما ماتو الملعونين قاسم سليماني و المهندس و وجه مقتدى الحقيقي ظهر
رغم هو معروف لكن الويل على اللي ميفهم و ميشعر .. بس اريد اعرف اتباعه شينتظرون
حتى يشغلون مخهم محد بيهم سأل نفسه ليش مقتدى بوقت ما كان ناصب خيمة وترك حماعته
يهجمون ع البرلمان ليش سحبهم فجأة وكان بيده ان يسقط الحكومة ؟!

احنا منريد شي من اتباع مقتدى و لايشرفنا يشاركون ببناء العراق
لان هالناس ميجي منهم خير ناس ماعدهم عقل ، بس لو يسكتون و يكفونا شرهم واجرامهم
ممعقولة يرضى الانسان يكون مجرم لمجرد انه يعبد شخص !!

[ساره البابليه]

احيك بشار على طرحك
بشار كل حرف انت كتبته العراقي وشبه عراقي وجوكري وذيل ومندس وطرف الثالث يعرفه
يبقى بس العراقي الاصيل يؤمن بي والباقي يحرفه ونكرة
العراق وثورته من يوم 1/10/2019زرع بذرة
طلع الجميع العراقي الاصيل وكل الجوكريه والذيول ومندس الان وصل حصاد الثمرة ثورة والاصيل بقه اصيل والباقي سقط قناعهم ،
احنه ماألنه قيمه عدهم دمنا يخلونه نهتف نهتف واصلا ميسموعون يجون يقمعون وحركون ويخطفون
وهسه ايران ورقتها الرابحه مقتدى وكل وياه هادي وقيس الخزعلي
احنه ثوره العراقيه راح تقدم فقط شهداء
مع الاسف مراح يتغير شيئ


واحنه من الاول ماحاسبناهم وخلينه قيمه لشعب ومال شعب ،يبكون مليار لغرك سوينه حششنه عليه القنفة والنستلة .سبايكر كراده وقناصين المظاهرات وغيرها الي صارت وين نتائج لجان وهسه خبر على قناة شرقيه عادل عبد المهدي رئيس الوزاء المستقيل يأمر بتشكيل لجنه حول مجزره النجف الي صارت البارحه اكو بعد استهزاء بينه اكثر

[انسان ثاني]

بشار كلامك جان بالصميم و كلش يقهر والله
اني اتفق ويا لارا بالشيء الي گالته يا اخي العيب مو من السياسيين امثال مقتدى وغيره العيب بـكل شخص يعبدهم والا بشرفك وين اكو شخص عاقل و مثقف يجي واحد يگله (طيع واسكت) و يسمع كلامه ! تره اخر واحد سواها هو فرعون قبل ٥٠٠٠ سنة وهم الي طاعوا ما گدرون يسكتون

تدري وين المشكلة بشار ، طبعاً هسه اكو منْ راح يفسر كلامي ع انه طائفي ، لكن حقيقةً انه القوى الشيعية الي حكمت العراق فعلياً هي غير مؤهلة لـ ادارة بلد بحجم العراق ، من اداريين بالحسينيات الى اداريين في دولة ! طبعاً يصابون بالجنون ، اجوي بعقول انتقامية الى ان وصل بيهم الحال انتقموا حتى من ابناء جلدتهم بس لانه رافضين سياستهم ، لذلك هسه تشوفهم متمسكين بالسلطة وماينطوها حتى لو بالدم لان هذوله ماعدهم ثقافة تداول السلطة ، عبالهم مثل المشيخة اذا مات الشيخ لازم تروح لـ ابنه واذا طلعت من بيتهم يحلقهم العار طول العُمر

اما بالنسبة للاسماء الي ذكرتها كـ مقتدى و الخزعلي و العامري ، صدگني هذوله نهايتهم مراح تختلف عن نهاية صدام ، تره صدام بلش حكمه مچان طاغية ع شعب وانما حازم مع المقربين اله ، وكلما چان يحلى الكرسي بعينه چان يزداد شراسة و عنف ضد اعداءه ، الى ان وصل بي الحال ذبح شعبه في سبيل الكرسي ، وهمه هسه ديسيرون ع نهجة ، وصلوا مرحلة الوحش حالياً و قتلوا الشعب ، و اعتقد المرحلة القادمة حتكون نفس نهاية صدام



عاشت ايدك حبيبي

[عدنان الواثق]

آني اخالفك بشار بكل كلمه كتبتها شلون ماأدري واعتقد تحتاج ادله لأن صورت العراق ظلام دامس لاياحبيبي أولا...المرجعيه موجوده حفظها الله واكفه وي الناس شنو هالاقزام امام من تسكن ضمائر الناس وقلوبهم وعقولهم .وخليني اسألك لو المرجعيه اطت فتوى ضد الفاسدين شبيهه بتلك التي اطاحت بداعش فتخيل ماذا يحدث...تحياتي بشار بصراحة هذا رد اي انسان واقف عالحياد ومامنتمي للاحزاب عده ثقه برجال الدين الشرفاء ...تحياتي

[Aabdullah]

صديقي بشار أول مرة اقرأ لك هيج اسلوب بالكتابة
صارلي فترة غائب عن المنتدى .. شنو القوانين تغيرت
اشو الشتائم على قدم وساق ؟؟!!!!!

عزيزي بشار انت تتفق وياي أن المستفيدين من فساد الاحزاب هم الاقلية وليس الاكثرية.

لو كان اغلبية الشعب تتفق وياك بالرأي كان الحكومة ما بقت ٢٤ ساعة
يعني اكو غيرك مستقلين يكرهون الحكومة الفاسدة لكن يختلفون معاك بالرأي والتصنيف. فأرجو منك أنت كمثقف لا تعمم الفساد على اغلبية الشعب
كما أرى أن الوطنية مو من حق أحد يوزعها على العراقين كما يرى هو

أما التظاهرات الي حضرتك تكلمت عنها اخشى أنك تقصد تلك التي أنجبت داعش الذي قتل أبنائنا وسبا نساءنا .. عائلتي قدمت شهيدين للخلاص من أبن التظاهرات المزعومة ...

أما المرجعية يا عزيزي فهي غير ملزمة وليس من مهامها أصدار فتاوى لتغيير الأنظمة لانها ليس جهة سياسية ولا ترى ان وظيفتها الانخراط في وحل السياسة هي تقدم النصح لمن ينتصح

صديقي بشار .. أنا أخوك ويؤلمني أن أراك تكتب بهذا الشكل