قصيدة:معقوله يابنت النبي
الشاعر:د.السيد فراس الصافي
الزمان:ليلة 26 جمادي الأولى 1441هـ
المكان:جامع علي باشا بغداد
طور#يحسين حادي ضعوننا#ذوبت يبن المصطفى


معقولة يا بنت النبي
تحجبتي بالباب
بس مدي ايدج للسمة
ينزل لج حجاب
حرام روح النبي هاي
******************
ستر الله سترج فاطمة
و حجابج الدين
حاشاج طولج ينكشف
و انتي أم الحسين
وين انتي يا جنة عدن
و اهل الحطب وين
بابج عظيم بحرمته
و الطبوا اجناب
******************
يا وسفة أشباه الزلم
بآل النبي تعيل
الله يعينج عالعصر
يالبابج ثقيل
لو داعية الله بهالوضع
جا ودا جبريل
بجناحه لفج و انتهى
كل هذا المصاب
******************
يا زهرة من دون الورد
ذابحها مسمار
من فاض وجهج مستحى
ما خجلت النار
بعدج زغيرة عالدفن
و اطفالج زغار
حيدر لوحشة غيبتج
ما حاسب حساب
*******************
بابج قبل ريحة نبي
شو هسة دخان
دمج على جذوع النخل
عايفته نيشان
بعيونه حيدر وَسَّدِج
ما حاجه دَفّان
هنياله اللي يحصل قبر
بعيون أبو تراب
*******************
هذا الرَّمادِ العالوَجِه
يا فاطمة منين
من حَرِق بابج لو حَرِق
خيماتِ الحسين
مِثلِج بنَيتِج تُنظُلُم
و تطُب دِواوين
مِثلِج تثور على الظُلُم
و تدوسِ الأَذناب
********************
بابِج المِحسِن من وِقَع
ما داسِتَه خيول
ولا راسَه قِدامج طِلَع
عالرُّمُح مَشيول
بَعدِج بِنينِج خَلِّصوا
مسموم مكتول
و صواب أبو الأكبر أَبَد
ما يِشبَه صواب


************************