بقلمي-اخروني
بقلمي- أخروني{أخروني}
.....
أخروني
وجيت متأخر أهواي
وفاتني باص السنين
ضيعوني
وصلوا الناس الوراي
ونزلوا حمل الحنين
وانه شايل
كومة الشوگ أعلا راسي
وزمن ناسي
زمن قاسي
الليل مامنه أمل
لملم أهدومه ورحل
وتعده صبحه
وبعده جرحه
يصرخ وماشاف فرحه
وناس وصلت
وناس راحت
وناس ردت
وناس ما فكها الونين
واحد أبيته سجين
واحد يجدي طحين
مدري وين مغربين
ومن يومها عفت الوطن
والظلم دفعني الثمن
وياما...؟
وياما عذبوني
وضيعوني
وجيت متاخر أهواي
وفاتني باص السنين
====
ابيوم ما مل أنتظاري
وخلص صبره
ليل لبراسي خلص
ونگلب گمره
والربيع أنباگ عمره
مثل ما باگ السجن
عمر السجين
ومثل ما طاح الغصن بالياسمين
آه.....
أشچم حسرة گلب
ذبيتها بونة حزين
ومرن أيامي ضياع
وعذبوني
ونور شمعاتي طفه
وكلشي أختفى
وتعبوني
وبعد لليوم العرگ
فوگ الجبين
والتعب باين عليه
وتالي من فكرت بيه
لگيتني بليه قطار
وشنهي نفع الانتظار
وأخروني
وضيعوني
وجيت متاخر أهواي
وفاتني باص السنين
......
كلمات
ناصر اسماعيل الموزاني
رد مع اقتباس
