صبخه إبليس زارعها ابمزاجه
بين نطفة گاع حِري
وبين صبخه إبليس زارعها ابمزاجه
ينّولد…
ضدْ إعله ضدْ والعقل يرجح
ينّدرس كلشي إبدرايه
من تِشيط أول مراجيح البراءه
إبين توصل فوگ…
لو توصل حضيض السالفه البيها النّدامه
والكرامه…
الكرامه المردي من يعزل حچي الگصبات
عن إحزام لفات المضايف
والصراع… .
إيهد شكو لله مَسله إباب ختلات الجگاير
الزين يكبر سالفه بحلگ الكتب يم الحسين
الشين يكبر
يكبر
يكبر بس گصير
ما تطول الچف إذنها من تِزل درب الضمير
العين تعكس…
حچي جوع
حچي مدلول إعله خِله
حچي دلال إنّشلع بعيون شهله
حچي اقرب للنفس والنار سهله
الگدر يآخذ…
الگدر يآخذ…
زيج الإكحيله ويغير إمتاز صيته
الما گدر يعبر نهر كثرة خطيته
الطينه وحده…
وللنفس عدة أدوار
الرب قريب إمن الوريد
إشگد بعيد
إشگد بعيد
الركب راسه وساگ خاچيته معاصي
إعگالنا إيدور الهلا…
ايدور الهلا إبين السواجي…
الغافيه بحچي الشلب
الشارب إعله الحلگ غِيره
مو سعر چاي وشِرِب
اليصعد إعله الغيمه واضح
اليصعد إعله السطح واضح
الينّزع اهدومه إذ إشتدَ الوطيس
اهواي واضح
غَربله
غَربله كلها وبناء…
الباني كل عمره طوابق
يوگف الموت إبلهاته
لاكو خرجيه وعَمل
الراح ماشه إويه الشَعر ينّجر گصايب
الراح خنجر ما يعيش
الراح ترچيه إعله فصلية سلفهم قَدْ قميص
إشگد فوارق…
إشگد فوارق…
بين نطفة گاع حري
وبين صبخه ابليس زارعه ابمزاجه
فارس الشِباني
رد مع اقتباس
