صنتت ليل
وانه هناك يم روحي ضوه مكسور
وبرد اعمه
برد يگرص جلد ثوبي
ويدفه ابتجاعيدي خضار ابره
وانه اهناك عالسجةاحس روحي
غزف يضحك غزف يبجي
تاهن كل صناديگه ومشه ويالريح
وصوته ايشرمخ الشارع غنه بلا راي
وانه ادبي اعله لاهيتي
لكط شوفي اثر حنه وتكت مدفون
امسحت گبره وقريت اسمه
وشيعته الغصن ضايج
وانه هناك وانته هنا
بين اضلوعي جوية صيف
واحسنك تماشيني
واحس جفك يدرفعني
ويعثرني ابجرف سجه
وارد اعدل وامد ايدي
وتتلاشه رذاذ ارماد
ويرد جفي بوجه فشله وفراغ اهواي
وارد امشي بثگل جدمي
وتطيح اسنيني بردانه
واعبرلك تعب حانه وضحك بت ليل
ويفز الديرم ابروحي
ويريد امن الضحك شفه
الضحك شارد مثل ضلي
ويلوليه غنه اجويريد
ويرد يغفى وارد امشي
وهي لحظه اوكف جدم
بين ادروب تضحك خوف
وجفوف ارواح تومليلي بوجه وسواس
وصوت الريح يرعبني وره الحيطان
واتناكت رجف خوصات
ومن خوفي اكسرت جدمي
الخذيته وياي من شجره تريد اتموت
وحسبت اخر عجد منها ورحت اكزل
درت وجهي وخمش عيني قفل شايب
ابوجه بابك غفه منجل وهوى يصوفر
وشباجك بلايه اثياب
وعمى فانوس متخوصر موادع عود
بجت روحي
وطحت ركعة ذنب راهب
فض عذريته وي طفله
ابصليب اخرس
كل تنهيده من روحي
تهز شيبة وجه بابك
لا موعد ولا مريم
ولا تعويذه تشلبه على امتوني وأرد جاهل
شلت حزني وخذتني الريح
فجر احمر يصيح الناس
شفت كل ريه تكرهني
وحجتني البوب والديره خذت لوني
وبقيت اعله المري ذكره
عمرها اگصير
وجفوف النداره اهواي
وبعدني احدي حزن بالريح
وصلت اول غصن شفته
لگيته امسافر الگاعة بتكت عمري
بحجي الغيمه انتهى كلشي
وطحت گشام
وتهت بين المطر والكاع
وتمنيتك تدوس الكاع
جان اعرفت كل عمري عليمن ضاع
ولحد هسه ولا ادري عليمن ضاع
ولا ادري انه ابيا كاع
الشاعر احمد عبدالدايم
رد مع اقتباس
المشاركة الأصلية كتبت بواسطة سمراء من قوم عيسى
