المشاهدات: 210   المدة: 10:35   الدقة: عالية
التصنيف: صوتيات دينية   الكلمات الدلالية: Hussein Hameed
تعليق بواسطة Hussein Hameed
للشاعر الأديب - جابر الكاظمي

يالمهدي يومك صار .. تترقبّك أنظار
عين الطليعه
وراية علي الكرار .. تترجّه منك ثار
ضلع الوديعه
هالرايه تعرف وين .. تلكَاها عالجفين
يمّ الشريعه
▪️▪️▪️▪️▪️
كل هذا العالم يتنطّر .. نورك يغايب
موعود و نتأمل تظهر .. و الكل تراقب
ترفع رآية جدك حيدر .. ليث الحرايب
رايه البيها الهادي استبشر .. رسمت مناقب
راية الفتحت قلعة خيبر .. دحرت كتايب
رايه القطعت حبل المنكر .. وخلقت عجايب
راية خلود .. ثبتت وجود
هالرايه من تنشال .. تتراجف الأبطال
حاملها جدك
اسمع رمحها اشقال .. يالمهدي وعدك طال
منتظره وعدك
راية بطل صفين .. تلكَاها عالجفين
يم الشريعه
▪️▪️▪️▪️▪️
رايه ابجف حيدر شفناها .. اتخوض الملاحم
هالرايه الخالق يرعاها .. رب العوالم
عجزت توصلها و تدناها.. بيض الصوارم
جدك حيدر ما خلاها .. اتحس ابمظالم
يوم اللي الفاركَها انطاها .. لبدر الهواشم
جف العباس اتبناها.. بحر المكارم
صارت دليل .. بيد للكفيل
تنشد عليها الناس .. ما تدري للعباس
جدك دخرها
هالرايه رفعت راس .. ما تقدر الأرجاس
تمحي أثرها
رايه و تكَر العين .. تلكَاها عالجفين
يمّ الشريعه
▪️▪️▪️▪️▪️
يا راعي الطلعه الموعوده.. الطلعه البهيّه
عمك بالرايه المشهوده .. خاض المنيّه
دافع عنها بكل مجهوده .. ابهمه و حميّه
و خضعت للعباس وزوده.. أعوان اميّه
لهاي الرايه انطاها ازنوده .. أثمن هديّه
لو عنها اتناشد موجوده .. بالغاضريه
برض الطفوف .. يم الجفوف
يالمهدي حين اتروح .. يم عمّك المذبوح
تلكَاها يمّه
وتلكَه الجسد مطروح .. و من النحر مسفوح
عالغبره دمه
و كل نايبات البين .. تلكَاها عالجفين
يمّ الشريعه
▪️▪️▪️▪️▪️
يا من نورك رب القدره .. طوّل مغيبه
مصرع عمّك حين اتنظره .. لكَلبك يصيبه
جفوفه اتشاهدها اعله الغبره .. بالدم خضيبه
جم طعنه اتشوف و جم طبره .. ابجثته السليبه
مو بس شخصك جري ابكتره .. ادموع المصيبه
كَبلك حضرت يمه الزهره .. ابحاله عجيبه
تنعه و تكَول .. بنت الرسول
عباس الك ونيّت .. يوليدي يالضحيت
لوليدي دمك
هاي آنه يمك جيت .. و اعله الحزن خليت
ضلعي اعله جسمك
ام الغريب حسين .. تلكَاها عالجفين
يمّ الشريعه
▪️▪️▪️▪️▪️
من تكَصد للشاطي ابهمك.. و كَلبك اليسعر
بس ما توصل مصرع عمك .. وعالجسد تحضر
ما تنظر لن امّك يمك .. ووالدك حيدر
و تبدي اهناك الزهره اتكلمك.. يفجع المنظر
اتكَلك يالمهدي آنه امك .. ضلعي التكسر
يبني و كل شيعتنه اتحشمك .. يا ساعه تظهر
ظل يستجير .. ضلعي الكسير
وحيدر يكَلك هاك.. سيف الوغه الفتاك
يبني و اريدك
تكَطع رقاب اعداك .. وراية بدر وياك
خليّها بيدك
مطويّه صار اسنين .. تلكَاها عالجفين
يمّ الشريعه
▪️▪️▪️▪️▪️
يالماترتابة تتوجّل .. من كل فزعها
يالبيدك سيف الله المنزل.. هاك استمعها
صرخة شيعي اهموم اتحمل.. بسمك رفعها
بظهورك لو ربك عجّل.. اذكر دمعها
و انشد ليش البنت المرسل.. كسروا ضلعها
وانشد عالجفين وإسأل .. منهو الكَطعها
صرخة مصاب.. هم و عذاب
يا من ظهورك عيد .. لا تنسه يا صنديد
سيفك تعهّد
لهل الضلاله ايبيد .. و تنتظرك من ابعيد
راية محمد
تعرف دربها من انين .. تلكَاها عالجفين
يمّ الشريعه
▪️▪️▪️▪️▪️
سيفك سر الاسم الأعظم.. رمحك شعاره
صوتك عالمنكر لو دمدم .. يعلن دماره
لا تترك ديّار و معلم .. ياخذ قراراه
ضلع امك يالمهدي اتهشم .. لا تنسه ثاره
و ثار الجسمه اتغسّل بالدم.. ودمه ايتجاره
وعندك يالموعود امخيم .. ما تطفه ناره
نار و نحيب .. نوح و لهيب
كل خيمه تلهب نار .. ابكَلبك الف تذكار
تركت يغايب
نار التشب بالدار .. يم بضعة المختار
أصل المصايب
يالمهدي هالنارين .. تلكَاها عالجفين
يمّ الشريعه
▪️▪️▪️▪️▪️