المشاهدات: 5528   المدة: 7:29   الدقة: عالية
التصنيف: أشعار وقصائد   الكلمات الدلالية: ايهاب المالكي، Zahraa Al obaidi
تعليق بواسطة ღ عِشق ღ
ابحرگه اتوادع العباس ويه حسين
اموادع غالي راح ايفارگه الغالي
صبروا ما بچوا بس گبل لايمشون
واحد حس بالآخر دمعته اتلالي
الهوه بيناتهم ماطب وگف عن لا
يطاير دمعهم بالهوه العالي
وبچه حسين وفتح ذرعانه للعباس
گله ابغيرك آنه اتخيلت حالي
آنه عطشان صح بس ماشغلني الماي
لكن لو تركتك ينشغل بالي
كل الطف إلك وين التفت وانساك
أنه الصامت اعيوني وضايع إهلالي
ما اهتم إذا رديته خالي الجود
حاچيني ابـجوادك من يرد خالي
وأنه المااحير اشوفك حته من اتـغيب
الك موجودة صوره ابنظرة اطفالي
اخذ من عدي چف اوچف إلي اتخليه
من عدك اليه وذكره يبقالي
وذني اچفوف اديه وبكيفك انته اختار
ياهي اتريد منهن يمنتي اشمالي
گالوا تنذبح من القفه وهزيت إديه
وجاوبتهم ظهري مو خالي
العباس ابكفاي وينعبر ويفوت
واحد يم رگبتي وسيفه يدنالي !
لكن من گلت عباس راح اتروح
هسه انكشف ظهري اگبال چتالي
اشگلت عباس رايح ! حته أوصي الريح
عگبك عالخيام اتناطر اعيالي
حلف عباس واقسم گله ثق حسين
اطب بيها واجيك وتسمع افعالي

سأطعن في عيون الشمسِ سيفي
لينقطع الرواةُ عن النزالِ
فقد علقتُ في سيفي رؤوساً
معاندةً فما خشيت قتالي
رأوني قادماً كالرمحِ حتى
تبعادت الرجالِ عن الرجالِ
لأتركَ جيشهم للأرض صوتاً
فينبعثُ الأنينُ من الرمالِ
فلولا أني رجلٌ محالٌ
لما فكرتُ أن أصلَ المحالِ

إذا ماموت بالطف منگطع چفين
ماتغمض اعيوني وموتي يهنالي
انه الحته الجواد ايگلي ياعباس
صول وشيل إيديك امن الرسن مالي
وگفت اعله النهر وتحسرت مولاي
ذاكه الهوه البطف گـوه كفالي
وشفته العلگمي بس گتله دون حسين
تعمه اعيون مايك كون يحلالي
انه شفتك ابظلي وردت اشربك ماي
وتراويتلي انته ابصورة اخيالي
چنت عالمشرعه ما لايذ ابسد سيف
انه الآمر الناهي وكلشي يجرالي
عدهم فكرة فوگ الگنطره اشسويت
طشارة رگبهم مالهن والي
لذالك والدليل ابهاي راح انطيك
مصداق أنه الفعلي وشعري واقوالي
من التالي أبد ماصاحوا العباس
چي يدروني ابرز أول وتالي

طلـب من الله ايوفاضل بالصلاه
ربي تأمرلي ملك ينزل إلي

انه عديت المخطط للهجوم
وارد اودي للسمه يقرا علي

اولاً راح افيي اعله الخيم مثل الغمام
وراح اعجج كل تراب الطف حمام
راح اشيل إيدي واسلم عالخيام
كون اوشل إيدي وراها امن السلام

ثانياً ابروح كل عطشان راح امطر برد
نسوا طعم الماي ليـحلمون ارد
اطفال تعطش تذبل الموتي حصد
للسمه شفت يصعد ورد

ثالثاً غايتي اثبت مستحيل المستحيل
وارد اشيل امن الحرب حمل الثجيل
ارد اعالج فكرة الكم القليل
اوگف ابطولي واخلي الطف يميل

رابعاً ارد اشوف الماي احس انطيته عين
وارد اگله اليوم تشرد مني وين !
حالة وحدة ايجوز ويا ألين
إلا إذا كلي عليك أم البنين

خامساً راح أمر من بينهم مثل الضوه
إلا افرغ انفاسهم من الهوه
الچوي يوصفونه من عگب الدوه
ويعرف عباس البراسه انچوه

سادساً راح اسوي ابجيشهم بالصولة غار
مثل مايخطف على الليل النهار
راح ابهيية الـ يطلبله ثار
كون احس رجل الفرس مشتعله نار

سابعاً انه بس اعله النهر محد سواي
وحدي وماتنحصر روس الوراي
اليشوف العلگمي ايسولف معاي
مايفرزن ياهو البينه العـده ماي !!

_____________________


الكلمات للشاعر الكبير - إيهاب المالكي

_____________________

الكتابة;
Zahraa Al obaidi