المشاهدات: 3119   المدة: 23:34   الدقة: متوسطة
التصنيف: صوتيات دينية   الكلمات الدلالية: باسم الكربلائي، Zahraa Al obaidi
تعليق بواسطة ღ عِشق ღ
علاقة حُب بدت عبدٌ ومولاه
أحبَ لله من حب حُسيـــناه

أصل الكون من كربلــة
الله ايگول كُلشي الــه

قصيدة حسين وربك كل سنة يكتبه
و مو حب اختياري وكلمن وگلبه
يعـجبك مــا يعـــجبك لازم تــحبة
الصدگ عشگ الحسين وكل عشگ جذبة
أضـف وي آية التـطهير والـقُربـة
صـلاة بـلا طـعم لـو مــا اكــو تُربة

طُـلب مـوسى النــبي ينظر آلهه
نــعذر كـربلـه چي مــا إجــاهـا
چان يشوف رب العله
الله يـــگول كلشي إله

علاقة حُب بدت عبدٌ ومولاه
أحبَ لله من حب حُسيـــناه

أصل الكون من كربلــة
الله ايگول كُلشي الــه


كل حب يبتدي من كلمة لو نظــرة
وحب حسين بادي من گطع نحرة
كــل اثنين بالـحب بيــنهم عِشـــرة
بين وحسين والله فاطمة الزهــرة
الخيل السحگته بذاكه الظهر تقرة
يــا الله مــكــتوبــه عــــلى صــدرة

اليحب باقة ورد يهدي الحبيبة
الحسين يصلي والنبله تصيـبة
هالاهداء ما أجــمله
الله يگول كلشي إله

علاقة حُب بدت عبدٌ ومولاه
أحبَ لله من حب حُسيـــناه

أصل الكون من كربلــة
الله ايگول كُلشي الــه

علاقة ومستحيل الأي طرف يزعل
المواقف والسوالف بيــها ما تنــمل
حسين ايگول ربي اشتآمر ويحصل
الله يـگلـــه مـنـــك كلــــشي اتقــبـل
أبـــــن اول العــــالم بالعشــــگ أول
حسين ابلايه راسه وبالعرش ينـدل

نحر مثل الشمس يطلع وريدة
الأرض كلها يحركها اعله ايدة
يا عطشان يروي الملأ
الله يگول كلشي إلــــه

علاقة حُب بدت عبدٌ ومولاه
أحبَ لله من حب حُسيـــناه

أصل الكون من كربلــة
الله ايگول كُلشي الــه

سجود حسين حب وي غيره ما ينقاس
صلاة الليل مو چم ركعة چم احساس
ابخواطر وبـشعر تكتب غزلها الناس
حسين يغازل الله بطــــيحة العباس
الطف بستان ابو اليمه نبي النوماس
زرع سبعين بس سبعين شتلة ياس

آذان الـــوادم بــ ألله أكــبـــر
بده حسين الآذان بدم الأكبر
الجنه تصيح مية هله
الله يگول كلـــشي إله

علاقة حُب بدت عبدٌ ومولاه
أحبَ لله من حب حُسيـــناه

أصل الكون من كربلــة
الله ايگول كُلشي الــه

وكت شاف الاهل والصحبة مذبوحة
اشتاق الرؤية الله مــو ضـعف نوحة
بطولة فـارس وسوح العشگ سوحه
على گـد المـحبه نـزفت جـروحـــــة
وگع مـــن المُهر بـأحضان مفتوحــة
لأن بيد الله يـــدري تـــنقبض روحة

نداء من السمه ابقه بدمائك
تجيك الجنه وانت بكربلائك

الامـلاك تــــستقبـله
الله يگول كلشي إله

علاقة حُب بدت عبدٌ ومولاه
أحبَ لله من حب حُسيـــناه

أصل الكون من كربلــة
الله ايگول كُلشي الــه

بعد هذا الجزه الاحسان بالاحسان
للأسلام ربك ســوه خــمس أركــان
لجـل ظُهر الحسين انــصلي بالاذان
وركن الصوم چيه گلبه بقه عطشان
إذا تــسأل عن الحج راح اگلك چان
برمح راس الحبيب يطوف بالبلدان

اذا ما متخذ رمحه وسادة
ابـد ماكو زكاة ولا شهادة
ضحـى أطفال بالسلســـلة
الله يـگول كــــلشي إلــه

علاقة حُب بدت عبدٌ ومولاه
أحبَ لله من حب حُسيـــناه

أصل الكون من كربلــة
الله ايگول كُلشي الــه

بعد كل هالحجي ويطلع الك واحد
ويـــه أبليس كـل عــاشور مـتواعد
بـمحرم لابـــس أحـمر وبـگلب بـارد
عـالخدام بــس نقـــطة ضعف رايد
چان الناصبي اسمه ناصبي وحاقد
هسه اليوم اســمه حــضرة النــاقد

المريض اليطعن الخدمة بكلامة
خصيمه فاطمة بيـوم القيـــــامة
ويقاضيه عقـد الوله
الله يگول كلشي إله
علاقة حُب بدت عبدٌ ومولاه
أحبَ لله من حب حُسيـــناه

أصل الكون من كربلــة
الله ايگول كُلشي الــه

الشاعر: حمزة السماوي