المشاهدات: 453   المدة: 14:02   الدقة: عالية
التصنيف: صوتيات دينية   الكلمات الدلالية: محمد باقر الخاقاني، Zahraa Al obaidi
تعليق بواسطة ღ عِشق ღ
ــــــــــــــــــــــــــــــــــــــــــــــــــــــ
القصيدة: سَفينة نجاتي
أداء:مُحمّد بَاقِر الخَاقاني
كلمات:احَمد الهَلباوي
ــــــــــــــــــــــــــــــــــــــــــــــــــــــ
وعلىٰ البَلاء.. انتَ المُحتسب الصَابر
ــــــــــــــــــــــــــــــــــــــــــــــــــــــ
حُبّك سَفينة نجاتي وهـٰذا دَمعي
يِهل ما دامك اعله البَال
والمّالي غيرك صَلاتي البيها ادعي
دَخيلك بس إلك تِنگال
رِدني لفُطرة اوّل ما هِمت بيك
وانوح بمأتم ومِن دُون مأتم
إكتشفت الحُب اسوّي كِلّشي يِرضيك
الخِدمة جَنّة والدِنيا جَهنّم
يا قُربان الله ويا ثَارات الشَريعة
وجروح الزَهرة التدّي بگد ما وِسيعة
يا اوّل مدفون بصدره إنحط رَضيعه
في كربلاء.. صار وِياك المّا صاير
وعلىٰ البَلاء.. انتَ المُحتسبُ الصَابِر
ــــــــــــــــــــــــــــــــــــــــــــــــــــــ
تجرحني نَظرة رحمتك وانتَ وَحدك
بين اقسىٰ بشر بالكون
وبگلبي عَ الغبرة شِفتك وصار خَدّك
ورماد مخيّمك فد لون
وصَارت مِن هوان الدِنيا مَولاي
إسم إختك غَريبة وانتَ عطشان
مِن يمتىٰ يموت اليطلب الماي؟؟
ومِن يمتىٰ يلوح الشيب رِضعان؟
ضَعن اهلك مِن يمتىٰ يبات بِلا حِماية؟
وچف عبّاس يصير مِن احلام السَبايا !
وبِنت الزَهراء تمشي وما فُوگاها راية
خيرُ النِساء.. بيك إنفجعت بالعاشِر
وعلىٰ البَلاء.. انتَ المُحتسبُ الصَابِر
ــــــــــــــــــــــــــــــــــــــــــــــــــــــ
دِخيلك احچيها نوبه ونوبه اتاني
تترجمها دِموع العين
لو تِحسب النَدم توبة نادِم اني
والله وعِزّتك يحَسين
خَذتني الدِنيا بس مو خالي الهموم
علىٰ ظهرك الضَل عَالماي خالي
ويِجرّني النوح علىٰ المّا گدرت تنوح
علىٰ الناگة اربعين مِن الليالي
چي متغرّب صرنا نعيش الحُب مُواساة
وصار إسمك ما نحچيه إلّا نگول اويلاه
وكِل تَشييع نحضره نصيح ايّ واحُسيناه
دموعي رِثاء.. وابچي اعليك بِلا نَاصِر
وعلىٰ البَلاء.. انتَ المُحتسبُ الصَابِر
ــــــــــــــــــــــــــــــــــــــــــــــــــــــ
ما بين الف ظَلمة اشوفك گبال عيني
يا شَمعة ضِوا الزَهراء
واتوضّىٰ گلبي بحروفك وصار دِيني
البُكاء عَ الخيمة والإبكاء
كِل هذا السكوت وصَفنتي بيك
ويگلولي ونينك ما إله والي
اثاريني يَبو جروح الوِسيعات
افكّر بيك بس بصوت عَالي
كِل ما اطخ بِ اعتابك تِعلىٰ بصدري ناري
وبگلبي اسمع صيحة ايتام بصحاري
وركضة حُرمة تِناهد مِن حَرّ الظهاري
ومِن الخَباء.. طلعت مكسورة خَاطِر
وعلىٰ البَلاء.. انتَ المُحتسبُ الصَابِر
ــــــــــــــــــــــــــــــــــــــــــــــــــــــ
نَبضي يِدوم بنحيبه لو ذكرتك
يِكسرني مُصاب ضِماك
دَمعة غرام ومُصيبة بعيني شِلتك
واحد لا شَريك وياك
ما ترهملي اعيش بِدون طَاريك
وانا اتنفّس هَوا الله مِن خِلالك
يِجنّ العاقل ويِعقل المجنون
هيچي مسوّي بالوادم جَمالك
كِلما ارسمك واگف محنّي القامة اشوفك
وابقىٰ ابچيلك ضامي ومتوسّد چفوفك
والله يعوفه بدِنياه وآخِرته اليعوفك !
ويِبقىٰ العَزاء.. لأجلك هاليوم وباچر
وعلىٰ البَلاء.. انتَ المُحتسبُ الصَابِر
ــــــــــــــــــــــــــــــــــــــــــــــــــــــ