المشاهدات: 1439   المدة: 3:46   الدقة: عالية
التصنيف: أشعار وقصائد   الكلمات الدلالية: فالح حسون الدراجي، احمد العثمانيے، Ahmed Alothmani
تعليق بواسطة احمد العثمانيے
انا وياك وصفنتي وآخر الليل
انتحاسب عالسهر والهم والذنوب
ومثل آخر جگارة بآخر الليل 
نفس، نفسين روحي وبيدك تذوب
أگعد من عليك بآخر الليل
من ينعى الشمس لو طاح الغروب
وأفزز منْ؟ عليك بهدوة الليل 
إذا من غير فزة الكون مرعوب
واصحي منْ؟ عليك برعشة الليل
إذا حتى النفس جحّل بالگلوب
واحشم منْ؟ عليك بعضة الليل 
إذا كلشي بزمانك صار مجلوب
شسوي شبيدي شگدر هيييي ياليل 
اشو حتى الزلال براحتي يروب
واشو عنتر زماني يصير يا ليل 
عليَّ وعالشديد يصير شيبوب
انا مناكت گصب ومواكح السيل 
وعلى مجافت زماني رويحتي تذوب
يركضني زماني بمركض الخيل 
وعگب ما اطيح يسأل: خو ممتعوب ؟
إذا غالب يردني بآخر الخيل 
وإذا مغلوب شحجي وانا مغلوب
يجويني الزمان بماشة الليل 
ويناشدني بصلافة اتوب ؟ ما اتوب
انا شسويت حتى نتوب ياليل 
غير املك ملاحة وطبعي محبوب
وإذا ذنبي السهر معذور ياليل 
لأن بس الدجاج ينام الغروب
وإذا ذنبي الشعر محسوب يا ليل 
الشعر من الولادة بگصتي مكتوب
ثگل هم القصايد يهدم الحيل 
وعساه بقلق شاعر حاسدي يلوب
وإذا ذنبي الشرب محسوب ياليل 
اگولن أي نعم آثام وذنوب
لچن شربي نبيذ الشمس ياليل 
وهم تحسب عصير الشمس مشروب
انا شعندي رصيد؟ وشتدري ياليل
.رصيدي من المحبة مترس جيوب
انا لساني العفيف منگع بهيل 
وانا الطيرة التنام بفي الحبوب
وانا العود الرقيق البلهوى يميل 
إذا أسمع قصيدة رويحتي تذوب
وانا جاراتي خواتي وحامي الدخيل
ما وصخت نفسي وشلت مذبوب
والبيت الاطبه يصير ياليل 
مثل جامع اقدسه ودوم مهيوب
ومثل گلبي هذني شفافي ياليل 
وقالب للشرف من عندي مصبوب
وهذن إيديَّ عليَّ شهود ياليل 
ما جسمن جسم غالب لمغلوب
ولا نهبن جدح عطشان يا ليل 
رغم عمري الكضيته دوم منهوب
اعاند ؟ صح اجادل ؟ نعم ياليل
واذا رادت صبر تلكاني ايوب
لچن هذا الوكت چالذيب ياليل 
اذا تسكت عليه تعيش مسلوب
وحلاتك بالرجل جاكوج يا ليل 
ولا يگضي العمر سندان مگلوب
العمر يگضي العمر ويروح يا ليل 
ويظل اسمي شريف بكل الدروب
وانا بگلبي شعاع إيمان ياليل 
وكل نبضة بوريدي تحش الذنوب
واذا انخى علينا بيوم ياليل 
تخرس المنايا وتنجلي النوب
واذا ضكت عليَّ الباب يا ليل
دمعة اعلى الحسين تفلش البوب