المشاهدات: 681   المدة: 24:42   الدقة: متوسطة
التصنيف: صوتيات دينية   الكلمات الدلالية: باسم الكربلائي، Zahraa Al obaidi
تعليق بواسطة ღ عِشق ღ
باسم الكربلائي
قصيدة : ابعث سؤالي
للشاعر : علي السقاي
ليالي محرم الحرام
ليلة 4 محرم 1446 هـ
:جامع وحسينية الرسول الاعظم - بغداد حي الإعلام


أبعث سؤالي وانطر جوابك
زعلان منّي لو راضي عنّي
أتقرّب ابدم أربع شبابك
وايهون ونّي لو راضي عنّي
يالكلشي بالنّسبه إلي
أتمنّه ترضى يا علي
أتمنّه ترضى

ما أدري مِن وين اَبتدي مِستحيَه أحچي اوياك
كل اللي أدري يا علي أدري أريد اِرضاك
امقدمه القليل ابكربله أربع دماء اهناك
ابعيناي اذا باچر إجه اشلون اَنظر اِلعيناك

احساسي تِعَبني احساس اللي قَصَّر
مخنوگ صدري وادموعي تجري
بس عندي أربع ما عندي أكثر
وابهاي تدري وادموعي تجري
لو بيدي أنطي كل هَلي
أتمنّه ترضى يا علي
أتمنّه ترضى

ابكثر البچي جفني اِنتِلَف ما يخفه أمري اعليك
احسينك يبو احسين انذبح شَگدر بعد أنطيك
ما مِنّي تزعل يا علي اِمْقَدْر الوضع أدريك
ولِيَطمئِن گلبي ردِت لو بالحلم ألگيك

محتاجه وصلك هاي المسيّه
بالطيف إگصِد عن حالي إنشِد
لَتگِلّي شُكراً گِلّي ( وَفيّه )
لـلّٰـه أَسجِد عن حالي إنشِد
خل تهدا ناري التصطلي
أتمنّه ترضى يا علي
أتمنّه ترضى

عن حالي إنشِد وَاخبرك أحوالي نوح ابنوح
حتى ابصلاتي بس بچي اْو صوتي غِدا مبحوح
آيـات هاي الفاتحه أقراهِن اِليا روح
ابوضع القنوت اَذكر أبو شايل طفل مذبوح

صارت حياتي هَم يتبعه هَم
بحسين أحچي كل ساعه أبچي
سَبَّبلي صَدمه بِشْر اِبنَ حذلَم
كل يوم أشچي كل ساعه أبچي
وابنومِتي الدمع ايهلي
أتمنّه ترضى يا علي
أتمنّه ترضى

ما أنسى مِن عَوّد بِشِر ما بالبِشاير عاد
ظلّيت اَكابِر عالحزِن كلما نعه الأولاد
دست اعله گلبي اْو ما طحِت چنّي وگفت اِعناد
اْو مِن طولي طَيّحني خَبَر مذبح أبو السجّاد

مَغشي عَليّه اْو لحگوها صاحوا
اْو ماريد أصحه ياذيني ذَبحه
حسبوني مَيته واعليّه ناحوا
بالروح جَرحه ياذيني ذَبحه
مكتوب اَعيش اْو أبتلي
أتمنّه ترضى يا علي
أتمنّه ترضى

ابملگىٰ بناتك يا علي اتلاگينه بالأرزاء
ما ميَّزِتهِن بالشكل لو ما سِمَعت اَسماء
واشچم زغيره ابچم شَهَر كبّرها عاشوراء
اْو زينب نحيله امحودبه لو فاطمه الزهراء

الما شايف اُمها خل ينظر الها
الزهراء چنها الورثت حزنها
لو عايش اْو حَي تنظر شكلها
شتگول عنها الورثت حزنها
همّي عسى لا ينجلي
أتمنّه ترضى يا علي
أتمنّه ترضى

عگب العزا اْو ذاكه البچي اْو مَلگىٰ خوات احسين
أسمَع تفاصيل الجره وَاكثر تصُب العين
يحچولي مِن صاب السهم گلبه اْو أخَذ ثلثين
يحچولي مِن رَد المُهُر خالي اْو صِهيله اونين

يحچولي موقف خلّاني أنحَب
واحسين طايح صارت صوايح
اِثنين اِركضوله شِمْر اويه زينب
والموت لايح صارت صوايح
أتمنّه هذا مَقتَلي
أتمنّه ترضى يا علي
أتمنّه ترضى

مِن گالوا احسين اِنسحَگ داست عليِه الخيل
گلت اَربع اولادي عسه سِحگَت عظُمهُم حيل
خَلهُم يواسون السبط يتشاركون الويل
وَابچي اْو أواسي فاطمه ابمدمع شبيه السيل

أدَّوا عَساهُم كل الأريده
بالروح والدم والباري يعلم
ماساوي بيهم خنصر مِن ايده
اِتمنّيت يسلَم والباري يعلم
صرخاتي بِسمه تعتلي
أتمنّه ترضى يا علي
أتمنّه ترضى

تدري اشكثر بالطف ردِت چنْت اويه هالنسوان
بس الله ما كاتب إلي أتمَرمر اْو أنهان
ابخدري أنا اْو بت فاطمه بين الزجر واِسنان
وابعُمر خمسين اركِضَت واِتطفّي بالنيران

بالطف عساني اِبدال العقيله
بسياط أنذَل مچتوفه أرحَل
أُوگع مِنْ اَركَب ظهر الهزيله
مِن غير مَحمَل مچتوفه أرحَل
اِبدال العقيله أنولي
أتمنّه ترضى يا علي
أتمنّه ترضى

تمت
علي السقاي ٢٠٢٤ | ١-محرم-١٤٤٦