في استشهاد الزهراء

باب وبسمار ، دخان ونار ، تتذكر
بعينك تذكار ، لأم الاطهار ، يا حيدر
جرحك ميهيد
وانته الصنديد ، يا حيدر
.........
علي يا اول وآخر ، علي يا حاضر الشده
تمر بيك الشدد وانته ، يلوذ المصطفى بسده
بعد ما غمضت عيونه ، نبينه ومندفن بعده
عليك اتآمرت زمره ، ألفهم واحد تعده

حملو احقاد ، مطمع وعناد ، عل مصدر
حرب الاوغاد ، ضد الاسياد ، يا حيدر
للدنيه عبيد
وانته الصنديد ، يا حيدر
...........
عليك شگد غصص مرت ، جرت غصه بأثر غصه
صحابه عليكم اجتمعت ، وكل واحد اخذ حصه
حطب جمعو على بابك ، يحيدر سمعو موصّه
هذاك الي غصب حگك ، يگلهم حانت الفرصه

كشر لنياب ، ذاك النصّاب ، من سيطر
يرفس بالباب ، والضلع انصاب ، يا حيدر
منكم شيريد
وانته الصنديد ، يا حيدر
.........
عصر بنت النبي بحيله ، وضلعها هشمته العصره
على الباري جرأ لمن ، حرگ بابك يبو العتره
مثل فعله فلا واحد ، تجرأ لا اجه بشرّه
تبرأ من فعلته ابليس ، شرد من عصرو الزهره

حتى الشيطان ، هم خايف چان ، وتكتر
شافك غضبان ، وانته السلطان ، يا حيدر
تنشئ وتبيد
وانته الصنديد ، يا حيدر
........
علي لصبرك عجز وصفي ، صبر ايوب يتعذر
وگع محسن يبو الحمله ، وضلع من فاطمه تكسر
هاي ام الحسن هايه ، عجيبه شلون تتصبر
يفضه تنادي تسمعها ، وتشوف بعينك المنظر

يا فضه تصيح ، بصوت التلويح ، ما تگدر
محسنها يطيح ، والدم يسيح ، يا حيدر
رادت سنّيد
وانته الصنديد ، يا حيدر
.........
تفارگتو يبو اليمه ، وعليكم هل أمر محتم
تغسل فاطمه بيدك ، والله بحالتك اعلم
بضلوع الطاهره تحسب ، ويا ضلع الذي تهشم
جسدها تغسله بالدمعه ، وساعه تمسحه من الدم

أم السبطين ، ينظرها حسين ، وتحسر
محمره العين ، يابو الحسنين ، يا حيدر
والهم يزيد
وانته الصنديد ، يا حيدر
........
صفه دارك علي خالي ، وراحت زهرة ايامك
تشم بيها رسول الله ، وتخفف چانت آلآمك
طفت شمعة فرح بيتك ، وحيد تخلص اعوامك
صرت تنطر ابن ملجم ، يطبرك يا علي بهامك

حكمت ظلام ، وانته الضرغام ، ما تُنصر
تحمل آلآم ، كل الاعوام ، يا حيدر
لا فرحه وعيد
وانته الصنديد ، يا حيدر

ابو قاسم الملا